Uko byagenze ngo amasezerano y’u Rwanda na PSG agerweho

Yanditswe na Philbert Girinema
Kuya 4 Ukuboza 2019 saa 05:43
Yasuwe :
0 0

Nta wabikekaga urebye uburyo benshi batunguwe. Inkuru yabaye kimomo binyuze ku mbuga nkoranyambaga, nyuma y’umunota umwe yari yamaze gukwira hose.

Bamwe babanje gukeka ko ari ’Fake News’, abandi babanza kujijinganya kuko batiyumvishaga ko byashoboka cyangwa se koko ko byari byabaye, muri macye u Rwanda rwongeye gutungurana rusinyana amasezerano y’imikoranire na Paris Saint Germain, ikipe rurangiza muri ruhago yo mu Bufaransa, imwe ikinamo Neymar na Mbappe.

Gutungurana k’u Rwanda ko kumaze kuba akarande kuko rimwe bucya hatangijwe uruganda ruteranya imodoka, ejo ukumva ngo hatangijwe uruteranya izikoreshwa n’amashanyarazi, ubundi ngo hatangijwe urwa telefone, cyangwa se ngo amaraso n’imiti bisigaye bigemurwa ku mavuriro hifashishijwe drones. Buri munsi ucyana ayawo.

Kuri ubu inkuru yamaze kuba kimomo ni uko PSG igiye kujya yamamaza urwa Gasabo binyuze mu gikorwa cyo kureshya ba mukerarugendo kizwi nka ’Visit Rwanda" ku buryo guhera kuri uyu wa Gatatu ku mukino PSG iri buze kwakiraho Nantes, hari butangire ubufatanye bw’u Rwanda n’iyi kipe, aho ’Visit Rwanda’ iza kugaragara bwa mbere ku myenda abakinnyi bari buze kuba bambaye bishyushya.

Kugira ngo ubu bufatanye bugerweho, byanyuze mu nzira ndende ariko itagoye na busa, kubera amakarita yakinwaga. Nta bwana na seti zasakiranaga.

Ni ngombwa ko ubanza ugasobanukirwa ba nyir’iyi PSG n’uko mu myaka itarenze icumi imaze kuba ubukombe mu Burayi. Iyi kipe si iya kera cyane kuko yashinzwe mu 1970 ariko igira amahirwe yo kuba ba nyirayo Guy Crescent, Pierre-Étienne Guyot na Henri Patrelle bari abagwizatunga bakomeye.

Ubuhangange bwayo bwakajije umurego ubwo yagurwaga n’abanyemari bo muri Qatar, Qatar Sports Investments, mu 2011.

Iyi Sosiyete yashinzwe mu 2005 ifite icyicaro gikuru i Doha muri Qatar, ishora imari mu bikorwa by’imyidagaduro na siporo. Perezida wa QSi ni nawe wa PSG, Nasser Ghanim Al-Khelaifi.

Nubwo ari Sosiyete y’ishoramari ikora mu buryo bwigenga, ishingiye kuri leta ya Qatar, bituma iyi kipe ari imwe muri ebyiri zonyine ku Isi zifite ba nyirazo bashingiye kuri leta; yo na Manchester City.

Aba baherwe bayishoyemo imari ifatika, ihera mu gihugu imbere yigarurira ibikombe byose byari bimaze imyaka n’imyaniko bitwarwa na Lyon.

Mu gushaka kwigarurira u Burayi, Al-Khelaifi, yashyize ingufu mu gutuma iyi kipe iba ikirangirire, igura buri mukinnyi wese ukomeye ku Isi ariko w’icyamamare ku buryo byayifunguriye imiryango henshi. Uhereye kuri David Beckham, Zlatan Ibrahimovich, Kylian Mbappé, kugera kuri Neymar Jr uhenze ku Isi kugeza ubu.

Amakuru yizewe agera kuri IGIHE, ni uko kugira ngo ubufatanye bwa PSG n’u Rwanda bubeho mu bijyanye no kuba iyi kipe yakwamamaza ibikorerwa mu Rwanda n’ubukerarugendo bwarwo, byaturutse ndetse byoroshywa n’umubano usanzwe hagati y’u Rwanda na Qatar.

Uyu mubano umaze igihe kinini ni wo watumye Emir wa Qatar, Sheikh Tamim bin Hamad Al Thani, aza mu Rwanda muri Mata uyu mwaka ndetse anasura Pariki y’Akagera ari kumwe na Perezida Kagame mu mvura yagwaga icyo gihe.

Icyo gihe kandi hasinywe amasezerano mu ngeri enye arimo ajyanye n’imikoranire mu rwego rw’umuco, muri siporo, mu bukerarugendo n’ibikorwa by’ubucuruzi ndetse n’ibijyanye n’ingendo zo mu kirere.

Bivugwa ko ibiganiro na PSG byoroshye biturutse kuri uyu mubano ndetse bikomezanya umuvuduko nyuma y’uko uyu muyobozi yari avuye mu Rwanda.

Igikomeye muri byose ni uko nubwo QSi iyoborwa na Al-Khelaifi ari nawe Perezida wa PSG, iyi sosiyete yashinzwe na Emir wa Qatar; byumvikanisha uburyo u Rwanda rwisanze mu biganiro mu buryo bworoshye.

Ikindi ni uko umwe mu bantu batumye QSi igura PSG, ni Nicolas Sarkozy wayoboye u Bufaransa, ubu akaba ari inshuti ikomeye y’u Rwanda ndetse afasha abashoramari bashaka kurugana.

Ubu bufatanye bw’u Rwanda na PSG butandukanye n’ubwo u Rwanda rusanzwe rufitanye na Arsenal, ariko bufite akamaro kanini urebye mu cyerekezo cy’igihugu.

Kuba u Rwanda rushaka kugaragariza amahanga ibyiza byarwo, hamwe mu hantu rwari ruhanze amaso ni ku isoko ry’u Bufaransa, by’umwihariko mu Mujyi wa Paris, ufatwa nk’Umurwa Mukuru w’Isi mu by’umuco.

Ibyamamare hafi ya byose by’Isi bifata Paris nk’Umujyi w’ubukerarugendo, imideli n’ibindi; inkengero za Paris nko mu Mujyi wa Cannes ni ahantu handitse amateka mu bya Sinema. Ibi byose byanatumye mu mikoranire na PSG hitswa cyane ku kugaragaza u Rwanda mu isura yindi y’umuco, hakanatezwa imbere ibikorerwa mu gihugu nk’imideli, icyayi, ikawa n’ibindi.

Ikindi kigaragaza isura yihariye y’iyi mikoranire na PSG ni ishoramari riri gushyirwa mu ngeri zibanzweho muri aya masezerano cyane cyane umuco n’imyidagaduro.

Uru rwego cyane rujyanye n’imyidagaduro n’ubundi Abafaransa bari batangiye kuruyoboka mu Rwanda bigaragazwa n’ishoramari rya miliyoni $40Vivendi ibarizwamo Canal+ yiyemeje gushyira muri Kigali Cultural Village ku musozi wa Rebero.

Gusa igitangaje kandi cyiza muri byose ni uburyo guhera umwaka utaha, icyayi cy’u Rwanda n’ikawa aribyo byonyine bizajya bicuruzwa kuri Parc de Princes, stade ya PSG, biha amahirwe abahinzi n’inganda gutera imbere kurushaho no kubona isoko rishya.

Ifoto yakoreshejwe mu gutangaza ubufatanye bw’u Rwanda na PSG igaragaraho abakinnyi bakomeye b’iyi kipe. Uhereye ibumoso ni Keylor Navas; Kylian Mbappé; Neymar Jr, Ángel Di María na Marco Verrati

Kuki u Rwanda rwamamaje ku myenda yo mu myitozo n’iyo mu kwishyushya mbere y’umukino?

Amakuru avuga ko u Rwanda rwifuzaga kuba rwagirana amasezerano n’iyi kipe ku buryo Visit Rwanda yamamazwa ku myenda ikipe ikinana, ariko ntibyakunda kubera abandi baterankunga kandi bakomeye PSG ifite.

PSG magingo aya ifite abaterankunga bagera kuri 30. Ab’imena ni babiri aribo Nike iyambika na Sosiyete y’amahoteli ya Accor. Zombi zamamazwa ku mupira imbere aho agaciro k’amasezerano n’izi sosiyete kabarirwa muri miliyoni 165 z’amadolari.

Byonyine amasezerano iyi kipe yagiranye na Accor bivugwa ko ari “mu masezerano ane meza mu Burayi” aho ku mwaka agaciro kayo kagera muri miliyoni 50 z’amadolari.

Arsenal ubusanzwe yamamaza u Rwanda binyuze ku gushyira ijambo Visit Rwanda ku kuboko kw’ibumoso kw’imyenda iyi kipe ikinana muri shampiyona.

Aha hantu ku mwenda wa PSG hafitwe na Banki y’Igihugu muri Qatar (Qatar National Bank) nayo itanga amafaranga menshi, ikanarenzaho guha amasezerano abakinnyi barimo nka Neymar ngo bayamamaze ku giti cyabo.

Iyi banki niyo yahaye PSG inguzanyo y’amafaranga yifashishijwe mu kugura Neymar, aho ayamutanzweho abarirwa muri miliyoni 222 z’amadolari ya Amerika.

Mu mugongo naho hafitwe n’abanya-Qatar, Ooredoo, sosiyete ikora ibijyanye n’itumanaho. Ibi nibyo byatumye u Rwanda rwashakaga kugaragara muri Paris rushaka ubundi buryo hakorwa amasezerano y’imikoranire ndetse hanashyirwamo ingingo nyinshi zirugaragaza mu buryo budasanzwe ndetse ubirebye neza bwihariye kurusha ubwa Arsenal.

Itandukaniro ni uko amasezerano ya Arsenal agaragaza u Rwanda ku rwego rw’Isi yose ariko inyungu yayo ntihite igera ku muturage wo hasi ako kanya, mu gihe aya PSG akora ku buzima bw’umuhinzi wo mu Kitabi uri mu murima w’icyayi.

Umwe mu basesenguye aya masezerano waganiriye na IGIHE yagize ati “Aya Arsenal yagejeje u Rwanda ku rwego ruhambaye bidasanzwe, atandukanye n’aya, gusa icyiza kuri aya ni uko inyungu igera ku muntu ako kanya.”

Ibi bishingirwa ku kuba guhera umwaka utaha w’imikino, ubu bufatanye bw’u Rwanda na PSG, buteganya ko icyayi cy’u Rwanda n’ikawa aribyo byonyine bizajya bitangwa kuri Parc des Princes.

Ushinzwe itangazamakuru n’itumanaho mu Kigo cy’Igihugu gishinzwe guteza imbere ibyoherezwa mu mahanga bikomoka ku buhinzi n’ubworozi, NAEB, Pie Ntwari, yabwiye IGIHE ko aha abahinzi indi mpamvu yo kongera umusaruro.

Ati “Iyo tubonye isoko ryiyongera ku yo dufite biba ari byiza. Igishimishije ubu ni uko ari twe twenyine tuzaba twemerewe gucuruzamo [muri stade] icyayi n’ikawa. Twiteze ko amadevize yinjiraga aziyongera. Ikindi abahinzi babonye indi mpamvu yo kongera umusaruro n’ubwiza ku bwinshi. Twiteze isoko ridahungabana mu gihe cy’imyaka itatu.”

Hazabaho kandi icyumweru cy’imishinga y’abanyempano b’abanyarwanda n’Abafaransa. Icyo cyumweru cyiswe “Semaine du Rwanda à Paris” kizajya gitegurwa na PSG mu kumenyekanisha ibintu byose bikorerwa mu Rwanda.

Ibi byiyongera ku mikoranire hagati y’abakora mu ruganda rw’imideli izatangizwa mu mezi ari imbere.

Mu bijyanye no kuzamura impano z’u Rwanda, PSG izagira uruhare mu kuzamura abakiri bato binyuze mu gushinga ishuri ry’umupira w’amaguru i Kigali, aho iyi kipe izajya itegura imyitozo y’abatoza n’abakiri bato mu kubafasha kugira ubunararibonye bw’iyi kipe ikomeye ku mugabane w’u Burayi, by’umwihariko yanditse amateka mu Bufaransa.

Inkuru bifitanye isano: Paris Saint Germain yiyongereye kuri Arsenal mu kwamamaza Visit Rwanda

Perezida Kagame na Sheikh Tamim bin Hamad Al Thani ubwo bari bageze muri Pariki y'Akagera mu ruzinduko uyu muyobozi wa Qatar yakoze mu Rwanda mu ntangiriro z'uyu mwaka
Nasser Ghanim Al-Khelaifi ubwo yari amaze kwandika amateka agasinyisha muri PSG umukinnyi uhenze ku Isi, Neymar Jr
Umubano w'u Rwanda na Qatar wagize uruhare rukomeye mu biganiro byagejeje ku masezerano na PSG
Visit Rwanda ni umufatanyabikorwa wa PSG mu cyiciro cyitwa "Premium" kirimo izindi sosiyete zikomeye ku Isi nka Renault
Neymar na Mbappé bitezwe mu Rwanda binyuze muri ubu bufatanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza