00:00:00 IGIHE NETWORK KN KINYARWANDA EN ENGLISH FR FRANCAIS

Abacuruzi bakanguriwe kwihutira kwishyura avansi ya kabiri y’umusoro ku nyungu

Yanditswe na Ntabareshya Jean de Dieu
Kuya 24 Nzeri 2022 saa 12:32
Yasuwe :

Ikigo cy’Imisoro n’Amahoro, RRA, kirasaba abasora bose bafite inshingano zo kumenyekanisha no kwishyura avansi ya kabiri y’umusoro ku nyungu muri uyu mwaka wa 2022, kwihutira kubikora badategereje umunsi wa nyuma.

Ibi byagarutsweho mu gihe hashize amezi atatu y’igihembwe cya kabiri cy’umusoro aho abasora baba bagomba kumenyekanisha no kwishyura avansi ya kabiri y’umusoro ku nyungu bagomba gutanga bijyanye n’igicuruzo bagize muri ayo mezi atatu.

Ubuyobozi bwa RRA buvuga ko kwibutsa abasora kurangiza inshingano zabo hakiri kare ari ukugira ngo nihagira ukenera ubufasha abuhabwe mu buryo bwihuse kandi neza, bityo bimurinde kugwa mu bihano by’ubukererwe.

Komiseri w’Imisoro y’Imbere mu gihugu, Batamuliza Hajara, yabwiye IGIHE ko avansi ya kabiri y’umusoro ku nyungu ireba abakora ibikorwa bibyara inyungu bose bishyuye umusoro ku nyungu z’umwaka wa 2021.

Ati “Uwaguye mu gihombo cy’umwaka ushize ntacyo yishyura kuko habarwa igicuruzo afite ugakuramo icy’umwaka ushize yaba ari mu gihombo ugakuba na zero. Impamvu byatekerejweho byari bigamije korohereza abacuruzi kuko twabonye ko bishoboka ko umucuruzi yakunguka mu mwaka ubanza ariko ukurikiraho agahomba cyangwa ntibigende nka mbere.”

Batamuliza yavuze ko gutanga avansi ku musoro ku nyungu bigira inyungu ku mucuruzi kuko bimurinda kuzahangayika asora menshi mu gihe cyo kwishyura imisoro ku mwaka kuko aba yaratanze avansi yayo, kandi bigafasha Leta mu bikorwa binyuranye bikoresha ingengo y’imari ivuye mu misoro.

Ati “Urebye ku mucuruzi biramufasha kuko bimurinda guhangayika muri cya gihe cyo kwishyura umusoro ku mwaka. Uretse n’ibyo ariko, bifasha muri gahunda za Leta kuko hari ibikorwa biba bikomeje gukorwa kandi byagenewe ingengo y’imari iturutse ku misoro.”

Avansi ya kabiri y’Umusoro ku nyungu irabarwa hashingiwe ku byacurujwe mu kwezi kwa kane, ukwa gatanu n’ukwa gatandatu muri uyu mwaka wa 2022.

Komiseri Batamuliza yavuze ko uretse n’abishyura avansi ku musoro ku nyungu, abantu bakwiye kongera gukangukira ikoreshwa rya EBM mu gutanga inyemezabwishyu kugira ngo igicuruzo cya buri mucuruzi kimenyekane hatabayemo uburiganya.

Imibare yasohowe na RRA muri Tax Statistics 2021, igaragaza ko mu Rwanda hari abakora ibikorwa bisoreshwa bishyura umusoro ku nyungu bari mu byiciro bitatu, bigizwe n’abari mu cyiciro cy’abasora banini bagera kuri 375, abari mu cyiciro cy’abaciriritse 840, ndetse n’abasora bato basaga ibihumbi 230.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .