ECOBANK yakuyeho ikiguzi cyo kohererezanya amafaranga mu bihugu ikoreramo hakoreshejwe Rapidtransfer

Yanditswe na Nkurunziza Ferdinand
Kuya 19 Gicurasi 2020 saa 12:07
Yasuwe :
0 0

Banki y’Ubucuruzi ya Ecobank Rwanda Plc yongeye korohereza abakiriya bayo n’abayigana, ibakuriraho ikiguzi cyo kohereza amafaranga afite agaciro katarenze amadolori 200 mu bihugu byose ikoreramo, bakoresheje uburyo buzwi nka Rapidtransfer.

Ni ubwasisi ubuyobozi bwa Ecobank buvuga ko buzarushaho korohereza abantu batandukanye muri ibi bihe isi yugarijwe n’icyorezo cya Coronavirus, bakabasha kohererezanya amafaranga bitabagoye, by’umwihariko muri iki gihe cy’igisibo cya ‘Ramadan’, bukazasozwa tariki ya 30 Gicurasi 2020.

Kohereza cyangwa kwakira amafaranga ukoresheje serivisi ya Rapidtransfer ntibigusaba kuba ufite konti muri Ecobank, ikindi kandi uwoheza asabwa kohereza akoresheje ifaranga ry’igihugu arimo ndetse n’uwo yoherereje akayakira mu gaciro k’ifaranga ry’igihugu aherereyemo.

Umuyobozi w’Ishami rishinzwe kwamamaza ibikorwa bya Ecobank mu Rwanda, Mana Désiré, yabwiye IGIHE ko abantu bakwiye kwitabira kubyaza umusaruro ubu bwasisi bashyiriweho kuko bwizewe kandi nta kiguzi gisabwa uwohereza cyangwa uwakira.

Ati “Kohererezanya amafaranga afite agaciro katarenze amadolori 200 ni igikorwa gikenerwa n’abatari bake muri ibi bihugu byacu, kuba rero nta kiguzi turi gusaba uwohereza cyangwa uwakira ni umwihariko wacu kandi bikaba n’amahirwe abantu bakwiye kubyaza umusaruro.”

Akomeza avuga ko muri Afurika hari inshuti n’abavandimwe baba baragiye gushaka imibereho hanze basize imiryango yabo, iyo bagezeyo rero ngo bakenera kugira icyo bagenera benewabo binyuze mu buryo bworoshye kandi butekanye.

Iyi serivisi ya Rapidtransfer iboneka ku mashami yose ya Ecobank ari mu bihugu 33 muri Afurika aribyo Togo, Gabon, Congo Brazzaville, Centrafrique, Sudani y’Epfo, Repubulika Iharanira Demokarasi ya Congo, u Rwanda, Uganda, Burundi, Kenya, Tanzanie, Zambie, Malawi, Zimbabwe, Mozambique, Cape Verde, Senegal, Guinée, Mali, Gambia, Guinea-Bissau, Sierra Leone, Liberie, Cote d’Ivoire, Burkina Faso, Ghana, Benin, Niger, Nigerie, Cameroun, Tchad, Guinée Equatoriale n’ibirwa bya Sao Tome na Principe.

Si aho gusa iboneka kuko iki kigo cy’imari kimaze kwigarurira imitima y’abatari bake, by’umwihariko muri serivisi zifashisha ikoranabuhanga, aho cyanashyizeho uburyo abafite telefoni zigezweho bashobora gukoresha Rapidtransfer banyuze muri porogaramu yitwa ‘Ecobank Mobile App’ cyangwa bagakoresha Internet banking izwi nka ‘EcobankOnline’.

Ubu ushobora koherereza inshuti n’abavandimwe amadorali atarenze 200 nta kiguzi cya serivisi watswe, mu bihugu byose ECOBANK ikoreramo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .