Ni ku nshuro ya mbere iyi kompanyi ikoreye urugendo mu Rwanda, gusa byitezwe ko izi ngendo zizakomeza kujya zikorwa buri Cyumweru.

Mu Ugushyingo, iyi sosiyete yari yatangaje ko izatangira gukora ingendo rimwe mu cyumweru uhereye kuri uyu wa Kane tariki ya 26 Ugushyingo, aho ikiguzi cyo kugera i Kigali uvuye muri Israel ari amadolari 399, ni ukuvuga hafi ibihumbi 400 Frw.

Saa Munani nibwo iyi ndege yageze i Kigali itwaye ba mukerarugendo bari bakandagiye ku butaka bw’u Rwanda ku nshuro yabo ya mbere, ibyishimo byari byose ku bari bayirimo muri uru rugendo rwanditse amateka.

Abageze mu Rwanda, bagaragaje ko gusura u Rwanda ari ukwifatanya narwo nk’ibihugu byombi bihuje amateka, kandi banyotewe no kubona ibyiza birutatse.

RwandAir yari isanzwe ikorera ingendo mu Mujyi wa Tel Aviv muri Israel gusa zahagaritswe kubera icyorezo cya Coronavirus, ndetse ntiharatangazwa itariki zizasubukurirwa.

Bivugwa ko iyi ndege ya Israel mu cyumweru gitaha nabwo izongera gukorera urugendo mu Rwanda, kuri iyo nshuro izaba itwaye ba mukerarugendo barenga 100.

Iyi ndege ubwo yageraga i Kigali yahawe ikaze isukwaho amazi

Ni ku nshuro ya mbere Israir ikoze urugendo ku butaka bw'u Rwanda

Aba bagenzi bageze i Kigali saa Munani z'amanywa kuri uyu wa Kane

Urugendo ruva muri Israel rugana i Kigali muri iyi ndege ni amadolari 399, ruzajya rukorwa inshuro imwe mu cyumweru

Ibyishimo byari byose kuri ba mukerarugendo bo muri Israel ubwo bageraga i Kigali

Akanyamuneza kari kose ku maso yabo ubwo bageraga i Kanombe

Banyotewe no gutembera mu bice bitandukanye nyaburanga by'u Rwanda

Bizeye ko bazabonera ibyishimo mu Rwanda mu minsi bazahamara

Kanda hano urebe andi mafoto

Amafoto: Igirubuntu Darcy