Mbatembereze i Strasbourg, Umujyi ubumbatiye amateka y’Abafaransa n’Abadage (Amafoto)

Yanditswe na Karirima A. Ngarambe
Kuya 31 Mutarama 2020 saa 03:26
Yasuwe :
0 0

Strasbourg ni umwe mu Mijyi y’u Bufaransa ibumbatiye amateka menshi, ndetse iryoheye ubukerarugendo. Ku muntu ukunda gutembera agenda n’amaguru cyangwa n’igare, ni hamwe mu hantu wakwishimira.

Ni umujyi uhana imbibi n’u Budage ndetse ubitse amateka menshi hagati y’ibi bihugu byombi, uherereye mu gace ka Alsace. Ntabwo ari umujyi utuwe cyane kuko uri ku buso bwa kilometero kare 7826, ibarura ryo mu 2017 rigaragaza ko wari utuwe n’abaturage 280966.

Ufatwa nk’Umurwa Mukuru w’u Burayi kubera ko ariwo ubarizwamo ibikorwa by’inama y’ubujyanama bw’u Burayi, Urukiko rw’u Burayi rw’uburenganzira bwa muntu, Inteko Ishinga Amategeko y’u Burayi n’ibindi.

Ni umujyi kandi ubarizwamo ibikorwa byinshi bibungabungwa na UNESCO nk’umutungo kamere w’Isi. Muri ibyo harimo nka Cathédrale Notre-Dame de Strasbourg n’agace gakundwa na ba mukerarugendo kazwi kitwa Petite France.

Ni agace karimo imigezi myinshi ndetse mu myaka yo hambere kakundaga kubamo abarobyi cyane, magingo aya ni ko gace gasurwa cyane muri Strasbourg yose.

Imiterere yako igaragaza imyubakire yo mu Bufaransa kera mu kinyejana cya 17 ari nayo mpamvu UNESCO yahisemo kugashyira mu duce tubungabunzwe kubera amateka yako.

Naho Cathédrale Notre-Dame de Strasbourg igizwe n’inyubako zigaragaza amateka ya kera y’Abaromani, ndetse igaragazwa nk’urugero rwiza rwo kwerekana amateka yo hambere dore ko mu myaka ya 1647 na 1874 yabaye inzu ya mbere ndende ku Isi, ireshya na metero 142.

Uyu munsi ni kiliziya iri mu nsengero esheshatu ndende mu mateka y’Isi ndetse yihariye agahigo ko kuba ariyo ya mbere ndende mu mateka y’Isi yubatswe hagati y’ikinyejana cya Gatanu n’icya 15.

Umusizi Victor Hugo n’umudage Goethe nawe wari umwanditsi, bakunze kuyigereranya n’igiti cy’Imana bashaka kuvuga uburebure bwayo. Bitewe n’uko iteye, ahantu hose hari umusozi muri uyu mujyi, iyo uwugiyeho bituma umuntu abasha kuyibona neza

Ku bantu bakunda gutembera bihera amaso ibyiza bitatse Isi, ni umujyi mwiza cyane. Mu 2009 ubwo habaga inama ya NATO, Barack Obama na Chancelier w’u Budage, Angela Merkel, bakoze urugendo rw’amateka n’amaguru, bava Strasbourg bagera mu Kehl banyuze ku kiraro cya Passerelle des Deux Rives cyubatswe mu 2004 nk’ikimenyetso cy’ubumwe mu Burayi. Nta passport bisaba ku muntu ushaka gukora uru rugendo nk’urwabo, ugera mu Budage mu gace ka Rhine.

Alsace agace ka Strasbourg kazwi ho kugira umuvinyo uryoheye ijigo ndetse n’inzoga nyinshi zituruka mu baturanyi b’Abadage. Mu masaha y’ijoro usanga hafi ya Notre-Dame hari abantu benshi bari ku gacupa bungurana ibitekerezo,

Umujyi wa Strasbourg guhera mu 2008 uyoborwa na Roland Ries nyuma yo kuba Umwarimu muri Kaminuza ya Strasbourg n’Umusenateri muri aka Karere imyaka icyenda.

Iyi ni inyubako ikoreramo Ibiro bikuru by’Inama y’Ubujyanama bw’u Burayi izwi nka Conseil de l’Europe
Uyu ni umuhanda ugana hanze y'Umujyi muri Strasbourg
Amabendera y’Ibihugu bigize Umuryango w’ubumwe bw’u Burayi uyasanga ku nyubako ya Conseil de l’Europe
Rugero Semuhungu Kevin ni umwe mu basore b'abanyarwanda batuye mu Mujyi wa Strasbourg wadufashije kumenya ibice nyaburanga byawo
Ibi ni ibiro bikuru by’ubucuruzi n’inganda biherereye ahitwa place Gutenberg, ni hafi y’u Budage
Ahantu henshi hakoreshwa Tram mu ngendo…
Appartement zo muri uyu mujyi ni uku ziteye
Imwe mu nyubako zituwemwo na benshi bakorera muri uyu mujyi
Usanga abantu benshi bagenda n’amaguru muri uyu mujyi no mu nkengero zawo
Kimwe n’ahandi mu Burayi, mu mujyi wa Strasbourg uhasanga imihanda myinshi migari
Ibikorwa by’ubwubatsi bigamije kwagura umujyi bikorwa umunsi ku wundi
Uyu mujyi ukikijwe n’amazi…
Inzu zubatswe kera zirabungabungwa umunsi ku wundi
Iyo winjiye muri uyu mujyi, usanganirwa n'inzu ziteye muri ubu buryo zituwemo
Muri aka gace niho haherereye Radio na Televiziyo ya Strasbourg
Aka gace bakita Petite France gakundwa na ba mukerarugendo. Aha haba agakawa kajya kuyingayinga ak'i Rwanda
Muri ibi bihe, hari ubukonje bwinshi ni yo mpamvu abantu baba bifubitse hose
Ku mihanda imwe n'imwe ubona ko ari umujyi wihariye ku mateka
Hari inganda zitandukanye zicuruza ibikoresho bigezweho birimo n'imodoka
Hari n'abantu bifashisha ubwato mu bikorwa byabo by'ubwikorezi kimwe n'abashaka gutembera
Abashinzwe umutekano baba bari hose mu mujyi
Iyo uhagaze imbere ya Cathédrale Notre-Dame de Strasbourg uba ubona hejuru umunara wayo
Ifoto ya mu gitondo izuba ritararasa urebera Umujyi wa Strasbourg hejuru ya Cathédrale Notre-Dame
Ubwato butwara ba mukerarugendo bazenguruka uyu mujyi
Iyi Cathédrale ni imwe mu bikurura ba mukerarugendo benshi basura uyu mujyi
Inzira ucamo uzamuka cyangwa umanuka umunara wa Cathédrale de Strasbourg. Kuzamuka muri uyu munara wishyura ibihumbi 80 Frw
Iyo uri hejuru kuri Cathédrale Notre-Dame hari utwuma dufasha kureba neza buri nzu nku muntu uyiri hafi
Amagare akoreshwa cyane muri uyu mujyi kimwe n’ahandi hose mu Burayi
Aho bategera Gari ya moshi ihuza uyu mujyi n'indi ndetse n'ibihugu bituranye na Strasbourg
Aho bahahira bimwe mu biribwa n'ibindi bikenerwa hafi mu ngo zo mu mujyi
Inzu zo muri uyu mujyi inyinshi ni izo hambere
Ku Cyumweru imodoka ziba ari nke mu muhanda
Umwanditsi Karirima A. Ngarambe ubwo yari hejuru ya Cathédrale Notre-Dame de Strasbourg

Amafoto: Karirima A. Ngarambe


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .