00:00:00 IGIHE NETWORK KN KINYARWANDA EN ENGLISH FR FRANCAIS

Intambwe yo kuzahura ubukerarugendo bw’u Rwanda bwashegeshwe na Covid-19

Yanditswe na Cyprien Niyomwungeri
Kuya 8 May 2022 saa 07:37
Yasuwe :

Ubukerarugendo ni rumwe mu nzego zifite uruhare runini mu bukungu bw’u Rwanda zashegeshwe cyane n’icyorezo cya Covid-19, ku buryo umuvuduko uru rwego rwazamukanaga bisaba imbaraga zidasanzwe mu kurusubizaho, nubwo imibare itandukanye igaragaza ko hari icyizere.

Kuva icyorezo cya Covid-19 cyakwaduka, ubukerarugendo bwarahagaza bitewe n’ingamba zo kwirinda ikwirakwira ryacyo, aho kuva muri Werurwe 2020, hashyizweho amabwiriza akumira ibikorwa bihuza imbaga birimo n’iby’ubukerarugendo.

Ntabwo byari byoroshye kubona mu gihugu nta bantu bemerewe guhurira hamwe, bisobanuye ko inama n’ibikorwa bihuza abantu benshi bitashobokaga, gusura amapariki n’ibindi bintu nyaburanga ntibyari byemewe, ku buryo ubukerarugendo bwari mu bwigunge.

Nyuma y’amezi asaga atanu nta bikorwa by’ubukerarugendo n’inama zari ziteganyijwe zose zarasubitswe, byongeye gufungurwa buhoro buhoro ku muvuduko muto cyane. Ibi byongereye akanyamuneza muri uru rwego rutunze abatari bake.

Guhera muri Kamena 2020 ubukerarugendo bw’imbere mu gihugu bwarasubukuwe, muri Kanama ingendo z’indege zitwara abagenzi zihabwa ikaze mu Rwanda, nyuma yo gushyiraho amabwiriza yo kwirinda icyorezo cya Covid-19 ku bakora ingendo.

Ni amabwiriza yarimo ko abinjira mu gihugu bagomba kwishyurira ku Kibuga cy’Indege amafaranga y’ibipimo bya PCR bafatwa bakihagera na nyuma y’iminsi itatu. Hari kandi kujya mu kato k’amasaha 24 muri hoteli bakigera mu gihugu kandi bakiyishyurira serivisi bahabwa zose.

Abasura Pariki z’Igihugu ubariyemo n’abana barengeje imyaka itanu bagomba kwipimisha COVID-19 mu masaha 24. Abasura inguge muri Pariki za Nyungwe, Gishwati-Mukura n’iy’Ibirunga bo bashyiriweho umwihariko wo kwipimisha bakoresheje PCR.

Ibitaramo, imikino n’ibindi birori byagiye bifungurwa gahoro gahoro, bituma ubuzima bw’ubukerarugendo bwongera kuzahuka.

Imibare y’Urwego rw’Igihugu rw’Iterambere (RDB), yerekana ko umusaruro w’ubukerarugendo wiyongereyeho 25 ku ijana uva kuri miliyoni 131 z’amadolari mu 2020 ugera kuri miliyoni 164 z’amadolari mu 2021.

Iyi mibare yerekana neza uburyo Covid-19, yazonze ubukerarugendo kuko nko mu 2019, bwinjirije u Rwanda miliyoni zirenga 500$, ziramanuka zigera kuri miliyoni 131$ mu 2020.

Icyiciro cyo kwakira inama, imikino n’ibikorwa bitandukanye (MICE) cyinjije miliyoni 12.5 z’amadolari mu 2021 ugereranyije na miliyoni 5.4 z’amadolari zinjiye mu 2020.

Ibikorwa by’imikino byagize uruhare mu kuzamura umubare w’abagenzi binjira mu gihugu kuko wiyongereyeho 2,8% mu 2021 uva kuri 490.000 binjiye mu gihugu mu 2020 ugera ku 512.000.

Ibi byaturutse ku kuba u Rwanda rwarakiriye amarushanwa arimo Basketball Africa League (BAL), Igikombe cya Afurika cya Volleyball mu bagabo n’abagore n’imikino nyafurika muri Basketball, FIBA AfroBasket 2021.

Kuzahura uru rwego, byaturutse ku ngamba za Guverinoma y’u Rwanda binyuze mu Kigega Nzahurabukungu cyashyizwemo Miliyoni 100$ ku ikubitiro, icya kabiri cyayo agenerwa urwego rwo kwakira abantu n’ubukerarugendo. Iki kigega ubu cyagejejwe kuri miliyari 350Frw.

Gahunda yo kwamamaza ubukerarugendo bw’u Rwanda binyuze muri gahunda ya Visit Rwanda yatanze umusaruro aho ikipe ya Arsenal FC yo mu Bwongereza na PSG yo mu Bufaransa zibwamamaza binyuze mu masezerano zifitanye n’igihugu.

Vuba aha abakinnyi bakomeye mu ikipe ya Paris Saint Germain barimo Sergio Ramos, Keylor Navas, Thilo Kehrer na Julian Draxler basuye Pariki zitandukanye z’u Rwanda bishimira ibyiza n’ibinyabuzima biri muri izo Pariki.

U Rwanda rwiyemeje kwihutisha umubare w’abahabwa inkingo, kuva muri Werurwe 2021, abantu 9,013,031 bamaze guhabwa doze ya mbere y’urukingo rwa Covid-19, abagera kuri 8,427,702 bamaze guhabwa doze zombi naho abahawe iyishimangira ni 4,276,432.

Ntawashidikanya ko urwego rw’ubukerarugendo ruzakomeza kuzamuka kuko hari amahoteli menshi akomeje kubakwa no kujya ku rwego rushimishije, inama zikomeye igihugu cyakira zirangajwe imbere n’iyizatangira kuwa 20-26 Kamena 2022 y’abakuru b’ibihugu na za guverinoma za Commonwealth, CHOGM.

Abakuru b’ibihugu na za Guverinoma b’ibihugu 54 bigize Commonwealth bazakoranira muri iyi nama idasanzwe, itegerejwe imyaka ine kuko iheruka yabaye mu 2018.

Byitezwe ko nibura abantu basaga 5000 bazaba bari i Kigali baturutse mu mahanga, ku buryo bazakenera aho kurara, amafunguro, gusura ibice bitandukanye by’igihugu n’ibindi.

Kugeza ubu urubuga rw’ikigo gishinzwe guteza imbere ubukerarugendo bushingiye ku nama (Rwanda Convention Bureau), rugaragaza ko kuva muri Gicurasi kugeza mu Ukuboza 2022, u Rwanda ruzakira inama n’ibikorwa 55 birimo inama ya CHOGM n’irushanwa rya Basketball (BAL) rizaba kuwa 21-28 Gicurasi 2022,

Ibi biraca amarenga ko uyu mwaka ushobora kuba mwiza kuko urebye ubukerarugendo bwa pariki n’inama nibwo bumaze gutera imbere mu Rwanda ndetse bufite uruhare runini mu mafaranga yinjizwa buri mwaka. Urugero nko mu 2018 u Rwanda rwakiriye inama zisaga 200 zinjije miliyoni 52 z’amadolari.

Umuyobozi Mukuru wa RDB, Clare Akamanzi, aherutse gusaba abanyamahoteli kwitegura gukomeza gutanga serivisi nziza mu gihe COVID-19 izagenza make.

Ati “Ni byiza kubasangiza imishinga migari ku buryo mu 2022 ubwo twizera ko tuzaba turi kwigobotora COVID-19, tuzabe dufite urwego rw’ubukerarugendo rwihagazeho mu Rwanda.’’

Uru rwego rukeneye kwiyubaka cyane rugasubira ku rwego rwahozeho kuko nko mu 2019, ubukerarugendo bwinjirije u Rwanda miliyoni zirenga 500$, zivuye kuri miliyoni 300$ mu 2014. Muri icyo gihe kandi imirimo bwatanze yavuye ku bihumbi 89 igera ku 164.000.

Mu 2017, ubukerarugendo bw’u Rwanda bwinjije miliyoni zigera kuri 438 z’amadolari avuye kuri miliyoni 227 z’amadolari ya Amerika mu 2011.

Bisate Lodge yubatswe mu buryo bukurura abanyamahanga bahasura
One Only Nyungwe House ifite ubwiza budasanzwe
Kimwe mu bizafasha u Rwanda kuzamura urwego rw'ubukerarugendo ni ukubaka hoteli nziza ziri ku rwego mpuzamahanga
Ingagi zo mu Birunga zikurura ba mukerarugendo benshi bazisura bagasiga amadevize mu Rwanda
Pariki y'Akagera irimo inyamaswa nyinshi zikurura abakerarugendo
Inzovu ni imwe mu nyamaswa nini zikurura abakerarugendo cyane
Ikiraro cyo mu kirere kiri muri pariki ya Nyungwe kizihira abagisura
Marriot Hotel Kigali ni imwe muri hoteli mpuzamahanga ziri ku rwego rw'inyenyeri eshanu
Ushaka gutembera mu mazi urabibona mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .