COVID-19: U Rwanda rumaze kwakira ba mukerarugendo 2769, binjije miliyoni 185 Frw mu mezi abiri

Yanditswe na IGIHE
Kuya 14 Kanama 2020 saa 05:35
Yasuwe :
0 0

Nyuma y’amezi agera kuri abiri ibikorwa by’ubukerarugendo bisubukuwe, u Rwanda rumaze kwakira ba mukerarugendo 2769 binjirije igihugu miliyoni zigera ku 185 z’amafaranga y’u Rwanda.

Inama y’Abaminisitiri yo ku wa 16 Kamena 2020 niyo yemeje isubukurwa ry’ibikorwa by’ubukerarugendo harimo ko ubukerarugendo bwo mu gihugu na mpuzamahanga ku bashyitsi binjiye mu Rwanda mu ndege zihariye (charter flights) baba abantu ku giti cyabo cyangwa abari mu matsinda bwemewe.

Gukomorera ubukerarugendo byakurikiwe n’amabwiriza yubahirizwa n’abasura ibyiza nyaburanga. Abatanga serivisi basabwe ko aho bakorera hashyirwa ibisabwa mu kwirinda COVID-19 ku bakozi no ku bashyitsi no kugenzura ko agapfukamunwa gakoreshwa neza igihe cyose.

Kuva ibyo bikorwa bikomorewe ba mukerarugendo 2769 basuye Pariki zitandukanye z’u Rwanda ndetse abaganiriye na RBA bitegura kujyayo bagaragaje akanyamuneza ko kongera kwihera ijisho ibyiza by’urwa Gasabo.

Abdelga ukomoka mu Misiri yagize ati “Nkunda u Rwanda cyane kuko ni igihugu cya kabiri kuri njye. Buri wese hano aranzi, arankunda nta kibazo. U Rwanda ni igihugu cyiza kuri njye. Ubukerarugendo hano burashimishije nta kibazo gihari.’’

Kayitare Gaël Nicolas nyuma yo kwisuzumisha COVID-19 yagaragaje ko afite ibyishimo byo kongera gutembera.

Yagize ati “Ubu twerekeje Bisoke. Byadushimishije cyane kuko hari haciyeho iminsi tutabasha gusura ibyiza bitatse u Rwanda rwacu.’’

Urwego rw’Igihugu rw’Iterambere (RDB) rutangaza ko mu 2769 basuye ibyiza nyaburanga, Abanyarwanda ni 1560, abanyamahanga batuye mu Rwanda ari 1152 n’abanyamahanga binjira mu Rwanda 57. Aba bose bishyuye amadolari ya Amerika 188 700, akabakaba miliyoni 185 Frw.

Uburyo bwo gusura ibyiza nyaburanga bwarahinduwe bijyanye n’ingamba zo kwirinda ikwirakwira rya COVID-19.

Nko muri Pariki y’Igihugu y’Ibirunga benshi bagana bashaka gusura ingagi, ingamba zirubahirizwa kuva ukigera ku Cyicaro cya RDB mu Kinigi, aho ba mukerarugendo bahabwa amabwiriza yo kwitwararika mu gihe cyo gusura ingagi.

Mukerarugendo wemererwa gusura pariki ni uwisuzumishije agasangwa nta Coronavirus afite, iyo ageze mu Kinigi abanza gukaraba intoki n’amazi meza n’isabune cyangwa akifashisha umuti wica udukoko ‘hand sanitizer’.

Iyo avuye aho apimwa umuriro nka kimwe mu bimenyetso bigaragaza umurwayi wa Coronavirus asabwa kwambara agapfukamunwa nk’ibwiriza ridakuka ku basura ingagi.

U Rwanda kandi rwanagabanyije ibiciro byo gusura ingagi, aho byagabanyijwe ku kigero cya 86% bigera ku $ 200 ku Banyarwanda na 67% ku banyamahanga batuye mu Rwanda biba $500, ku bandi hagumaho $1500 yasabwaga buri wese ukeneye kureba ingagi.

Ubusanzwe umuntu wese washakaga gusura ingagi yishyuraga amadolari ya Amerika 1500. Ni ibiciro byashyizweho mu 2018 bivuye ku madolari 750.

Ubukerarugendo ni rumwe mu nzego zifatiye runini u Rwanda kuko mu 2019 mu musaruro mbumbe wose w’igihugu, bwari bufitemo 10% mu gihe na mbere yaho umusaruro w’ibyo igihugu cyinjiza biturutse mu bukerarugendo wagiye wiyongera ku kigero cya 11% na 9% kuva mu 2008 kugera mu 2019.

Mu 2019, ubukerarugendo bwinjirije u Rwanda miliyoni $498, asaga miliyari 490 Frw mu gihe intego ya 2024 ni uko ruzabusaruramo miliyoni $ 800.

Ba mukerarugendo basura Pariki z'Igihugu zitandukanye babanza gupimwa ibimenyetso bya Coronavirus hirindwa ko hagira uyikwirakwiza
Abakerarugendo mu byo bishimira harimo no gusura ingagi zo mu Birunga ziri mu nyamaswa zisigaye ahantu hake ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .