ECOBANK yahembwe nka banki yahize izindi mu guhanga udushya muri Afurika

Yanditswe na Nkurunziza Ferdinand
Kuya 29 Gicurasi 2020 saa 06:46
Yasuwe :
0 0

Banki y’Ubucuruzi ya ECOBANK yahembwe nk’iya mbere mu guhanga udushya ku Mugabane wa Afurika mu bihembo ngarukamwaka bya ‘Innovators 2020’ bitangwa na Global Finance.

Ni ibihembo byatanzwe ku nshuro ya munani, ubusanzwe bihabwa ibigo biba byaragaragaje ubuhanga mu gushyiraho uburyo bushya kandi bugezweho mu bikorwa by’imari.

ECOBANK ikorera mu bihugu 33 byo muri Afurika ni yo yahize ibindi bigo byo kuri uyu mugabane, ihabwa igihembo nka banki yahanze udushya kurusha izindi.

Mu byitabwaho hatangwa ibihembo harimo uburyo bwo gushora imari mu bikorwa bitandukanye, kwishyurana, gushora imari mu bucuruzi, imikoreshereze y’amafaranga n’ibindi […]; abatsinze batoranywa mu bice bitandukanye by’Isi.

Ibihembo byo guhanga udushya bitangwa kuri banki zahize izindi muri Afurika, Aziya na Pasifika, u Burayi bw’Iburasirazuba no Hagati, Amerika y’Epfo n’iyo Hagati, u Burasirazuba bwo Hagati, Amerika ya Ruguru n’u Burayi bw’u Burengerazuba.

Ibigo bihemberwa ko byahize ibindi mu guhanga udushya dushingiye ku ikoranabuhanga mu ibaruramari ni ibyo muri Aziya na Pasifika, u Burayi bw’Iburasirazuba no Hagati, Amerika ya Ruguru n’u Burayi bw’Iburengerazuba ndetse na za labotwari zahize izindi mu guhanga udushya mu ibaruramari.

Mu muhango wabaye hifashishijwe ikoranabuhanga, Umwanditsi Mukuru wa Global Finance Magazine, Ishami ry’u Burayi, akaba n’Umuyobozi w’Itsinda risuzuma imitangirwe y’ibihembo, Anita Hawser, yavuze ko ibigo byahembewe guhanga udushya mu 2020 byahize ibindi mu buryo bugaragara.

Hawser yavuze ko isuzuma ryakozwe ryibanze ku guhanga udushya muri serivisi cyangwa inzira iganisha ku guhanga udushya, kubera ko bashingira cyane ku ngaruka utwo dushya tuzagira ku bakiliya cyangwa by’umwihariko ibyo bakeneye nko kwihutisha uburyo bwo gutanga inguzanyo cyangwa gusuzuma umwenda w’ibigo by’imari bito no gufasha ibigo gutanga sheki bitabisabye kujya ku ishami rya banki.

Ati “Utwo ni udushya mu bigaragara tugabanyiriza igihe n’ikiguzi ibigo iyo bikoze ibikorwa by’imari. Binahindura imibereho y’ubucuruzi bw’abakiliya, bikabafasha kurushaho gukora neza muri ibi bihe bikomereye ubucuruzi n’ibindi bikorwa by’ubukungu.”

Umuyobozi Mukuru wa Ecobank Group, Ade Ayeyemi, yavuze ko bishimiye guhembwa nka banki yahize izindi mu guhanga udushya muri Afurika.

Yagize ati “Ibi bigaragaza ubuhangange bw’izina ryacu mu bihugu byinshi bya Afurika, umwihariko wacu nka Afurika, ndetse na serivisi zacu zishingiye ku guhanga udushya n’ibisubizo byakomotse ku rugendo rw’impinduka mu ikoranabuhanga.”

Ecobank ni yo banki yonyine ifite ibikorwa byagutse muri Afurika, aho ikorera mu bihugu 33 mu bice bitandukanye by’uyu mugabane.

Ikoresha application yo muri telefoni ngendanwa imwe ihuriweho n’ibihugu byose ikoreramo muri Afurika; ifite kandi na application ya Rapidtransfer ikoreshwa mu kohereza amafaranga aho waba uri hose hatitawe ku mipaka itandukanya ibihugu, ikanafasha ababa mu mahanga koherereza abavandimwe babo amafaranga nta handi banyuze ako kanya kandi ku giciro gito muri Afurika yose. Ibi binajyana no gukoresha internet y’uburyo bumwe ku bihugu 33 byose ikoreramo muri Afurika.

Ubu buryo bw’umwihariko buhuza ibikorwa bya Ecobank aho ikorera muri Afurika bwashyiriweho gufasha abakiliya kubyaza umusaruro amahirwe ari kuri uyu mugabane, ku bw’inyungu zawo binyuze mu buryo bugezweho buzafasha uduce dutandukanye kwaguka no guhahirana […] ubucuruzi n’ishoramari bikarenga imipaka y’ibihugu.

Imikorere ya Ecobank ni yo yatumye inahembwa nka banki y’ubucuruzi ya mbere muri Afurika mu 2019, mu bihembo bigenerwa amabanki; ihembwa nk’ikigo cy’imari gishimwa na benshi muri Afurika mu 2019; ndetse yongera guhembwa nka banki ya mbere ikoresha ikoranabuhanga muri Afurika mu 2017.

Ecobank kandi yahawe igihembo nka banki ya mbere y’ubucuruzi no guhanga udushya mu 2018, ndetse hari n’ibindi bihembo byinshi yegukanye.

Ecobank Group ikoresha abakozi basaga 15 000, ikaba igeza serivisi zayo ku basaga miliyoni 20 bo mu bihugu 33 bya Afurika.

Nk’ikigo cy’imari giteye imbere kandi gishaka gukomeza kwagura ibikorwa byacyo, Ecobank Group yanashyize imigabane yayo ku isoko ry’imari n’imigabane rya Nigeria, Ghana na Côte d’Ivoire.

Ecobank ni banki y’ubucuruzi imaze kwamamara muri serivisi z’imari ziganjemo izifashisha ikoranabuhanga mu rwego rwo korohereza abakiliya kuzibona batavunitse.

Ibigo by’imari n’amabanki yatsindiye ibihembo [2020 Innovators Award] biteganyijwe ko bizabishyikirizwa mu birori byagutse biteganyijwe mu Ugushyingo 2020 mu gihe ibyo mu Burasirazuba bwo Hagati na Afurika bizabera i Dubai ku wa 20 Nzeri 2020.

ECOBANK yahembwe nka banki yahize izindi mu guhanga udushya muri Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .