Abagana Cogebanque banyuzwe na serivisi z’imari bagezwaho hifashishijwe ikoranabuhanga

Yanditswe na Ishimwe Israel
Kuya 28 Gicurasi 2020 saa 12:01
Yasuwe :
0 0

Iterambere Isi igezeho ryasunikiye ubuzima bw’abayituye mu ikoranabuhanga! Ubu kuva ku muhinzi kugera ku mukozi w’uruganda rukomeye ku Isi araryitabaza mu kazi ke ka buri munsi.

Muri iyi minsi Isi yugarijwe n’icyorezo cya COVID-19 giterwa na Coronavirus, buri wese kuva ku boroheje n’abakomeye bifashishije ikoranabuhanga mu kwirinda ikwirakwira ryacyo.

Imikoreshereze y’ikoranabuhanga ntiyasize urwego rw’imari kuko serivisi nyinshi zatanzwe ariryo ryifashishijwe.

Usibye ubwirinzi bwa Coronavirus, kwifashisha ikoranabuhanga mu guhererekanya amafaranga binagabanya ikiguzi cyo kuyabungabunga, igihe cyatakazwaga mu ngendo no gutonda imirongo kuri banki kigakoreshwa mu bindi bibyara inyungu.

Banki Nyarwanda y’Ubucuruzi, Cogebanque Plc, iri mu zatanze umusanzu wazo mu gufasha abayigana kubona serivisi z’imari ku buryo bworoshye kandi mu bihe byose hifashshijwe ikoranabuhanga

Mu kwezi gushize mu gihe abaturarwanda batari bemerewe kuva mu rugo, benshi bakoresheje ikoranabuhanga mu gushaka serivisi zitandukanye nko guhaha bifashishije internet, kwishyura, guhererekanya amafaranga n’ibindi.

Abakiliya ba Cogebanque Plc babwiye IGIHE ko bayigannye kuko ari banki ibegera, ikanabagira inama, ndetse ikabagezaho serivisi z’imari mu buryo bw’ikoranabuhanga rigezweho.

Nkubana Alphonse umaze imyaka 10 akorana na Cogebanque yashimye uko mu gihe cya Guma mu rugo yafashijwe kubona serivisi nta nkomyi.

Yagize ati “Coronavirus ikihagera, twahise twinjira muri Internet Banking aho kwishyura hagati yacu, kugura ibicuruzwa byabaga byoroshye. Serivisi zari nziza, abakozi bakora neza. Twabahamagaraga saa Sita z’ijoro ku buryo hari aho bataryamaga.’’

Nkubana ukorana n’Ishami rya Cogebanque Plc rya CHIC, yavuze ko iryo koranabuhanga ryamunyuze kuko "abenshi twarikoreshaga mu kohererezanya amafaranga kandi aho udasobanukiwe bakagufasha."

Avuga ko ikoranabuhanga ryifashishwa ritanga umutekano kuko utaba ufite impungenge zo kugendana amafaranga mu ntoki.

Ati “Iyo wishyuriye umuntu mu ikoranabuhanga haba hari gihamya ko wishyuye kandi birihuta.’’

-  Barambitse sheki, bayoboka ikoranabuhanga!

Butwatwa Paul na we yayobotse ikoranabuhanga muri serivisi z’imari mu gihe mbere yakoreshaga sheki mu kwishyurana.

Yagize ati “Nagiye muri serivisi ya ‘Mobile Wallet’ wagereranya no kugira banki mu biganza byawe igihe cyose, kubera ibya COVID-19. Mbere nakoreshaga sheki cyangwa nkagendana amafaranga. Ubu njya Rutsiro cyangwa Nyagatare, nkishyura abakozi nta kibazo nkoresheje Mobile Wallet ya Cogebanque.’’

Usibye kuba ingano y’amafaranga ushobora kubikuza ukoresheje sheki yaragabanyijwe, binatanga umutekano w’amafaranga ahererekanywa.

Uyu rwiyemezamirimo ukora mu by’ubwubatsi umaze imyaka umunani akorana na Cogebanque, yashimangiye ko abo bakorana babyumvise kuko ‘ubu biroroshye kwishyura umukozi ukamuha amafaranga kuri Mobile Money.’

Yakomeje ati “Gukorana n’ikoranabuhanga ni byiza, tugomba kubimenyera tukabijyamo. Gukoresha ikoranabuhanga ni ingenzi kuko bikemura ibibazo, bitagusabye kugendagenda.’’

Cogebanque Plc imaze imyaka isaga 20 itanga serivisi z’imari, yifashisha ikoranabuhanga mu zirimo izo kwakira no kohereza amafaranga, kureba amakuru ya konti no kuyabika kubitsa no kubikuza, kureba amafaranga ufite kuri konti, kwishyura imisoro, agaciro k’ifaranga ku isoko ry’ivunjisha, amafaranga yoherezwa hifashishijwe Mobile Money n’izindi.

Umuyobozi ushinzwe Serivisi z’Ikoranabuhanga muri Cogebanque Plc, Yvon Gilbert Nishimwe, yavuze ko byagaragaye ko buri wese ashobora gukoresha ikoranabuhanga akabona serivisi za banki aho ari hose ku buryo bwihuse, bworoshye kandi buhendutse.

Yagize ati “Twakiriye abantu benshi batugana basaba gukoresha ikoranabuhanga muri serivisi za banki. Byadufashije mu bukangurambaga bwo kubwira abakiliya ibyiza biri mu guhererekanya amafaranga binyuze mu ikoranabuhanga.’’

Yagaragaje ko ari uburyo bwizewe kandi butanga umusaruro ku mutekano w’amafaranga.

Ati “Nta mpungenge umucuruzi ashobora kugira kuko umutekano w’amafaranga ye uba wizewe. Bigabanya igihe yamaraga agana kuri banki kuko ashobora kubikorera iwe mu rugo, uwo mwanya akawukoramo ibindi.’’

Cogebanque Plc ifite amashami 28 mu gihugu hose. Ifite ibyuma bya ATM 36, abayihagarariye (agents) barenga 600 bayifasha gutanga serivisi zo gufunguza konti, kubitsa no kubikuza, kohereza amafaranga n’izindi serivisi zirimo n’izifashisha ikoranabuhanga; Internet Banking; Mobile Banking (*505# na Coge mBank); ikarita ya Smart cash ifasha kwishyura no kubikuza mu Rwanda n’amakarita ya MasterCard (Debit, Credit na Prepaid) afasha abayakoresha kwishyura no kubikuza ahantu harenga miliyoni 36 ku Isi.

U Rwanda rwihaye intego ko mu 2024, amafaranga abarirwa ku kigero cya 80 % y’umusaruro mbumbe w’igihugu azahererekanywa hifashishijwe ikoranabuhanga, avuye kuri 34.6% mu 2019.

Ishami rya Cogebanque riherereye mu nyubako y'ubucuruzi ya CHIC ryongeye gufungura imiryango nyuma y'imirimo yo kurivugurura
Abagana Banki Nyarwanda y’Ubucuruzi, Cogebanque Plc banyuzwe na serivisi z’imari bagezwaho hifashishijwe ikoranabuhanga by'umwihariko mu bihe byo guhangana n'ingaruka za Coronavirus
Ufite MasterCards (Debit, Credit na Prepaid) ya Cogebanque ashobora kwishyura no kubikuza ahantu harenga miliyoni 36 ku Isi yose
Cogebanque ifite serivisi z'imari igenera abakiliya bayo binyuze mu ikoranabuhanga

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .