Habarugira Guillaume yagizwe Umuyobozi Mukuru wa Cogebanque

Yanditswe na Dufitumukiza Salathiel
Kuya 1 Gicurasi 2021 saa 03:02
Yasuwe :
0 0

Banki Nyarwanda y’Ubucuruzi, Cogebanque Plc, yatangaje Habarugira Ngamije Guillaume nk’Umuyobozi Mukuru mushya wayo, asimbura Cherno Gaye wari muri uwo mwanya mu gihe cy’imyaka itatu kugeza mu mpera za 2020.

Mu itangazo iyi banki yashyize ahagaragara kuri uyu wa 30 Mata 2021, yavuze ko izo nshingano Habarugira yazitangiye ku wa 26 Mata 2021.

Habarugira afite uburambe bw’imyaka 14 mu buyobozi bw’ibigo by’imari, bimuhesha kuba umunyamwuga mu kubiteza imbere.

Ni inzobere mu byo guteza imbere ubukungu bw’ibigo byo mu bihugu biri mu nzira y’amajyambere binyuze gushora imari, icungamutungo, uburyo bwo kwishyura n’ubw’ibisohoka ndetse no gushora imari mu bucuruzi.

Mu bihe bitandukanye Habarugira yakoranye n’ibigo byo muri Afurika, u Burayi na Leta Zunze Ubumwe za Amerika, ubwo yari ashinzwe ishyirwa mu bikorwa ry’intego z’imwe muri banki zikomeye z’Abanya-Austria.

Uyu mugabo yagenzuraga imikoranire ya banki n’abakiliya b’imena, umubano wayo n’izindi banki ndetse n’imikoranire n’abatanga serivisi z’uburyo bwo kwishyura.

Habarugira Guillaume afite Impamyabumenyi y’Icyiciro cya Gatatu cya Kaminuza mu by’Ubusesenguzi bw’Imari no kuyobora Imishinga, akagira n’indi nk’iyo mu byo guteza Imbere Ubucuruzi Mpuzamahanga.

Yatangaje ko umwanya yahawe wo kuyobora kimwe mu bigo by’imari bikomeye hano mu Rwanda yawishimiye cyane.

Yagize ati “Nishimiye cyane kuba nahawe aya mahirwe yo kuyobora Cogebanque PLC, mu kurushaho kuyiganisha mu cyerekezo cyo guteza imbere ishoramari ryimakaza ikoranabuhanga, kandi rifite intego zagutse.’’

Kuva Cogebanque yakwemererwa na Banki Nkuru y’u Rwanda gukorera mu gihugu mu 1999, imaze kugira amashami 28 hirya no hino ayifasha kugeza serivisi ku bayigana byoroshye. Ifite ibyuma bya ATM 34, aba-agents barenga 600 bayifasha gutanga serivisi zo gufunguza konti, kubitsa no kubikuza zirimo n’izifashisha ikoranabuhanga binyuze muri Internet Banking, Mobile Banking n’amakarita ya MasterCard (Debit, Credit na Prepaid) afasha abayakoresha kwishyura no kubikuza ahantu harenga miliyoni 36 ku Isi yose.

Habarugira Ngamije Guillaume yagizwe Umuyobozi Mukuru wa Cogebanque

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .