Twitege Visit Rwanda muri Formula 1 na NBA?

Yanditswe na Eric Tony Ukurikiyimfura
Kuya 28 Mutarama 2020 saa 07:56
Yasuwe :
0 0

Guhera mu kwezi gushize, Ikigo cy’Igihugu gishinzwe Ubukerarugendo, RDB, cyatangiye ubufatanye n’ikipe ya Paris St Germain yo mu Bufaransa, buzamara imyaka itatu bugamije kureshya abashoramari no gukomeza kuba icyerekezo kibereye ubukerarugendo.

Muri ubu bufatanye, ikirango cya Visit Rwanda kigaragazwa kuri Stade ya Parc des Princes aho PSG yakirira imikino yayo ndetse no ku mugongo ku myenda iyi kipe ikoresha mu myitozo no mu gihe cyo kwishyushya mbere y’imikino, yaba iyo yambara yasuye indi kipe cyangwa iyo yambara iwayo muri Shampiyona y’u Bufaransa, Ligue 1 mu gihe kandi aya magambo agaragara ku myambaro y’ikipe y’abagore.

Mu masezerano harimo kandi icyumweru cy’imishinga y’abanyempano b’abanyarwanda n’Abafaransa. Icyo cyumweru cyiswe “Semaine du Rwanda à Paris” kizajya gitegurwa na PSG mu kumenyekanisha ibintu byose bikorerwa mu Rwanda.

Ubu bufatanye bwatangajwe nyuma y’umwaka umwe n’igice, RDB itangiye gukorana n’ikipe ya Arsenal yo mu Bwongereza, aho binyuze muri Visit Rwanda, iyi kipe yo mu Mujyi wa Londres yamamaza ubukerarugendo bw’u Rwanda.

Kuva icyo gihe, hari abanyabigwi benshi bakomeye ba Arsenal baje mu Rwanda barimo Tony Adams wabaye kapiteni wayo igihe kirekire, Lauren Etame Mayer, Alex Scott wabaye kapiteni w’ikipe y’abagore na David Luiz kuri ubu ukinira iyi kipe, bose baje mu Rwanda.

Muri ubu bufatanye kandi, abatoza babiri b’Ingimbi za Arsenal FC, Simon McManus usanzwe ari Umutoza Mukuru w’Amashuri yigisha umupira w’amaguru ya Arsenal na Kerry Green, bahugura ab’Abanyarwanda mu kubafasha kubatoza umupira ugezweho nk’uwo iyi kipe ikina.

RDB ivuga ko kuva u Rwanda rutangiye gukorana na Arsenal binyuze muri Visit Rwanda mu 2018, ba mukerarungo baza mu Rwanda bamaze kugera kuri miliyoni imwe na 700 (byatangajwe mu Ukuboza 2019) ndetse yizeye ko bazakomeza kwiyongera mu myaka iri imbere.

Ubufatanye bw'u Rwanda na Arsenal bugeze mu mwaka wa kabiri w'amasezerano
Paris Saint Germain ikinamo abarimo Neymar na Kylian Mbappe yishyushya yambaye imyenda yanditseho Visit Rwanda mbere y'imikino ya Shampiyona

Ese birashoboka ko tuzabona Visit Rwanda mu marushanwa nka Tour de France, Formula 1 cyangwa NBA?

Imwe mu mpamvu ituma habaho ubu bufatanye bw’u Rwanda n’amakipe akomeye i Burayi, ni ugutekereza kure kugira ngo u Rwanda ruzabe igihugu gikize mu myaka iri imbere ndetse n’Abanyarwanda bagire ubushobozi buhagije bwo gukora ibyishimirwa n’abanyamahanga.

Tour de France niryo siganwa rya mbere ry’amagare rikomeye ku Isi, Formula 1 naryo ni isiganwa rya mbere rikomeye mu mukino wo gusiganwa mu modoka mu gihe NBA yo muri Amerika ari yo Shampiyona ya Basketball ikunzwe na benshi ku Isi.

Umuyobozi Mukuru w’Ishami ry’Ubukerarugendo no kubungabunga za Pariki muri RDB, Ariella Kageruka, yavuze ko bishoboka ko u Rwanda rwagirana ubufatanye n’imwe mu makipe agaragara muri aya marushanwa kuko byose bisaba kwiha intego ndetse bikagira uko bikorwa.

Ati “Sinavuga ko hari igihe runaka bizabera, ariko nta kintu kidashoboka kuko iyo urebye ikintu gisabwa ni ukureba niba ibikorwaremezo dufite bihuye n’ibyo. Nko kuri Formula 1, icya mbere ni imihanda kandi nkeka imbaraga Leta yashyize mu kubaka imihanda dushobora kuyibyaza umusaruro.”

“Ku kwerekana Visit Rwanda muri NBA, BAL (Basketball Africa League yashyizweho na NBA) yo ubwo yaje aha, mwabonye ko ikipe yacu (Patriots BBC) yari ihagarariye u Rwanda yari yambaye Visit Rwanda. Ni ukuvuga ngo ni ukugenda intambwe ku ntambwe kandi byose birashoboka. Icya mbere ni ukugira ngo tubyaze umusaruro ubufatanye dufite uyu munsi kuko ni ukubanza kureba icyo dukuramo, tukaba twava mu mupira w’amaguru tukajya muri Basketball.”

Kageruka avuga ko nubwo kuri ubu ubufatanye bw’u Rwanda mu bukerarugendo bushingiye ku mugabane w’u Burayi, bitabuza ko n’Abanyamerika barumenya kuko nka Arsenal ikunda gukorerayo imyiteguro ya Shampiyona ijyanye n’itangazamakuru ryayo rigari ndetse ubwo David Luiz yazaga mu Rwanda, byavuzwe cyane muri Brésil.

Umuyobozi Mukuru w’Ishami ry’Ubukerarugendo no kubungabunga za Pariki muri RDB, Ariella Kageruka, yasangije abagize ingaga za Siporo mu Rwanda uburyo ishobora kuba isoko y'ubukunguu
Patriots BBC ihagariye u Rwanda muri Basketball Africa League (BAL) yambaye Visit Rwanda mu ijonjora riheruka kubera i Kigali

Ni iki cyakorwa ngo Siporo y’u Rwanda itange umusaruro mu bukungu bw’igihugu?

Siporo ni umwe mu nkingi z’iterambere u Rwanda rushaka kubakiraho ndetse igihugu kiri gushora cyane mu mikino kuko bitanga icyerekezo cyiza cy’igihugu ndetse bigafasha n’Abanyarwanda gutera imbere.

Mu kiganiro yatanze ubwo yari yatumiwe mu mahugurwa yahuje abagize ingaga za Siporo, yateguwe n’Umuryango FPR Inkotanyi, Umuyobozi Mukuru w’Ishami ry’Ubukerarugendo no kubungabunga za Pariki muri RDB, Ariella Kageruka, yavuze ko muri Siporo hari amahirwe menshi arimo ashobora kwinjiriza igihugu nko gukora imyenda n’inkweto bya Siporo.

Kageruka yakomeje avuga ko itangazamakuru rishobora kwifashishwa mu kumenyakanisha Siporo y’u Rwanda, abakinnyi n’abatoza b’Abanyarwanda bagahabawa amahugurwa abafasha kugira ubumenyi buri ku rwego mpuzamahanga.

Ati “Hari uburyo bwinshi bwo kubyaza umusaruro muri siporo, nko gushyiraho inganda zikora ibikoresho bya Siporo mu gihugu. Mu bijyanye n’ubukerarungo bushingiye kuri siporo, ubufatanye twagiranye n’abatwamamaza bwarengeje ibyo twari twiteze. Twari twiteze ko binyuze muri uku kwamamaza tuzabona miliyoni 28£, ariko mu mwaka umwe twabonye miliyoni 36£.”

Indi nzira yafasha u Rwanda kwinjiza binyuze muri Siporo hari ugutegura amarushanwa akomeye abera mu gihugu hakanategurwa ibikorwa byishimirwa n’Abanyamahanga baje muri iyi mikino, nko gusura ingagi n’izindi Pariki, gutembera mu Kivu no kuzamuka imisozi.

RDB ivuga ko kuva u Rwanda rutangiye gukorana na Arsenal mu myaka ibiri ishize, hamaze gutozwa abana n’abatoza basaga 120 ndetse no mu bufatanye na Paris Saint-Germain hazakorwa gahunda nk’iyi.

Inzu y’imikino ya Kigali Arena, ikibuga cya Cricket kiri i Gahanga, ikibuga cya Kigali Golf Club kiri kuvugurwa biri mu byitezweho kuzazamura ubukeragendo bunyuze muri siporo.

Mu 2017 ubukerarugendo bwinjirije u Rwanda miliyoni 401 z’Amadolari, ariko intego ya Guverinoma ni ukuzamura ayo madolari akaba miliyoni 800 mu 2024.

Visit Rwanda yari mu batanyabikorwa b'imena mu ijonjora rya BAL 2020 yashyizweho na NBA ku bufatanye na FIBA Afrique

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .