Abantu 35 bari guhugurirwa kuyobora abashaka kureba amoko y’inyoni mu Rwanda

Yanditswe na Ishimwe Israel
Kuya 17 Werurwe 2019 saa 10:48
Yasuwe :
0 0

Abayobora ba mukerarugendo bagera kuri 35 batangiye gutyaza ubumenyi kugira ngo barusheho gufasha abagana u Rwanda kuryoherwa no kureba amoko y’inyoni arubarizwamo.

Aya mahugurwa yatangiye ku wa Gatanu, tariki ya 15 Werurwe 2019, ari gukorerwa mu bice bigaragaramo inyoni nyinshi mu Karere ka Bugesera, Pariki y’Igihugu y’Akagera n’iya Nyungwe.

Umwongereza w’inzobere mu bukerarugendo bwo gusura inyoni, Malcolm Wilson, ni we uri kwigisha abari guhugurwa ibijyanye na tekiniki zikoreshwa, uburyo bwo gufata amafoto, kumva no gutandukanya amajwi y’inyoni, imiterere y’uburumbuke bwazo, ubukerarugendo n’ibindi.

Mu gutangira aya mahugurwa, Abanyarwanda bayobora ba mukerarugendo kureba inyoni bahawe ibitabo byihariye muri ubu bukerarugendo n’indebakure (binoculars) bazifashisha.

Aya mahugurwa y’iminsi 19 yateguwe n’Ikigo cy’Igihugu cy’Iterambere (RDB) ku bufatanye n’Umushinga w’Abadage wita ku Iterambere (GIZ) n’abandi bafatanyabikorwa mu bukerarugendo; azasozwa ku wa 4 Mata 2019.

Umuyobozi muri RDB ushinzwe Ubukerarugendo no kubungabunga Urusobe rw’Ibinyabuzima, Mutangana Eugène, yavuze ko u Rwanda rukungahaye cyane ku hantu habereye ba mukerarugendo harimo n’ahari inyoni.

Yagize ati “Dufite ahantu harindwi hari ku rwego mpuzamahanga habarizwa ubwoko bw’inyoni burenga 703. Abanyamahanga bakorera mu Rwanda ingendo miliyoni eshatu buri mwaka baje kureba inyoni. Binyuze muri aya mahugurwa, turashaka kuzamura agaciro k’abareba inyoni no kungukira mu bukerarugendo bwazo.’’

Umujyanama mu bijyanye n’Ubukungu muri GIZ, Ellen Kallinowsky, yavuze ko bizeye ko ubukerarugendo bwo kureba inyoni mu Rwanda bushobora kugira agaciro nk’ak’ingagi.

Ati “Inyoni ntizifite umubare w’abantu ntarengwa bazisura cyangwa ahantu hihariye mu gihugu. Ku rundi ruhande, ubuturo bw’inyoni buba ahari ibyatsi, mu bishanga n’udushyamba dutoshye, bituma habaho itandukaniro mu bwoko bwazo rigira igihugu ahifuzwa n’abihebeye ubukerarugendo bw’inyoni.’’

Yakomeje avuga ko abayobora ba mukerarugendo, urwego rw’ubukerarugendo n’Abanyarwanda muri rusange bashobora kubyungukiramo.

Ku wa 14 Kamena 2018, Ishyirahamwe Nyarwanda ry’Abayobora ba Mukerarugendo (Rwanda Safari Guides Association-RSGA) ryatanze impamyabushobozi kuri 45 batsinze ikizamini cyo kuyobora abantu basura u Rwanda mu rwego rw’ubukerarugendo.

Abayobora ba mukerarugendo batanga ibyishimo by’ikirenga mu rugendo rwose kuva bakigera ku kibuga cy’indege binyuze mu bisobanuro byimbitse batanga bikanogera amatwi n’amaso.

U Rwanda rwiyemeje gukora ibishoboka ngo mu 2024 inyungu ruvana mu bukerarugendo izabashe kwikuba kabiri igere kuri miliyoni $800 zivuye ku zigera kuri miliyoni $440 nk’intego yo mu 2017.

Abayobora ba mukerarugendo bafashe ifoto y’urwibutso n’abayobozi b’Ikigo cy’Igihugu cy’Iterambere (RDB), n'ab'Umushinga w'Abadage wita ku Iterambere mbere yo gutangira guhugurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza