00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda 30 batunze nibura miliyari 10 Frw - Raporo

Yanditswe na Cyprien Niyomwungeri
Kuya 30 April 2022 saa 10:37
Yasuwe :

Raporo y’ubushakashatsi ku bukire ku Isi (Global Wealth Report 2022) isohorwa n’Ikigo Henley & Partners, yagaragaje ko mu Rwanda hari abakire 30 batunze nibura miliyoni 10$, ni ukuvuga miliyari zisaga 10 Frw kuzamura.

Iyi raporo yerekana ko u Rwanda ari urwa 17 muri Afurika mu kugira abakire benshi batunze guhera kuri miliyoni imwe y’amadolari, ni ukuvuga miliyari irenga imwe y’amafaranga y’u Rwanda.

Abafite kuva kuri miliyoni 1$ ariko batageza kuri miliyoni 10$ ni abakire 700 b’Abanyarwanda. Umutungo wabo wose ni miliyari 11$.

Abakire b’abanyafurika bose bafite imitungo ya miliyari 2100 z’amadolari, uyu mubare ukaba uziyongeraho 38 ku ijana mu 2032.

Umubare w’abakire mu bihugu bya Afurika biteganyijwe ko uziyongera cyane mu myaka iri imbere, bigizwemo uruhare n’ishroramari ryambukiranya imipaka, abajya gutura mu bindi bihugu n’abahabwa ubwenegihugu.

Imijyi ikize cyane muri Afurika ni iyo muri Afurika y’Epfo. Johannesburg iza ku mwanya wa mbere n’ubutunzi bungana na miliyari 239 z’amadolari, ugakurikirwa na Cape Town ufite ubutunzi bwa miliyari 131 z’amadolari.

Raporo kandi yagaragaje ko 50% by’ubukire bwa Afurika bwiganje mu bihugu bitanu gusa; Afurika y’Epfo, Misiri, Nigeria, Maroc na Kenya.

Imibare ya kiriya kigo ivuga ko Abanyarwanda batunze miliyoni kuzamura mu madolari ya Amerika ari abantu 850, ruza inyuma ya Tanzania ifite abantu 940, rukaza imbere ya Uganda ifite abantu 820.

Icyakora iyo urebye uko umutungo w’abaturage wazamutse mu myaka 10 ishize, usanga u Rwanda ari urwa kabiri nyuma y’ibirwa bya Maurice.

Abatuye ibirwa bya Maurice ubukungu bwabo bwazamutse ku gipimo cya 74% n’aho ab’u Rwanda ubwabo buzamuka ku gipimo cya 60%.

Abarenga ibihumbi 136 bafite miliyoni irenga y’amadolari baba muri Afurika.

Abagera ku 6700 bafite miliyoni zirenga 10 z’amadolari naho 305 bafite miliyoni guhera ku 100 z’amadolari kuzamura ubu baba muri Afurika.

Kuri uyu mugabane abafite miliyari y’amadolari ni 21 gusa.

Dore ibihugu 10 bya Afurika bifite abakire benshi bafite miliyoni z’amadolari

Afurika y’Epfo: Muri iki gihugu hari abakire 39,300 bafite nibura hejuru ya miliyoni imwe y’amadolari, ni ukuvuga nibura miliyari y’amafaranga y’u Rwanda kuzamura.

Abafite guhera kuri miliyoni 10$ ni 2080, naho abafite kuva kuri miliyoni 100 kuzamura ni 94, abafite miliyari y’amadolari kuzamura ni batanu.

Umutungo w’abakire bo muri Afurika y’Epfo ubarirwa muri miliyari 661 z’amadolari, ukaba utuma iki gihugu kiba icya mbere mu kugira abakire benshi muri Afurika.

Misiri: Mu gihugu cya Misiri hari abakire 16,900 bafite guhera kuri miliyoni imwe y’amadolari.

Abafite guhera kuri miliyoni 10 z’amadolari ni 880, abafite guhera kuri miliyoni 100 z’amadolari ni 57 naho abatunze nibura miliyari y’amadolari mu Misiri ni barindwi.

Muri rusange umutungo w’abakire bo mu Misiri ni miliyari 307 z’amadolari.

Nigeria: Muri iki gihugu hari abakire bafite miliyoni imwe y’amadolari kuzamura ni bihumbi 10.

Abafite miliyoni nibura 10 z’amadolari ni 510, abafite guhera kuri miliyoni 100$ ni 28 naho abatunze miliyari y’amadolari ni bane.

Muri rusange umutungo w’abakire bo muri Nigeria ni miliyari 307 z’amadolari.

Kenya: Muri iki gihugu hari abakire bafite miliyoni imwe y’amadolari kuzamura bangana 8500. Abafite miliyoni nibura 10 z’amadolari ni 340, abafite guhera kuri miliyoni 100$ ni 15. Nta n’umwe utunze miliyari y’amadolari.

Muri rusange abakire bo muri Kenya bafite umutungo ungana na miliyari 91 z’amadolari.

Maroc: Muri iki gihugu hari abakire bafite miliyoni imwe y’amadolari kuzamura bangana na 5000. Abafite miliyoni nibura 10 z’amadolari ni 220, abafite guhera kuri miliyoni 100$ ni 22 naho abatunze miliyari y’amadolari ni batatu.

Muri rusange abakire bo muri Maroc bafite umutungo ungana na miliyari 125 z’amadolari.

Mauritius: Muri iki gihugu hari abakire bafite miliyoni imwe y’amadolari kuzamura bangana na 4800. Abafite miliyoni nibura 10 z’amadolari ni 210, abafite guhera kuri miliyoni 100$ ni batandatu naho abatunze miliyari y’amadolari nta n’umwe.

Muri rusange abakire bo muri Mauritius bafite umutungo ungana na miliyari 44$.

Ethiopia: Muri iki gihugu hari abakire bafite miliyoni imwe y’amadolari kuzamura bangana na 2900. Abafite miliyoni nibura 10 z’amadolari ni 140, abafite guhera kuri miliyoni 100$ ni 4 naho abatunze miliyari y’amadolari nta n’umwe.

Umutungo w’abakire bo muri Ethiopia ni miliyari 52 z’amadolari.

Ghana: Muri iki gihugu hari abakire bafite miliyoni imwe y’amadolari kuzamura bangana n’ibihumbi 2900. Abafite miliyoni nibura 10 z’amadolari ni 120, abafite guhera kuri miliyoni 100$ ni 4 naho abatunze miliyari y’amadolari ni bane.

Umutungo w’abakire bo muri Ghana ungana na miliyari 59$.

Tanzania: Muri iki gihugu hari abakire bafite miliyoni imwe y’amadolari kuzamura bangana na 2400. Abafite miliyoni nibura 10 z’amadolari ni 80, abafite guhera kuri miliyoni 100$ ni 8 naho abatunze miliyari y’amadolari ni umwe. Umutungo w’abakire bose muri Tanzania ni miliyari 56$.

Angola: Muri iki gihugu hari abakire bafite miliyoni imwe y’amadolari kuzamura bangana na 2400. Abafite miliyoni nibura 10 z’amadolari ni 110, abafite guhera kuri miliyoni 100$ ni 3 naho abatunze miliyari y’amadolari ni umwe. Umutungo w’aba bakire wose ni miliyari 53$.

Afurika y'Epfo ni yo ifite abakire benshi batunze miliyoni y'amadolari kuzamura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .