00:00:00 IGIHE NETWORK KN KINYARWANDA EN ENGLISH FR FRANCAIS

BK yahembwe nka banki ya mbere nziza mu Rwanda

Yanditswe na Iradukunda Serge
Kuya 4 April 2022 saa 02:00
Yasuwe :

Ikinyamakuru cya Global Finance cyahembye Banki ya Kigali nka banki ya mbere mu Rwanda yaranzwe n’imikorere igamije guhaza ibyifuzo by’abakiliya kandi ikagera ku musaruro ufatika no mu bihe byari bigoye.

Iki kinyamakuru cyo muri Leta Zunze Ubumwe za Amerika gisanzwe gikora urutonde rw’amabanki yahize andi mu ngeri zitandukanye hirya no hino ku Isi. Gitoranya amabanki yakoze neza mu bihugu 150 byo muri Afurika, Amerika y’Epfo, u Burayi, Aziya ndetse n’Ibirwa bya Caraïbes. Muri Afurika hatoranyijwe banki zo mu bihugu 26.

Kuri iyi nshuro ya 29 Global Finance itanga ibihembo nk’ibi, Banki zo mu Burusiya zakuwe ku rutonde rw’izihatana kubera intambara yo muri Ukraine.

Mu itangazo iki kinyamakuru cyashyize hanze cyavuze ko “cyakuye mu bahatana banki zo mu bihugu biri kugira uruhare rutaziguye mu ntambara yo muri Ukraine.”

Banki ya mbere muri Afurika yabaye Standard Bank. Mu gihe Banki ya Kigali yabaye iya mbere mu Rwanda, Centenary Bank yabaye iya mbere muri Uganda, CRDB Bank iba iya mbere muri Tanzania, CAC International Bank iba iya mbere muri Repubulika Iharanira Demokarasi ya Congo, mu gihe NCBA yabaye iya mbere muri Kenya.

Mu gutoranya izi banki hagendewe ku zagaragaje ubushake bwo kwita ku byifuzo by’abakiliya muri iki gihe isoko rigoye zikagera ku musaruro ukomeye, uzatuma imbere yazo harushaho kuba heza.

Mu gutoranya izi banki abanditsi bakuru ba Global Finance bifashishije abahanga mu bijyanye n’ubukungu, imari n’amabanki bo hirya no hino ku Isi.

Banki zifuza guhatana zatanze ubusabe bwazo, nyuma y’uko zari zagaragaje uko zihagaze mu bijyanye n’umutungo, inyungu, umubare w’abo zigeraho n’udushya zifite muri serivisi zazo.

Umuyobozi w’Ishami ry’itangazamakuru muri Global Finance, Joseph D. Giarraputo yavuze ko ibi bihembo bitanzwe mu gihe Isi iri mu bibazo bikomeye by’ubukungu byatewe n’intambara y’u Burusiya na Ukraine.

Ati “Kubera iyi si y’iby’imari iri mu bihe bikomeye kubera intambara u Burusiya bwashoje kuri Ukraine, abayobozi b’ibi bigo bari mu mayira abiri ajyanye no guhitamo ibijyanye n’amabanki."

"Nyuma y’ingaruka zikomeye zatewe n’icyorezo, izi mpinduka nazo zirasaba gushyira imbaraga cyane mu bijyanye n’umubano mu by’ubucuruzi. Ibi bihembo byacu bitera ingabo mu bitungu abafata ibyemezo mu guhitamo abantu beza bakorana nabo mu bijyanye n’imari.”

Si ubwa mbere Banki ya Kigali yegukana igihe nk’iki kuko ari nayo yari yegukanye icy’umwaka ushize wa 2021. Yagihawe kubera ubudasa yagaragaje mu kuzahura iterambere no gushyiraho ingamba z’ubukungu butajegajega cyane cyane muri iki gihe isi ihanganye n’icyorezo cya COVID-19.

Biteganyijwe ko umuhango wo gutanga ibi bihembo uzaba mu Ukwakira 2022, ari nabwo hazatangazwa banki zatsinze mu bindi byiciro birimo n’iyabaye iya mbere ku Isi.

BK yahembwe nka banki ya mbere nziza mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .