Guinée ni igihugu gihana imbibi na Côte d’Ivoire, Guinée-Bissau, Liberie, Mali, Sénégal na Sierra Leone. Uhageze utazi ka ‘Bonjour’ menya ko uza gutakara kuko umubare munini bavuga Igifaransa nk’ururimi mpuzamahanga mu gihe izindi ari indimi z’imbere mu gihugu utamenya neza ibyazo uvuye i Kigali.

Abanya-Conakry benshi bavuga Igi-Fula, uramenye ntubyitiranye na bimwe byo guterana ubuse hanyuma umuntu agahinduka Igifura [akarakara] ahubwo ururimi rwaho gakondo rwitwa Fula cyangwa se Fulfulde.

Utazi Igi-Fula ashobora kuvuga kandi Iki-Malinke. Zombi ni indimi zivugwa cyane muri Afurika y’Uburengerazuba.

Mu gi-fula hari amagambo ushobora kumva ukayasanisha n’amwe y’Ikinyarwanda. Urugero nk’isabune bayita ‘saabunnde’ ariko umwana bamwita ‘Suka’ nibabivuga rero ntuzagire ngo bavuze isuka yo guhinga imishike.

Ubukire muri uru rurimi ni ‘Ngalu’, ntabwo ari bimwe byo guteza ‘Ingalu’, inyama zo bazita Teewu. Umukobwa we bamwita ‘Surbaajo’ naho umusore bakamwita ‘Jokolle’.

Iyo ugiye gusuhuza umuntu uramubwira uti “Sannu”, ni nko mu Gifaransa kumwe bavuga ngo “Salut’ [Muraho] naho washaka kwikiriza ngo Yego ukavuga uti ‘Ee’. Ni utwo nabashije kumenya nawe nujyayo uzirwaneho!

Guinée iruta u Rwanda inshuro 9,3 kuko iri ku buso bwa kilometero kare 245,857 mu gihe abaturage bo bari hafi kungana kuko ho ari miliyoni 13,13 ngira ngo no mu Rwanda ni hafi aho.

Igihugu ubwacyo cyitwa Guinée ariko akenshi bakunda kukivuha bashyizeho izina ry’Umurwa Mukuru wacyo mu kugitandukanya n’ibituranyi byacyo byitiranwa. Ibyo ni Guinée Equatoriale na Guinée-Bissau.

Kiza mu bihugu bifite ubukene ariko ntukine nacyo kuko kirakize ku mutungo kamere, kizira ibibazo bike cyane byiganjemo umutekano muke.

Ibirombe bya zahabu, iby’amabuye ya Bauxite, ubutare na diamant ubisanga ku bwinshi hirya no hino ariko ntibikibuza gukena. Wagira ngo gutunga ubu butunzi bijyana n’umuvumo.

Nuramuka ugiye muri iki gihugu, uzihangane ubaririze bakujyane mu ishyamba rya Nimba. Ni rimwe mu riri mu murage w’Isi wa UNESCO, igice kimwe cyaryo kiri muri Côte d’Ivoire.

Ririmo amoko menshi y’ibiti udashobora kubona ahandi ku Isi cyo kimwe n’inyamaswa ziganjemo ibikururanda. Igitangaje ni uko abashakashatsi benshi bataramenya neza ibinyabuzima byose biba muri iryo shyamba.

Muri Guinée, igisirikare ni ubuzima. Biragoye ko mu bantu 10 mwaba muri kumwe waburamo umusirikare cyangwa se uwifuza kukijyamo cyangwa uwakibayemo.

Kubera ibibazo by’umutekano muke, abana bakura bifuza kujya kuzacungura imiryango yabo, bakayirinda bityo bagashaka kuba abasirikare.

Ni no mu gihe erega kuko ubaye umusirikare hariya, aba yizeye gusezera ubukene n’imibereho mibi kuko atangira kwiyegurira ibirombe bya zahabu nta nkomyi.

Muri iki gihe ugeze i Conakry rwagati mu masango y’imihanda ya Pont 8 Novembre, ubona abasirikare bahishe mu maso boshye za Ninja tujya tubona muri filimi. Kuva Alpha Condé yahirikwa ku butegetsi n’abari abasirikare be, ibintu byahinduye isura. Ubu umutekano warakajijwe.

Ikindi kintu ukwiriye kumenya kuri iki gihugu ni uko abantu baho bayoboka. Kiri mu bihugu bifite umubare munini w’abaturage batazi gusoma no kwandika, kuko mu 2017, mu bakuze abari babizi bari 41%.

Bituma umuntu wese ubijeje ikintu runaka bahita bamuyoboka. Iyo uganiriye n’abaturage muri iki gihe nyuma y’amezi make Mamady Doumbouya afashe ubutegetsi uba wumva bamwe bafite ingingimira kandi ngo si ko byari bimeze ubwo yahirikaga Condé.

Guiluxe, ni inzoga inyobwa cyane i Conakry. Ifatwa nk'ikirango cy'igihugu

Ifi n’umuceri ni byo biryo, mu gihe ujya kuvunjisha ugacyura igikapu cyuzuye

Muri Guinée bakoresha ‘amafaranga’. Umuntu ufite 1000 Frw mu mafaranga yo muri kiriya gihugu aba afite hafi ibihumbi 10. Ni yo mpamvu ibiryo bigura umuba.

Ibyaguhaza ukumva mu nda hajemo akayaga kandi wariye ifunguro rwose rifite intungamubiri, waryishyura nk’ibihumbi 150 byaho, ubwo ni ibihumbi nka 15 Frw.

Akenshi abantu baho bakunda kurya umuceli, ifi, ibirayi n’umuceli hanyuma bakarenzaho inzoga ifatwa nk’ikirango cy’igihugu yitwa Guiluxe [La Guinéenne de Luxe]. Ku icupa ryayo handitseho ko ari inzoga y’igihugu.

Kugira ngo ubyumve neza, ama-euro 100 iyo ugiye kuyavunjisha uyacyura mu ishashi yuzuye utwayemo miliyoni 1,2. Urumva ko muri kiriya gihugu gutunga miliyoni atari nka bimwe byacu ukubita umutwe hasi!!! Hahah.

Ibintu byose mu mujyi birahenze, ingendo rusange zikorwa kuri moto ariko ntuzasabe casque cyangwa se agatambaro. Ni wumva udafite umutekano wo kuyigendaho, uzatege taxis ishaje uzabona hafi y’umuhanda iri mu ibara ry’umuhondo.

Urebeye Conakry hejuru ukuntu ari umujyi mwiza ukikije inyanja ya Atlantique uba ubona hasa neza, ariko iyo ugeze hasi ubona ibitandukanye kuko isuku ntirafata.

Abaturage baho bakunda ikawa n’icyayi cyane ku buryo haba hari abantu bacuruza ku ngorofani icyayi n’imigati. Hari ubwo ujya kubona nk’umukire asohotse mu modoka y’igikonyozi, akambuka umuhanda agahagarara munsi y’umutaka akanywa ka kawa ubundi agakomeza urugendo.

Ni igihugu gishyuha cyane ku buryo unasanga no mu muhanda abantu benshi bambaye inkweto zifunguye kubera kwirinda ubushyuhe bukabije buba buhari.

Ubucuruzi bwo ku muhanda nabwo ni uko, ushobora kwigondera climatiseur ni umwe ku ijana bigatuma rero abantu bahitamo gukora imirimo yabo hanze mu mutaka.

Hotel zaho zirahenze cyane kuko nk’icyumba ushobora kubona ku mafaranga 30 Frw i Kigali ho nibura wakwishyura ibihumbi 80 Frw.

Urugero nka Onomo Hotel yaho, icyumba ni miliyoni 1,5 [nk’ibihumbi 150 Frw], ubwo ariko ari mu Rwanda wacyishyura nk’ibihumbi 80 Frw cyangwa ibihumbi 100 Frw.

Muraza kwihangana, amafoto menshi muza kubona muri iyi nkuru afatiye mu kirere hifashishijwe drone, kuko umuntu ashobora kukubona ufite camera akayigukubitana!

Umubare munini w’abaturage ni Abayisilamu. Ni mu gihe amazina nka Bally, Doumbouya na Sow yiganje. Mu bantu 10 ntiwaburamo umwe witwa atyo! Ubwo nawe ushake akawe muri ayo atatu. Weekend nziza!

Utuntu nk'utu tujya tubaho mu muhanda kuko haboneka imodoka nyinshi zishaje

Aha ni mu gace kitwa Dixinn, kari rwagati mu Mujyi wa Conakry

Moto nta casque zigira yaba iy'umugenzi cyangwa se umumotari. Uyicaraho witeguye kwirengera ingaruka zose zabaho

Umubare munini w'abaturage bagaragara mu Murwa Mukuru ni abantu bakora ubucuruzi buciriritse

Imizigo itwarwa muri ubu buryo...bene izi modoka ni ikimenyabose mu Burengerazuba bwa Afurika

Ni inde wavuze ko ivatiri idashobora gupakira ibintu hejuru?

Ubucuruzi bw'icyayi n'ikawa ni umurimo ukorwa cyane mu mujyi kuko utagenda metero ijana utabonye umuntu uri gucuruza ku ngorofani

Imisigiti iboneka mu mfuruka zose z'igihugu kuko abaturage benshi ari abayisilamu

Bembeya ni agace gakunda gutembererwamo n'abantu bifite

Monument du 22 Novembre 1970, ni ahantu hazwi cyane mu Mujyi kuko hashushanya amateka y'ugutsindwa kw'Abanya-Portugal bashakaga guhirika ubutegetsi mu 1970

Abashinzwe umutekano baboneka hirya no hino gusa ntaho batandukanye n'abaturage basanzwe

Abantu benshi bahitamo gucururiza mu muhanda kurusha kujya mu nzu kuko kubona amafaranga y'ubukode bisaba umugabo bigasiba undi

Ntabwo umuco wo kwimakaza isuku urafata ku rwego rugaragara mu bihugu byo muri Afurika y'Iburengerazuba

Aha ni Mujyi rwagati ntabwo ari mu nkengero...

Uyu mugabo yavuye mu modoka ajya kubanza kunywa icyayi mbere yo gukomeza urugendo

Imodoka nyinshi zikora Taxis zishaje ku kigero kitaboneka mu Rwanda

Salon de Coiffure iri munsi y'igiti hari ahandi wayibonye? I Conakry zihari ku bwinshi

Abazunguzayi ubabona hirya no hino mu Mujyi

Aha ni ahantu abantu bakunda kunywera ikawa n'icyayi. Abantu b'ingeri zose baba bahari

Iyo umaze kuvunjisha amadolari 100, baguha umuba w'amafaranga bakayagupfunyikira mu ishashi

Iyi ni imwe muri restaurant zikomeye mu Mujyi ushobora gusangamo amafunguro meza wifuza

Moto ni uburyo bworoshye bwo gutwara abantu i Conakry

Ahantu hose abamotari bashaka abagenzi mu buryo bumwe

Icyayi bagicuruza ku ngorofani hirya no hino mu Mujyi

Polisi yo mu muhanda yambara imipira y'ubururu

Iyo byanze umutera akantu ubundi ugakomeza urugendo...ho bisa n'aho kemewe

Onomo Hotel ni imwe mu zikomeye zibarizwa i Conakry

Umujyi wa Conakry ukikijwe n'Inyanja ya Atlantique

Iburyo n'ibumoso ni inyanja

Aya masangano y'imihanda afatwa nk'ikirango cy'umujyi. Aha bahita Pont du 8 Novembre

Umujyi uwurebeye hejuru ubona imiturirwa mike isa neza ariko hasi ni ibindi bindi

Marché Madina, ni isoko rizwi cyane i Conakry ushobora kubona ibintu byose ukeneye

Aha hitwa Kilometre 36, ni ahantu haba akavuyo ko ku rwego rwo hejuru i Conakry

Le Palme ni yo hotel ikunda gucumbikira abakuru b'ibihugu basura iki gihugu

Aha hitwa Matoto, ni agace gakunda kugaragaramo abantu b'amikoro make

Aka gace kitwa Kipe kari mu mujyi rwagati

Camayenne ni ko gace gaturwamo n'abifite hamwe n'abayobozi bakuru

Uyu muhanda uri ahantu hitwa Lansanya, ni ho uhuza igihugu cyose. Wawunyuramo ukagera mu byerekezo byose

Amafoto: Himbaza Pacifique