00:00:00 IGIHE NETWORK KN KINYARWANDA EN ENGLISH FR FRANCAIS

Abadepite bemeje umushinga w’itegeko rishyiraho Pariki ya kane y’Igihugu

Yanditswe na

Cyprien Niyomwungeri

Kuya 2 Nzeri 2015 saa 07:15
Yasuwe :

Abadepite bemeje umushinga w’Itegeko rishyiraho Pariki ya kane y’igihugu ya Gishwati- Mukura.

Kuri uyu wa 2 Nzeli 2015 nibwo uyu mushinga w’itegeko wemejwe nyuma y’uko kuwa 4 Kanama 2015 wari wagejejwe imbere y’Inteko Ishinga Amategeko umutwe w’Abadepite ikanga kuwemeza kuko yasanze muri raporo ya Komisiyo yasuzumye uyu mushinga harimo amakosa.

Bimwe mu byo Komisiyo y’uburezi, ikoranabuhanga, umuco n’urubyiruko yasuzumye iyi raporo yanogeje, harimo ingingo ya Kabiri ivuga ku bisobanuro by’amagambo n’ingingo ya Gatatu ivuga ku ishyirwaho rya Pariki y’igihugu ya Gishwati- Mukura.

Uyu mushinga w’itegeko rishyiraho Pariki y’igihugu ya Gishwati-Mukura ugizwe n’ingingo icyenda. Harimo n’izigena uko abari bafite ibikorwa ahatoranyijwe kugirwa Pariki bazahabwa ingurane.

Mu nama y’Abaminisitiri yateranye tariki ya 15/10/2014 iyobowe na Perezida Paul Kagame, nibwo hemejwe umushinga w’Itegeko rigena Pariki y’Igihugu ya Gishwati – Mukura.

Minisiteri y’umutungo kamere ivuga ko umushinga wo guhindura amashyamba ya Mukura na Gishwati Pariki y’Igihugu, wagenewe Miliyoni 9.5 z’amadolari ya Amerika ahwanye na Miliyari 7 z’amafaranga y’u Rwanda.

Aya mafaranga azatangwa na Banki y’Isi azifashishwa mu kwegereza ibikorwa remezo birimo amazi n’amashanyarazi ayo mashyamba mu rwego rwo gukomeza kuyabungabungira ubwiza n’ubuziranenge bukurura ba mukerarugendo.

Azanafasha abaturage kwiteza imbere bakora imishinga ijyanye n’ibikenerwa mu bukerarugendo.

Iyi Pariki ya Gishwati izaba ihuza amashyamba abiri, irya Gishwati na Mukura. Izaba ifite ubuso bungana na Hegitari 4419, ubuhumekero bwayo bungana na hegitari 992.
Biteganyijwe ko iyi Pariki izaba irimo urusobe rw’ibiti, urugabano rw’uruzi rwa Nil na Repubulika Iharanira Demokarasi ya Congo, inyamaswa n’ibimera, izafungurwa ku mugaragaro nyuma y’uko itegeko riyishyiraho rikanayirengera ryemejwe.

Iyi Pariki ije yiyongera ku zindi eshatu u Rwanda rwari rusanganywe zirimo Pariki y’Ibirunga, iy’Akagera n’iya Nyungwe.

Pariki z’u Rwanda zinjije amafaranga y’u Rwanda asaga miliyari 12 na miliyoni 180 mu mwaka wa 2014, aho yiyongereyeho asaga 18% ugereranyije n’umwaka wabanje.

Imibare itangazwa n’Ikigo cy’Igihugu gishinzwe Iterambere ,RDB, ari nacyo gishinzwe izi Pariki igaragaza ko Pariki y’Ibirunga,iy’Akagera n’iya Nyungwe zifite ibikorwa hafi ibihumbi 68 byasuwe mu mwaka wa 2014.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .