00:00:00 IGIHE NETWORK KN KINYARWANDA EN ENGLISH FR FRANCAIS

Ihanzwe amaso: Imishinga migari yitezweho kuzahura ubukerarugendo

Yanditswe na Ishimwe Israel
Kuya 4 Kamena 2021 saa 07:07
Yasuwe :
0 0

Mbere y’uko u Rwanda rwinjirirwa n’icyorezo cya COVID-19, ubukerarugendo buri mu nzego zari zihetse ubukungu bwarwo. Mu 2019, bwari bwihariye 10% by’umusaruro mbumbe w’igihugu wari miliyari 2152 Frw.

Uruhare rw’ubukerarugendo mu bukungu runagaragarira mu ngano y’amadevise bwinjiza n’imirimo butanga. Dufashe urugero, mu 2019, ubukerarugendo bwinjirije u Rwanda miliyoni zirenga 500$, zivuye kuri miliyoni 300$ mu 2014. Muri icyo gihe kandi imirimo bwatanze yavuye ku bihumbi 89 igera ku 164.000.

Uru rwego rwazamukanaga ingoga rwakomwe mu nkokora n’ingamba zo kwirinda ikwirakwira rya Coronavirus, aho kuva muri Werurwe 2020, hashyizweho amabwiriza akumira ibikorwa bihuza imbaga birimo n’iby’ubukerarugendo.

Nyuma y’amezi asaga atanu nta bikorwa by’ubukerarugendo n’inama zari ziteganyijwe zose zarahagaritswe, byongeye gufungurwa buhoro buhoro.

Icyo gihe hashyizweho Ikigega Nzahurabukungu kizagoboka ubucuruzi bwazahajwe na Coronavirus; cyahaye umwihariko amahoteli n’ubukerarugendo mu kubifasha gusubukura ibikorwa no guhemba abakozi.

Iki kigega cyatangijwe ku wa 8 Kamena 2020, ku ikubitiro cyashyizwemo miliyoni 100$, akabakaba miliyari 95 Frw mu gihe mu myaka ine kizashorwamo arenga miliyoni $200. Amahoteli yahawe miliyari 50 Frw ndetse hari icyizere cyo kongera kuzahuka mu mikorere.

Imishinga migari ihanzwe amaso mu kuzahura ubukerarugendo

Nubwo inama zihuza abantu benshi n’ibindi bikorwa by’ubukerarugendo bitarasubukurwa neza, ibimenyetso by’ibihe byerekana ko hari icyizere ko bigiye gusubira mu buryo.

Mu kurushaho kwitegura kuzahura ubukerarugendo Coronavirus nicogora, hari imishinga migari yitezwe. Yakomojweho ubwo hatangazwaga inyenyeri kuri hoteli zo mu Rwanda, ku wa 21 Gicurasi 2021.

Umuyobozi Mukuru w’Urwego rw’Igihugu rw’Iterambere (RDB), Clare Akamanzi, yasangije abanyamahoteli n’abakora mu bukerarugendo imishinga Leta yatekerejeho mu gukurura abarugana.

-  Ubukerarugendo bushingiye kuri siporo

Kuva Coronavirus igeze mu Rwanda, igihugu cyakiriye ibikorwa bya siporo birimo Isiganwa rizenguruka Igihugu ku Magare, Tour du Rwanda n’Irushanwa rya Basketball Africa League (BAL) kandi byagenze neza n’amahanga aranyurwa.

U Rwanda kandi rwiteguye kwakira imikino ya nyuma y’Irushanwa ry’Igikombe cya Afurika cya 2021 muri Basketball ‘Afrobasket 2021’.

Akamanzi yavuze ko hari igikorwa cya siporo kizabera mu Rwanda kizitabirwa n’abarenga 1500 mu mwaka utaha.

Yavuze ko mu mishinga RDB ihanze amaso izafasha mu bukerarugendo bushingiye kuri siporo harimo iyubakwa ry’Igicumbi cya Siporo i Remera hafi ya Kigali Arena.

Yagaragaje ko binjiye mu mikoranire n’abashoramari bazakora iyo nyigo y’ahantu hazashyirwa ibikorwa by’imyidagaduro n’imikino.

Muri uyu mushinga, hazagurwa Stade Amahoro ive ku bushobozi bwo kwakira abafana 25.000 babe 45.000 bicaye neza na Petit Stade yubakwe ku buryo yakira imikino mpuzamahanga.

I Remera hazubakwa igicumbi cya siporo kizaba kigizwe n'ibibuga by'imikino ndetse n'imyidagaduro bitandukanye
Mu mishinga migari hari gahunda yo kwagura Stade Amahoro ikajya yakira abantu ibihumbi 45
Kigali Arena iri mu bikorwaremezo byagutse muri siporo. Iyi nyubako yakira abantu ibihumbi 10, yubatswe mu 2019, iherereye i Remera, hegeranye na Stade Amahoro

-  Ishuri ryigisha iby’amahoteli

Leta y’u Rwanda ifatanyije na MasterCard Foundation byakoze inyigo izasiga hari uburyo bwo gutanga amasomo agendanye n’iby’amahoteli n’ubukerarugendo binyuze muri EHL - Ecole hôtelière de Lausanne yo mu Busuwisi.

Kuri ubu hari gushakwa uburyo bw’imikoranire n’abikorera ngo hubakwe ishami ry’iryo shuri mu Rwanda.

-  Umunyenga wo muri Air Balloons

Ikigo cy’Abanya-Turikiya cyitwa Royal Balloon cyinjije ku isoko ry’u Rwanda serivisi zo gutembereza abantu mu kirere, cyifashishije imitaka minini izwi nka ‘Hot Air Balloon’.

Iki kigo gifite ‘Hot Air Balloons’ ebyiri ndetse kiritegura gutangira kuzigerageza ku butaka bw’u Rwanda binyuze mu Kigo gishinzwe iby’Indege za Gisivili (RCCA).

Ikigo cya Royal Balloon kizatangira ibikorwa byacyo byo gutembereza abantu mu Rwanda mu gihe cya vuba. Uyu mutaka ufite ubushobozi bwo gutwara abantu babiri

-  Ba mukerarugendo bo muri Israel

Mu Ukuboza 2020, ni bwo itsinda ry’abakerarugendo 125 bo muri Israel bageze i Kigali batwawe n’Indege ya Sosiyete ya El Al mu rugendo rugamije gusura ibyiza nyaburanga bitatse u Rwanda.

Baje nyuma y’aho mu mpera za Ugushyingo Sosiyete ya Israel itwara abantu n’ibintu mu kirere, Israir, yatangizaga ingendo zayo mu Rwanda za buri cyumweru itwaye ba mukerarugendo 80.

Mu gihe bahamaze barabyishimiye ndetse bitewe n’umubano wa Israel n’u Rwanda, hari icyizere ko ba mukerarugendo benshi bahava bagana mu Rwagasabo.

Indege ya Sosiyete ya El Al yagejeje itsinda rya ba mukerarugendo 125 bo muri Israel i Kigali, ubwo bari mu rugendo rugamije gusura ibyiza nyaburanga bitatse u Rwanda. Abanya-Israel bari mu bahanzwe amaso mu basura urwa Gasabo

-  Abakerarugendo b’Abanyafurika bava muri Amerika

U Rwanda ruhanze amaso Abanyamerika batemberera muri Afurika bareba ibyiza bitatse uyu mugabane.

Mu 2020, Abanyamerika b’abirabura 300 basuye u Rwanda kandi mu byo batanze nk’ibyifuzo nyuma y’urwo rugendo byerekana ko hari amahirwe menshi yo kubakurura.

Ubu buryo bwagaragaje ko bwatanze umusaruro mu bindi bihugu bya Afurika kuko nko muri Ghana, mu 2019 bwinjirije igihugu miliyari $1.87 binyuze muri ba mukerarugendo b’Abanyamerika 500.000.

-  Iyubakwa rya Kivu Queen Uburanga Hotel

Mu minsi iri imbere, mu Kiyaga cya Kivu hazaba harimo ubwato bw’akataroneka buzajya bukoreshwa nka hotel yiswe ‘Mantis Kivu Queen Uburanga’

Iri mu mishinga itegerejwe mu bukerarugendo bw’u Rwanda, aho izashyirwa mu Karere ka Karongi mu Burengerazuba.

Mantis Kivu Queen Uburanga izakora nka hotel, ni ubwato bufite ibyumba (cabin) 10 harimo kimwe gishobora kwakira abantu bo ku rwego rw’abakuru b’ibihugu n’ikindi cy’abanyacyubahiro basanzwe.

Biteganyijwe ko izuzura muri Kamena 2021. Izaba inafite ubwogero, restaurant, bar, ndetse abashyitsi izakira bazajya banafashwa gusura inyoni n’ibindi binyabuzima.

Kivu Queen Uburanga, hoteli imeze nk'ubwato igiye kuzura i Karongi
Iri mu mishinga ya Mantis Group yitezweho guhindura isura y'ubukerarugendo

-  Pariki y’Igihugu ya Gishwati-Mukura

Pariki ya Gishwati-Mukura yashyizwe mu murage w’Isi na UNESCO, yatangiye kwakira abakerarugendo mu Ukuboza 2020.

Mu 2014 miliyoni $9,5 zashowe mu gutunganya Ishyamba cyimeza rya Gishwati-Mukura riherereye mu ruhererekane rw’Imisozi y’isunzu rya Congo-Nil, mu kongera kurisazura. Muri Gashyantare 2016, ni bwo ryemejwe nka Pariki y’Igihugu.

Mu 2019, RDB n’Ikigo Imizi Ecotourism Development Ltd, byasinyanye amasezerano y’imyaka 25 yo gutunganya no gucunga Pariki y’igihugu ya Gishwati-Mukura, ku buryo ihinduka igice gikorerwamo ubukerarugendo mu gihugu.

Yitezweho kuzamura ubukungu bw’igihugu, kuko izunganirana n’izindi pariki z’igihugu zirimo iy’Ibirunga, iy’Akagera na Nyungwe zisanzwe zakira abakerarugendo, kuko nayo ikungahaye ku rusobe rw’ibinyabuzima byakurura benshi.

Pariki ya Gishwati-Mukura iherereye mu Turere twa Rutsiro na Ngororero mu Burengerazuba bw’igihugu, iri ku buso bwa hegitari 3558
Pariki ya Gishwati-Mukura ibonekamo inguge n'ibisa nazo byinshi
Ababishaka bashobora no kuzajya bacumbika mu mahema yubatswe na Forest of Hope Guest House and Camp Site yafunguye imiryango muri Pariki ya Gishwati-Mukura mu Ukuboza 2020
Inkende ziri mu nyamaswa ziboneka muri Pariki ya Gishwati-Mukura

-  Inzovu, inyubako y’akataraboneka izaba irimo serivisi mpuzamahanga

Bimwe mu byo abitabira inama bakenera harimo no guhaha ibicuruzwa bitandukanye.

Mu gufasha abakerarugendo muri uwo mujyo, Sosiyete Duval Great Lakes Ltd yo mu Bufaransa igiye kuzamura inyubako zigezweho ku Kimihurura ahazwi nka Minijust.

Iyi nyubako igizwe n’ibyumba 140 izaba yitwa “Odalys City Business Apart hotel”.

Akamanzi yavuze ko iyi nyubako yiswe “Inzovu” izaba ifite iduka rimeze nk’ay’i Dubai aho abantu bahahira ibyo bakeneye byose, bakanahabona serivisi zitandukanye.

Mu bikorwa bizahubakwa harimo ivuriro rigezweho, amaguriro manini aho byitezwe ko Sosiyete y’Abafaransa ikomeye mu by’ubucuruzi ya Carrefour izahakorera.

Imiterere y'inzu yitwa Inzovu igiye kubakwa ahahoze inyubako zakoreragamo Minisiteri y'Ubutabera n'inkiko zitandukanye

-  Abanyamahoteli basabwe kwitegura

Umuyobozi Mukuru wa RDB, Clare Akamanzi, yasabye abanyamahoteli kwitegura gukomeza gutanga serivisi nziza mu gihe COVID-19 izagenza make.

Ati “Ni byiza kubasangiza imishinga migari ku buryo mu 2022 ubwo twizera ko tuzaba turi kwigobotora COVID-19, tuzabe dufite urwego rw’ubukerarugendo rwihagazeho mu Rwanda.’’

U Rwanda rwiyemeje kwihutisha umubare w’abahabwa inkingo, kuva muri Werurwe 2021, abantu 350.400 bamaze gukingirwa. Biteganyijwe ko bitarenze umwaka, ruzaba rwakiriye inkingo za Pfizer zisaga miliyoni 3.5.

Guverinoma y’u Rwanda yiyemeje kugeza inyungu iva mu bukerarugendo kuri miliyoni $800 mu 2024 ivuye kuri miliyoni $440 nk’intego yari yashyizweho mu 2017.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .