Ecobank Group yahawe igihembo kubera uruhare rwayo mu guteza imbere imibereho myiza muri Afurika

Yanditswe na IGIHE
Kuya 17 Nyakanga 2020 saa 04:41
Yasuwe :
0 0

Ikinyamakuru Euromoney cyandika ku bukungu cyashyize ikigo Ecobank Group ku mwanya wa mbere muri Afurika kubera uruhare rwacyo mu guteza imbere imibereho myiza muri Afurika, Best Bank for Corporate Responsibility.

Iki gihembo Ecobank Group yacyegukanye mu bihembo bitangwa na Euromoney bizwi nka Euromoney Awards for Excellence 2020. Ni igihembo gihabwa banki cyangwa ikigo cy’imari kigaragaza imishinga yihariye igamije guteza imbere abaturage b’aho gikorera.

Mu byatumye Ecobank Group ihabwa igihembo ni uruhare rwayo mu guteza imbere imibereho myiza n’ubukungu ku mugabane wa Afurika.

Umuyobozi ushinzwe ibikorwa mu muryango Ecobank Foundation, Carl Manlan yavuze ko igihembo bahawe ari umusaruro w’ubufatanye n’imbaraga bashyira mu kuzamura imibereho myiza y’Umunyafurika.

Yagize ati “Muri Ecobank dukoresha ubushobozi bwose buhari tugahuza n’andi mahirwe aboneka mu guteza imbere Afurika. Turajwe ishinga n’ubufatanye bugamije impinduka ku baturage ba Afurika. Igihembo cya Euromoney ni ukuzirikana ubwo bufatanye n’imiryango yo muri Afurika n’abandi duhuje umurongo.”

Umuyobozi mukuru wa Ecobank Group, Ade Ayeyemi yavuze ko bishimiye impinduka bakomeje kuzana mu batuye umugabane wa Afurika.

Ati “Ecobank Foundation iri gukora umurimo udasanzwe mu kuzamura imibereho y’abaturage hirya no hino muri Afurika. Umuryango wacu (Ecobank Foundation) ufite ishema ry’impinduka zigaragaza ikinyuranyo ziri kwigaragaza mu bice bitandukanye bya Afurika. Binyuze muri uwo muryango, Ecobank ikoresha imbaraga zayo mu guteza imbere ubukungu n’imibereho myiza muri Afurika.”

Inshingano z’ingenzi za Ecobank Group ni uguteza imbere imibereho myiza y’abaturage binyuze mu buzima, uburezi n’ubukungu budaheza.

Ecobank Group yatangije ubukangurambaga bw’imyaka itatu bugaruka ku ndwara zitandura, aho bageza ku baturage amakuru ahagije kuri izo ndwara, n’ibyo bakwiriye gukora mu kwirinda indwara nk’izo zirimo kanseri na diabète.

Ecobank Group kandi yashyizeho igihembo cyiswe ‘Ecobank’s Group Chairman Sustainability Award’ kireba uruhare rw’amashami y’iyo banki muri buri gihugu mu gushaka ibisubizo bikemura ibibazo by’abaturage bari aho bakorera. Uyu mwaka Ecobank Togo niyo yegukanye icyo gihembo nyuma yo guha umuriro w’amashanyarazi akomoka ku mirasire y’izuba ingo 300 000 zo mu bice by’icyaro.

Mu buzima, Ecobank yatanze miliyoni eshatu z’amadolari yo gufasha mu kuzahura urwego rw’ubuzima muri Afurika ndetse yatanze inkunga mu kigo gishinzwe gukumira no guhangana n’indwara cy’Umuryango wa Afurika Yunze Ubumwe.

Muri uku kwezi kandi, Ecobank ifatanyije n’umuryango Speak Up Africa batangije ubukangurambaga bugamije kurandura malariya muri Afurika.

Ecobank Group ikoresha abakozi basaga 15 000, ikaba igeza serivisi zayo ku basaga miliyoni 20 bo mu bihugu 33 bya Afurika.

Ecobank ni banki y’ubucuruzi imaze kwamamara muri serivisi z’imari ziganjemo izifashisha ikoranabuhanga mu rwego rwo korohereza abakiliya kuzibona batavunitse.

Imikorere ya Ecobank ni yo yatumye inahembwa nka banki y’ubucuruzi ya mbere muri Afurika mu 2019, mu bihembo bigenerwa amabanki; ihembwa nk’ikigo cy’imari gishimwa na benshi muri Afurika mu 2019; ndetse yongera guhembwa nka banki ya mbere ikoresha ikoranabuhanga muri Afurika mu 2017.

Ecobank kandi yahawe igihembo nka banki ya mbere y’ubucuruzi no guhanga udushya mu 2018, ndetse hari n’ibindi bihembo byinshi yegukanye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .