Umunyarwanda yatorewe kujya mu nama y’Ubutegetsi mu by’ubukerarugendo muri Afurika

Yanditswe na HABIMANA James
Kuya 29 Mata 2019 saa 10:40
Yasuwe :
0 0

Umunyarwanda Bakunzi Greg washinze Ikigo gifasha ba Mukerarugendo cyitwa Amahoro Tours, yatorewe kujya mu nama y’ubutegetsi mu bijyanye n’ubukerarugendo ku mugabane wa Afurika (African Tourism Board).

Bakunzi yijeje ko isura y’u Rwanda igiye gukomeza kurabagirana ku ruhando mpuzamahanga mu bijyanye n’ubukerarugendo.

Perezida w’inama y’ubutegetsi ya African Tourism Board, Alain St. Ange yahaye ikaze uyu munyarwanda, avuga ko ari umunsi ukomeye ku bukerarugendo kuri uyu mugabane kuba Bakunzi yemeye gukorana nabo.

Iyi nama y’ubutegetsi ifite icyicaro i New York muri Leta Zunze Ubumwe Za Amerika, Perezida watorewe kuyiyobora akomoka mu gihugu cya Seychelles naho Visi perezida akomoka muri Afurika y’Epfo.

Bafite kandi ikindi cyicaro i Tel Aviv muri Israel no mu Buhinde, intego ni uguteza imbere ubukerarugendo bwo ku mugabane wa Afurika.

Muri Mutarama uyu mwaka Bakunzi yahawe igihembo n’Ishami ry’Umuryango w’Abibumbye rishinzwe guteza Imbere Ubukerarugendo (UNWTO) kubera guteza imbere ubukerarugendo mu Rwanda no mu ruhando mpuzamahanga.

Iki gihembo yagiherewe i Madrid muri Espagne mu Imurikagurisha Mpuzamahanga ry’Ubukerarugendo (FITUR) ryo ku wa 24 Mutarama 2019.

Mu kiganiro yahaye IGIHE, Bakunzi yavuze ko iri ari ishema ku Rwanda kuba ruhagarariwe muri iyi nama y’ubutegetsi ku mugabane.

Yagize ati “Kujya muri iriya komite nta kindi basaba biterwa n’uko baba babonye ibikorwa byawe bigatuma bagutoranya ariko bigaterwa n’ubushake ufite muri ako kazi nabo bakavuga bati uyu muntu tumubonye mu nama y’ubutegetsi hari byinshi yatugezeho. Barampamagaye barabimbwira njye mbaza kugira ngo ni ibintu byo kwikinira, hashize iminsi nibwo baje kumpa iriya nkuru.”

Yakomeje agira ati “Icyo bisobanuye ku Rwanda ni ukwagura amarembo, biduhaye ijambo rikomeye ngo tugaragaze ibikorwa dufite. Byonyine kumva ko u Rwanda rurimo ni ikintu gishimishije, ubu bashobora nko gutegura inama runaka tukababwira tuti muyizane mu Rwanda kuko dufite ubushobozi bwo kuba twayakira”.

Bakunzi yakomeje avuga ko icyo bagiye guharanira ari uko ubukerarugendo bwo ku mugabane wa Afurika buba ubukerarugendu bushingiye kubanyafurika ubwabo, aho kumva ko buzashingira ku bavuye i Burayi gusa.

Yavuze ko Afurika ariko gace ku Isi gakenewe na bamukerarugendo, bityo ko Abanyafurika bafite uruhare rwo kugaragaza isura y’ubukerarugendo bwabo, mu gihe hari ibindi bihugu bishaka kubugaragaza nabi ku ruhando mpuzamahanga.

Bakunzi yinjiye mu bikorwa by’ubukerarugendo mu 1999, atangiza Amahoro Tours mu 2001.

Yashinze Red Rocks Cultural Center mu 2013 na Red Rocks Initiatives for Sustainable Development mu 2017 igamije iterambere ry’ubukerarugendo, kubungabunga urusobe rw’ibinyabuzima n’imibereho myiza y’abaturiye Pariki y’Igihugu y’Ibirunga.

Bakunzi aherutse guhabwa igihembo ku ruhando mpuzahanga ku bwo guteza imbere ubukerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza