Imwe mu nkura eshanu zazanywe mu Rwanda zivuye i Burayi, yarapfuye

Yanditswe na Umwali Zhuri
Kuya 16 Mata 2020 saa 09:44
Yasuwe :
0 0

Imwe mu nkura eshanu zazanywe mu Rwanda zikuwe muri Repubulika ya Tchèque, Denmark n’u Bwongereza ku wa 24 Kamena 2019, yapfuye muri Gashyantare uyu mwaka.

Ishyirahamwe ry’u Burayi rishinzwe ibijyanye n’ahororerwa Inyamaswa, EAZA; Umuryango Nyafurika urengera urusobe rw’Ibinyabuzima, African Parks na RDB, nibo batangaje ko iyi nkura yapfuye.

Iyi nkura yapfuye yitwaga Manny, yari imwe muri ebyiri z’ingabo zikuze zakuwe muri Safari Park Dvůr Králové muri Tchèque. Yapfuye ku wa 10 Gashyantare 2020.

Zari zazanywe ari eshatu z’ingore mu gihe ebyiri zari ingabo. Zari hagati y’imyaka ibiri n’icyenda. Harimo izavukiye muri Safari Park Dvůr Králové muri Tchèque zitwa Jasiri, Jasmina na Manny.

Iyitwa Olmoti yaturutse muri Flamingo Land mu Bwongereza naho iyitwa Mandela ituruka muri Ree Park Safari muri Denmark. Izi nkura zoherejwe mu Rwanda nk’impano yahawe Ikigo cy’Igihugu cy’Iterambere (RDB).

Itangazo ryashyizwe agaharagara na EAZA, African Parks na RDB, rivuga ko iyi nkura itishwe na ba rushimusi, ahubwo ko ibimenyetso bigaragaza ko yapfuye kubera ibibazo by’igogora ry’ibyo yabaga yariye gusa “impamvu ya nyuma y’urupfu rwayo ntiratahurwa”.

Rigira riti “Dutegereje ko ibisubizo by’ibizamini byisumbuyeho bya laboratwari bigaragaza umucyo, gusa kubera amabwiriza akomeye yashyizweho mu kwirinda COVID-19, biragoye ko twakira ibi bisubizo mu gihe cya vuba”.

Iyi nkura yagenzurwaga umunsi ku wundi n’impuguke ndetse yahabwaga ibiribwa biyifasha kumera neza.

Gusa nyuma y’aho ubuzima bwayo buhindutse ahanini mu myitwarire yayo mu mirire, ubuyobozi bwa pariki bwahise bumenyesha abaganga b’amatungo n’inyamaswa, iza gupfa mbere y’uko bayiha ubufasha.

Izindi nkura zazanye zo ziri mu buzima bwiza nta kibazo na kimwe zifite.

Uburyo bwo kwimura inyamaswa nk’ubu bugamije ko zongerwa mu kindi gihugu, gusa imiterere y’ikirere ishobora gutuma zigorwa no kumenyera aho zimuriwe.

Mbere yo kuzanwa mu Rwanda, zamaze amezi zitegurwa ku buryo zitazagira ibibazo muri uru rugendo rwamaze amasaha 30. Zazanywe mu buryo bugezweho ziri mu cyo umuntu yakwita nk’igisanduku aho zahererwaga amazi n’ibyo kurya.

Kuri ubu Pariki y’Igihugu y’Akagera ifite inyamaswa nini eshanu zikunze gukurura ba mukerarugendo ari zo; Intare, Inzovu, Ingwe, Inkura n’Imbogo.

Indi nkuru wasoma: U Rwanda rwakiriye inkura eshanu zaturutse muri Tchèque (Amafoto)

Inkura yitwa Manny yazanywe mu Rwanda ivanywe muri Tchèque, yarapfuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .