Imiterere ya Mantis Kivu Queen, ubwato bw’akataroneka buzajya bukoreshwa nka hotel (Amafoto)

Yanditswe na Umwali Zhuri
Kuya 10 Nzeri 2020 saa 03:46
Yasuwe :
0 0

Umwaka utaha, umuntu wifite ku mufuka azaba ashobora kuruhuka mu bundi buryo! Kumara ijoro aryamye hejuru y’amazi mu Kiyaga cya Kivu mu bwato bw’akataraboneka buzaba bukora nka hotel.

Ubu bwato ni kimwe mu bikorwa bishya bitegerejwe mu rwego rw’ubukerarugendo mu Rwanda, buzashyirwa ku Kibuye mu Kiyaga cya Kivu.

Bwiswe Mantis Kivu Queen Uburanga, buzakora nka hotel, bufite ibyumba (cabin) icumi harimo kimwe gishobora kwakira abantu bo ku rwego rw’abakuru b’ibihugu n’ikindi cy’abanyacyubahiro basanzwe.

Buri kubakwa na sosiyete yo muri Afurika y’Epfo yitwa AfriNest, mu gihe Mantis izobereye mu byo gucunga amahoteli ariyo izajya igenzura imikorere yabwo umunsi ku wundi.

Buri cyumba kizaba kirimo ikintu cyose nkenerwa nko muri hotel, ni ukuvuga ubwiherero n’ubwogero, televiziyo, ibyuma bitanga ubushyuhe n’ubukonje n’ikindi cyose umuntu yakenerera mu cyumba ashaka kuruhukiramo.

Uhagarariye ibikorwa bya Mantis mu Rwanda, Dino Urbani, yabwiye IGIHE ko mu byumweru bibiri ibikoresho byose bizakoreshwa mu guteranya ubu bwato bizaba byageze mu Rwanda ku buryo umwaka utaha buzafungurwa bitarenze Mata.

Ati “[Gufungura ibikorwa] Bishobora kuba mu gihembwe cya mbere cy’umwaka utaha, mu mpera zacyo.”

Ntabwo haratangazwa ingano y’amafaranga azakoreshwa mu kubaka ubu bwato kimwe n’igiciro cyo kuraramo nko ku ijoro, gusa amakuru IGIHE yabonye ni uko gishobora kuzarenga amadolari igihumbi (hafi miliyoni y’amafaranga y’u Rwanda), ni ukuvuga igiciro cy’ibyo umuntu akanera byose ubariyemo n’aho yaraye.

Dino yakomeje agira ati “Ibice bigize ubwato biri kuzanwa mu Rwanda bivuye muri Afurika y’Epfo, mu byumweru bibiri bimwe bizaba bihari, hanyuma dutangire kubiteranyiriza ku Kibuye. Ubu ibikoresho bimwe byageze mu Rwanda, ibindi biracyari mu nzira.”

Mu mishinga iri imbere ni uko ahazashyirwa ubu bwato hafi yaho hazashyirwa hotel y’akataraboneka izwi twa aMahoro.

Mantis izagenzura ubu bwato, isanzwe ifite hotel mu Rwanda mu Karere ka Rusizi nayo yo ku rwego rwo hejuru. Yitwa Mantis Kivu Marina Bay, ifite ibyumba 79 birimo kimwe gishobora kwakira nk’Umukuru w’Igihugu.

Buzaba bufite ibyumba (cabin) icumi, byitezwe ko nta na kimwe kizajya munsi y'amadolari 1000 ku ijoro rimwe
Ubu bwato buzaba bumeze nka hotel yo ku rwego rwo hejuru
Ikiyaga cya Kivu ni kimwe mu bikurura ba mukerarugendo benshi mu Ntara y'Uburengerazuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .