00:00:00 IGIHE NETWORK KN KINYARWANDA EN ENGLISH FR FRANCAIS

Impinduka ku mibereho y’abaturiye ishyamba rya Nyungwe nyuma y’uko rigizwe Pariki y’Igihugu

Yanditswe na Prudence Kwizera
Kuya 11 Gicurasi 2021 saa 08:06
Yasuwe :
0 0

Kuva mu 2005 Ishyamba rya Nyungwe ryahindurwa Pariki y’Igihugu, abakoreragamo ubuhigi n’ibindi bikorwa biryangiza bakuwemo, Leta ikomeza gukurikirana imibereho yabo kugira ngo babeho neza batangiza ibidukukije.

Pariki y’Igihugu ya Nyungwe igizwe n’ishyamba kimeza riri ku buso km2 1019, iherereye mu Burengerazuba bw’Amajyepfo y’u Rwanda, ibamo urusobe rw’ibinyabuzima birimo inyamaswa n’ibimera bitandukanye bitewe n’uko ari ishyamba ry’inzitane ryo mu misozi miremire muri Afurika.

Ishyamba kimeza ryayo rifatwa nk’ikigega cy’amazi y’u Rwanda kuko ritanga 70% by’amazi y’u Rwanda kandi ribonekamo isoko ya kure y’uruzi rwa Nili.

Ribonekamo amoko y’inguge atandukanye, amoko y’ibimera arenga 1019, inyamabere zirenga 90 n’amoko y’inyoni arenga 320.

Nyuma y’imyaka 16 Nyungwe ibaye Pariki y’Igihugu, abakoreragamo ibikorwa by’ubuhigi, ubushimusi, gutwika amakara n’ibindi byangiza ibidukikije n’urusobe rw’ibinyabuzima, bashyizwe hamwe muri koperative zigamije kubateza imbere.

Mu mirenge icyenda yo mu turere twa Nyaruguru na Nyamagabe ikora kuri Pariki y’Igihugu ya Nyungwe habarurwa abantu 891 bahoze bayikoreramo ibikorwa byangiza ibidukikije.

Kuri ubu bose bibumbiye hamwe muri koperative 35 bakoreramo ibikorwa bibateza imbere.

Mugendashyamba Emmanuel ati “Koperative yacu ikora ubuvumvu kuko tworora inzuki mu buryo bwa kijyambere. Mbere twagiraga umwanda kandi nta bikorwa bifatika dukora usibye guhiga no kwangiza ibidukije n’urusobe rw’ibinyabuzima muri Nyungwe.”

Gasana Jean we avuga ko mbere bategaga imitego muri Nyungwe bashaka ko inyamaswa zigwamo bakazibaga, kuko babagaho mu buzima bubi.

Ati “Hari igihe wamaraga ibyumweru bitatu uteze nta kintu urafata, inzara ikatwica tukarisha ibyatsi nk’inyamaswa. Ubu twishyize hamwe dukora ibikorwa by’amajyambere kuko duhinga ingano tukagurisha tukabona amafaranga.”

Hashize imyaka igera kuri itatu mu turere twa Nyaruguru na Nyamagabe hashyizweho abitwa ‘Imboni za Nyungwe’ bafite inshingano zo kurinda abangiza iyo pariki.

Abo basanzwe bakorera mu nkengero za Nyungwe ibikorwa birimo ubuhinzi bw’icyayi, ingano n’ibirayi ku buryo bateye imbere bitandukanye n’uko bahoze mbere bakiri mu bikorwa byangiza ibidukikije.

Bishimira ko ubuyobozi bwabegereje ibikorwa remezo birimo amashuri, amavuriro, imihanda, amashanyarazi ku buryo badashobora gukora ikosa ryo kongera kujya kwangiza Pariki y’Igihugu ya Nyungwe.

Gasana Jean ati “Mbere tugitega inyamaswa twatumaga ba mukerarugendo batadusura ngo badusigire amafaranga, ariko ubu baraza bayasiga tukubakirwa imihanda, amashuri n’amavuriro. Ntabwo rero twasubira mu bikorwa bibi byo kwangiza Nyungwe cyangwa ngo tugire uwo turebera abigiyemo.”

Umushakashatsi ku rusobe rw’ibinyabuzima n’iterambere ry’abaturage, Dr Imanishimwe Ange, avuga ko icyemzo Leta yafashe cyo kubungabunga Nyungwe no kuyigira Pariki y’Igihugu gikwiriye kuko yari imaze iri shyamba ryari rimaze kwangirika cyane.

Ati “Icyemezo cyafashwe cyari gikwiriye kuko mbere y’uko Nyungwe iba ishyamba rikomye hagiye habaho ibikorwa bitandukanye byangiza iri shyamba, ku buryo ubuso bwa Nyungwe bwagabanutse cyane kuko abaturage bagendaga bayitema bagatwika amakara cyangwa bakavanamo inkwi zo gucana.”

Hagamijwe guteza imbere Nyungwe, kuyibungabunga no gushaka akazi, Dr Imanishimwe Ange yashinze Ikigo cyitwa BIOCOOP n’Umuryango witwa BIOCOOR hagamijwe kumenyekanisha ibyiza by’iyo pariki, kuyitemberezamo ba mukerarugendo no kubasobanurira ibyiza biyibonekamo.

Icyo kigo yashinze mu mwaka wa 2012 cyatanze n’akazi ku biganjemo rubyiruko rw’abakobwa n’abahungu kuko kugeza ubu ikigo cye giherereye mu Murenge wa Kitabi mu Karere ka Nyamagabe gikoresha abakozi 27 bahoraho na 1800 badahoraho.

Umuryango BIOCOOR washinzwe mu 2020 uri gufatanya na TROCAIRE na Jersey Overseas Aid JOA, UNICOOPAGI na ICRAF mu mushinga w’imyaka ine wo gufasha abaturiye Nyungwe kubungabunga urusobe rwíbinyabuzima baniteza imbere mu buryo burambye.

Dr Imanishimwe avuga ko muri Nyungwe habonekamo ubwoko bw’inyamaswa zikurura ba Mukerarugendo, agatanga urugero ku zitwa impundu n’inkomo ndetse n’amoko menshi y’inyoni abantu bakwiye gusura.

Tariki ya 7 Ukwakira 2019 ni bwo Ikigo cy’Igihugu cy’Iterambere, RDB, cyasinyanye na Sosiyete yo muri Afurika y’Epfo isanzwe ikora ibijyanye no gucunga amapariki yitwa ‘African Parks’ amasezerano y’imyaka 20 yo gucunga Pariki y’Igihugu ya Nyungwe.

Umuyobozi w’iyi sosiyete yavuze ko icyo bazashyira imbere ari ukurushaho kumenyekanisha ibyiza biri muri iyi pariki no gukorana n’abaturage.

Mu guteza imbere abaturiye pariki binyuze mu kubagezaho inyungu z’umusaruro wazo, RDB ishyikira imishinga y’iterambere mu bice bitandukanye aho abaturage bagezwaho 10% by’amafaranga yinjiye mu isanduku ya leta avuye mu bukerarugendo, akabafasha mu bikorwa remezo.

Kuva mu 2005 abaturage bahabwaga 5%, inyungu yazamutse ku 10% mu 2017.

Imibare ya RDB yerekana ko mu 2019 u Rwanda rwasuwe n’abantu miliyoni 1 n’ibihumbi magana atandatu. Muri 2019 Parike ya Nyungwe yo yasuwe n’abantu 17.863 bavuye ku 16.086 mu 2018.

Mu 2019 Parike z’igihugu zinjije hafi miliyari 29 Frw mu gihe urwego rw’ubukerarugendo muri rusange rwinjije hafi miliyari 498Frw.

Bamwe mu baturiye Nyungwe bavuga ko n’ubwo iturukamo amazi menshi bo atabageraho ku buryo buhagije kuko akenshi bayabura, bakaba bifuza ko Leta yakwita kuri icyo kibazo.

Ibikorwa bya ba rushimusi byahoze muri Nyungwe byagize ingaruka ku bukerarugendo dore ko inzovu n’imbogo zifatwa nk’abahinzi batuma ishyamba ritoha zamazwe n’abahigi.

Pariki y’Igihugu ya Nyungwe igizwe n’ishyamba kimeza riri ku buso km2 1019
Kuva mu 2005 Ishyamba rya Nyungwe ryahinduwe Pariki y’Igihugu
Muri Nyungwe habonekamo amoko y'inyoni menshi
Hashize imyaka igera kuri itatu mu turere twa Nyaruguru na Nyamagabe hashyizweho abitwa ‘Imboni za Nyungwe’ bafite inshingano zo kurinda abangiza iyo pariki
Bamwe mu bakorana n'Umushakashatsi Dr Imanishimwe Ange mu kumenyekanisha Nyungwe no kuyibungabunga
Ikigo Biocoor cyashinzwe na Dr Imanishimwe Ange gifasha mu kumenyekanisha Nyungwe no kuyibungabunga
Hagamijwe guteza imbere Nyungwe, kuyibungabunga no gushaka akazi, Dr Imanishimwe Ange yashinze ikigo cyitwa Biocoor kigamije kumenyekanisha ibyiza by’iyo pariki

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .