Akarere ka Bugesera karifuza kubyaza umusaruro ibiyaga gafite mu bukerarugendo

Yanditswe na Ferdinand Maniraguha
Kuya 10 Gashyantare 2020 saa 09:47
Yasuwe :
0 0

Ubuyobozi bw’akarere ka Bugesera bwahamagariye abashoramari kubyaza umusaruro ibiyaga gafite, bigatunganywa neza ku buryo bikurura ba mukerarugendo.

Ubusanzwe akarere ka Bugesera gafite ibiyaga icyenda birimo bibiri binini nka Rweru na Cyohoha.

Nubwo ari kamwe mu turere dufite ibiyaga byinshi, nta musaruro ugaragra bitanga haba mu bijyanye n’ubukerarugendo cyangwa kuba byakwifashishwa mu buhinzi buteye imbere bwifashisha kuhira muri ako karere kakunze kurangwamo amapfa cyane.

Meya w’akarere ka Bugesera, Mutabazi Richard aherutse kubwira IGIHE ko bifuza kubyaza umusaruro ibyo biyaga, bagahamagarira abashoramari kuhubaka amahoteli n’ibindi bigezweho bikurura ba mukerarugendo.

Yagize ati “Turi gukangurira abashoramari gukora muri icyo cyiciro. Dufite ibiyaga icyenda ariko nta na kimwe kiriho inkombe zigezweho ikindi ugendeye ku miterere yacu ntabwo ari bya biyaga bifite umucanga, ni bigufi ariko uko byaba bimeze kose hakenewe abashoramo imari mu bijyanye n’imyidagaduro.”

Mu Bugesera ni hamwe mu bice by’igihugu biri gutera imbere cyane, by’umwihariko umujyi wa Nyamata uri hafi y’ahari kubakwa ikibuga cy’indege gishya kizaba ari icya mbere kinini mu Rwanda.

Ni agace kari kuzamurwamo inzu nyinshi kandi zigezweho zo guturamo. Meya Mutabazi avuga ko ikibura ari uburyo bw’imyidagaduro ku buryo abantu benshi bifuza kuza gutura muri ako karere, bakajya gukora ahandi ariho baturutse.

Ati “Akarere kacu gakwiriye kuba akarere gasurwa, abantu bakaza kuharuhukira bakava mu murwa mukuru bakaza hano, bakabona ibikorwa byinshi by’imyidagadauro bakaruhuka , abashaka kuhatura bakaza bakajya gukora baturutse hano.”

Mu guhamagaririra abashoramari kuza muri ako karere, Meya Mutabazi avuga ko bakeneye abantu bahubaka ibikorwa by’imyidagaduro nk’utubyiniro n’ibindi bituma urubyiruko ruhuga, aho gushidukira kujya mu mujyi wa Kigali.

Ati “Inaha usanga nta kabyiniro gahari, ugasanga urubyiruko ruri inaha rushaka gusohokera i Kigali. Kwambuka amazi ugiye kubyina twumva bidasobanutse mu karere kacu, twagombye kuba dufite ibyo bikorwa byose. Turakorana n’abashoramari batandukanye, turebe ko harimo ababyumva vuba.”

Aka karere gaherutse kuzurizwa stade nshya igezweho, nka kimwe mu bikorwa remezo by’imyidagaduro.

Mutabazi avuga ko ibiyaga bihari biramutse bibyajwe umusaruro, bigashyirwaho ibikurura ba mukerarugendo byakwinjiriza akarere, n’abagatuye bakabona imirimo.

Ibiyaga icyenda biboneka mu karere ka Bugesera bifite ubuso bwa hegitari 10,635 byose hamwe.

Ikiyaga cya Cyohoha ni kimwe mu biri mu Bugesera bitabyazwa umusaruro uko bikwiriye
Meya Richard Mutabazi yavuze ko bashaka abashoramari bubaka ibikorwa remezo bikurura ba mukerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza