Umunyamideli Kinsey wamenyekanye yambaye ubusa ku mukino wa nyuma wa Champions League yasuye ingagi mu birunga

Yanditswe na Eric Tony Ukurikiyimfura
Kuya 4 Nzeri 2020 saa 04:47
Yasuwe :
0 0

Umunyamideli ukomoka muri Leta Zunze Ubumwe za Amerika, Kinsey Wolanski, wamenyekanye ubwo yinjiraga mu kibuga yambaye ubusa ku mukino wa nyuma wa Champions League ya 2019, ari mu Rwanda aho yasuye ingagi zo mu birunga.

Kinsey Wolanski w’imyaka 24, yasuye Pariki y’Igihugu y’Ibirunga muri ibihe bihe bya Coronavirus nyuma y’uko ba mukerarugendo bemerewe gusubukura ibikorwa byabo ariko hubahirijwe ingamba zo kwirinda iki cyorezo.

Mu mashusho yashyize kuri Instagram ku wa Kane, Kinsey Wolanski yagaragaye yambaye agapfukamunwa ari imbere y’ingagi muri Pariki y’Igihugu.

Yavuze ko gusura ingagi byahoze mu nzozi ze, aho yifuzaga kuzamuka n’amaguru mu birunga biri hagati y’u Rwanda n’ibihugu bituranye narwo.

Ati “Ibi byahoze ari inzozi zanjye igihe kirere. Kuzamuka intera ndende muri pariki y’igihugu y’ibirunga ku mipaka y’u Rwanda, Uganda na Repubulika Iharanira Demokarasi ya Congo nkabona ingagi zo mu misozi.”

Uyu mukobwa usanzwe ari umukinnyi wa filime, yavuze ko kandi yashimishijwe no kubona ingagi zo mu birunga zariyongereye mu gihe mu myaka itanu ishize zarashoboraga kuzimira kubera igabanuka ryazo.

Ati “Ingagi, mu myaka itanu ishize zari mu byago byo kuzimira kandi twishimire ko hatewe intambwe ishimishije mu kuzibungabunga bikozwe n’abazitaho bazisura.”

Kinsey Wolanski yamenyekanye ubwo yinjiraga mu kibuga yambaye utwenda tw’imbere (Bikini) mu mukino wa nyuma wa UEFA Champions League ya 2019 wahuje Liverpool na Tottenham i Madrid .

Uyu yinjiye mu kibuga yambaye umwambaro wanditseho ijambo ’Vitaly Uncensored’, akaba ari izina ry’urubuga rwa internet rwa filimi z’urukozasoni rw’umukunzi we, Vitaly Zdorovetskiy.

Vitaly Zdorovetskiy na we yinjiye mu kibuga ku mukino wa nyuma w’Igikombe cy’Isi cya 2014 wahuje u Budage na Argentine muri Brésil.

Kinsey Wolanski yashatse kandi kwinjira mu kibuga ku mukino wa nyuma wa Copa América mu 2019 wahuje Brésil na Peru, akomwa mu nkokora n’abashinzwe umutekano bamufashe akajyanwa muri gereza.

Umunyamideli Kinsey Wolanski yasuye ingagi mu birunga
Kinsey Wolanski yamenyekanye ubwo yinjiraga mu kibuga ku mukino wa nyuma wa Champions League ya 2019 i Madrid

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .