Mu Majyepfo y’Iburasirazuba bwawo hari Akarere ka Tongzhou, gakomeje guhindura isura y’uyu mujyi.

Akarere ka Tongzhou gatazirwa umuryango w’iburasirazuba winjira i Beijing, dore ko kanakora ku muyoboro mugari w’amazi witwa ‘Grand Canal’.

Mu minsi ishize nasuye ibice bitandukanye by’aka karere. Mu byo nabonesheje amaso, nasanze iri terambere ryaho rishingiye ku nkingi eshatu ari zo, imiturire ijyanye n’icyerekezo, gusigasira amateka ndetse no guhanga udushya mu bumenyi n’ikoranabuhanga.

Uruzinduko rwanjye rwatangiriye ahari icyicaro gishya cy’ibiro by’umujyi wa Beijing [Beijing Municipal Administrative Center - BMAC]. Zimwe mu mpamvu zatumye ibi biro byimurirwa harimo guhuriza hamwe serivisi z’umujyi, zigashyirwa ahantu hamwe hitaruye hatandukanye n’ibindi bikorwa.

Imbere hari icyumba kigaragaza uko Beijing yagiye itera imbere uko ibihe byagendaga biha ibindi.

Nyuma yo kuva aho, nerekeje kuri wa muyoboro mugari w’amazi ‘Grand Canal’, kugira ngo menye amateka yawo. Twifashishije ubwato mu kuwuzenguruka mu gihe abashinzwe kuyobora abawusuye, na bo bari bari kutuganiriza amateka yawo.

Kuko nari mpagaze ku gice cyo hejuru y’ubwato, imbeho yari nyinshi cyane dore ko ntari nambaye nk’uwiteguye guhangana na yo. Ibi ariko ntacyo byari bimbwiye icyo gihe kuko intekerezo zanjye zari ziri ahandi.

Ibaze umuyoboro ufite uburebure bwa kilometero zirenga 1700 wubatswe n’abantu gusa. Uca mu mijyi ibiri minini n’intara enye, aho hose ugaca mu mijyi mito myinshi cyane.

Grand Canal yubatswe mu myaka irenga 2400 ishize. Ni wo muyoboro w’amazi muremure kuruta iyindi ku Isi. Akandi karusho ni uko wo ari karemano kuko wavuye mu bitekerezo n’ibikorwa bya muntu.

Uyu muyoboro wagiye wifashishwa cyane mu bikorwa by’ubuhahirane hagati y’imijyi itandukanye, gutwara imizigo n’ibindi.

Magingo aya mu gice cy’Amajyepfo urakifashishwa cyane mu gutwara imizigo, ariko uko imyaka yagiye ishira, Grand Canal yagiye ihinduka igikorwa gikurura ba mukerarugendo, ikanifashishwa mu yindi mishinga irimo kugaburira amazi inganda, ibikorwa by’ubuhinzi n’ibindi.

Nyuma y’igihe kigera ku isaha imwe, ubwato bwadusize ku rundi ruhande, dufata inzira itwerekeza ku isomero ry’akataraboneka ‘Beijing Library’.

Byari kuva mu bwiza ujya mu bundi, itandukaniro ni uko nari mvuye mu mateka ninjiye noneho mu guhanga udushya.

Ukiri mu ntera ya metero nka 20, utangira kubona imiterere idasanzwe y’inyubako y’iri somero. Ukinjiramo ubona imiterere yaryo imeze nk’ishusho y’umusozi.

Nasobanuriwe ko iyo miterere yatoranyijwe mu rwego rwo guhindura imiterere isanzweho y’amasomero no kugira ngo abazajya baba bari kurisomeramo batazajya bumva bari kure y’ibidukikije.

Nka kwakundi uba wifuza kujya ahantu hatuje, ukaba wajya nko mu busitani runaka ugasoma igitabo.

Iyo winjiye muri iri somero wumva winjiye mu Isi nshya. Rifite ibitabo birenga miliyoni umunani, birimo n’ibyanditswe na Perezida w’u Bushinwa, Xi Jinping.

Ku munsi usanzwe, iri somero ryakira abasomyi bagera ku bihumbi 10, mu mpera z’icyumweru umubare wabo ukikuba kabiri.

Nk’umuntu ukunda ikoranabuhanga, ikintu cyanyuze cyane ni uburyo ikoranabuhanga ryahawe intebe muri iri somero. Hifashishwa imashini zikoresha ubwenge bukorano [AI-powered robots] mu gupanga, gutunganya no gushyira ibitabo ahabugenewe.

Si ibyo gusa. Hari n’uburyo bwo gusoma igitabo hifashishijwe ikoranabuhanga ritandukanye ririmo VR, AR na 3D ku buryo usoma aba ameze nk’ugize inkuru ari gusoma. Ubu buryo buzwi nka [immersive digital reading experiences] mu rurimi rw’Icyongereza.

Iyo nza kugira umwanya uhagije, nari kumara umunsi wose niga uburyo ibi byose bikora.

Uretse ibi, Akarere ka Tongzhou kari guhinduka igicumbi cy’ikoranabuhanga rigezweho mu nganda, cyane cyane mu bijyanye n’ingufu zitangiza ibidukikije [new energy], ibijyanye n’imashini muntu [robotics], n’ibindi.

Aka karere gacumbikiye sosiyete zimaze gukomera muri izi nzego nka Colorfulead, Bor Ewin Technology Co. Ltd. ndetse na Wisson.

Ubwo umunsi wanjye mu Karere ka Tongzhou warangiraga, nasubije amaso inyuma ntekereza aho nanyuze hose nsanga ari ahantu hihariye. Ni akarere gakomeye ku mateka y’umujyi, gashyize imbere kurengera ibidukikije, kandi gafite ahazaza heza mu by’ikoranabuhanga.

Ushobora gusoma igitabo umeze nk'uri mu nkuru ibarwa muri cyo

Umugezi wa Grand Canal ugiye ufite ibiraro bitandukanye bihuza ibice binyuranye

Umugezi wa Grand Canal ugenda urimbishwa mu rwego rwo kurushaho kuryohereza ba mukerarugendo

Muri Beijing Libary, n'ikawa uyihabwa n'imashini muntu mu masegonda 70 gusa

Uko bwije n'uko bukeye hagenda hubakwa inyubako nshya

Muri iri somero harimo n'ibitabo byanditswe na Perezida w'u Bushinwa

Iyo utembera aka karere ubona ibikorwa byinshi bijyanye n'ibihe tugezemo ariko nanone ntusiba kubona ibiranga umuco gakondo w'Abashinwa

Ntushobora kurambirwa uri muri iri somero

Iyi ni imashini ya kimwe mu bigo bikorera muri aka karere, yifashishwa mu kongera umuriro mu modoka z'amashanyarazi. Nta muntu uba ukenewe wo kubikora

Iyi miterere ituma abaza gusomera muri iri somero bumva batari kure y'ibidukikije

Iri somero ryubatswe mu buryo bugezweho

Imiterere y'iri somero imeze nk'iy'umusozi

Intebe zo muri iri somero ni uko ziteye

Ikoranabuhanga ryo gusoma ibitabo ryashyizwemo

Imbere mu isomero ni uko hateye

Gahunda ihari ni uguhindura Tongzhou igicumbi cy'iterambere rizirikana ibidukikije

Ikizakubwira ko wageze muri Tongzhou ni inyubako ndende nyinshi

Grand Canal ni kimwe mu bikorwa byashyizwe mu murage w'Isi na UNESCO

Byinshi bigenda bihindurwa ariko hagasigazwa ibiranga umuco gakondo w'u Bushinwa

Buri munsi haba hari abaje gusura no gusobanukirwa amateka y'uyu muyoboro karemano

Akarere ka Tongzhou karangwa n'inyubako ndende zikorerwamo ibikorwa bitandukanye

Beijing Libary ni iwabo w'ibitabo birenga miliyoni umunani

Aka karere kandi ni iwabo w'inganda zikora ibijyanye n'imashini muntu [robotics]

Akarere ka Tongzhou gafite intumbero zo kubaka inyubako zigezweho ariko zirengera ibidukikije

Aha ni imbere y'isomero riteye ukwaryo rya 'Beijing Libary'

Aha ni mu marembo yinjira ku cyicaro gishya cy’ibiro by’umujyi wa Beijing [Beijing Municipal Administrative Center - BMAC]

Amafoto: Mugisha Christian