00:00:00 IGIHE NETWORK KN KINYARWANDA EN ENGLISH FR FRANCAIS

Umunsi i Istanbul mu mujyi w’abanyamaboko yombi! (Amafoto)

Yanditswe na

Philbert Girinema

Kuya 24 Gicurasi 2016 saa 03:25
Yasuwe :
2 0

Uvuye i Kanombe werekeje Istanbul muri Turikiya bigutwara amasaha umunani n’iminota makumyabiri mu rugendo rukugezayo nta handi indege ihagaze. Njye byamfashe arenga ayo gato kuko nanyuze i Entebbe muri Uganda.

Ni urugendo rurerure ariko ruba rugufi kubera impamvu zitandukanye zirimo serivisi ntagereranywa nko kwakira abagenzi neza mu ndege. Ibanga benshi batazi ni uko kugira ngo wemererwe gukora mu ndege ya Turkish Airlines ugomba kuba ugaragarira neza amaso y’abakureba nyuma y’amasomo n’ibizamini by’amezi atandatu.

Reka ibyo tubiveho twivugire Umujyi uteretse hagati mu mazi, ugakora ku migabane ibiri. Nyuma y’amasaha agera ku icumi mu ndege uruhukira kuri Istanbul Atatürk Airport, ikibuga cy’indege kinini muri Turikiya, kikaba n’icya 11 ku Isi cyakira abagenzi benshi.

Uruvunganzoka rw’abantu baba banyuranyuranamo umunota ku wundi, abagenda n’abataha; abahanyura bagiye mu bindi bihugu bityo bityo.

Wakirizwa ururimi rwiganjemo Icyongereza gike cyaneeee kuko abenshi baba bivugira za Selam [Soma: Selamu] cyangwa Merhaba [Soma: Marihaba] aribyo mu Cyongereza bivuga Hello.

Abanyaturikiya ni abantu bakomeye ku muco cyane bituma n’indimi z’amahanga bataziha umwanya munini ahubwo bakivugira ururimo rwabo gakondo barazwe n’Abaromani n’Abagereki mu myaka ibihumbi ishize nyuma y’ivuka rya Yezu.

Imiterere ya Istanbul

Ni Umujyi ukikijwe n’amazi, ubibona neza uri mu kirere ubura ibirometero bike ngo ugere hejuru neza ya Istanbul. Uba ubona Inyanja y’Umukara, inyanja ya Marmara n’izindi zigaragara muri Asia.

Iyo ureba Inyanja y'Umukara uhagaze ku musozi nyaburanga w'ahitwa Pierre Loti mu gace kitwa Eyüp

Uyu mujyi utuwe n’abantu bagera kuri miliyoni 20 aho 98% ari abayisilamu, abandi basigaye ari abakirisitu n’abayahudi. Urimo imisigiti irenga ibihumbi bitatu, harimo irindwi ihatse byinshi.

Ni umujyi ugaragaramo urujya n’uruza rw’imodoka ku buryo ushobora kumara amasaha n’amasaha uri mu muhanda wabuze uko uhava kubera ama Benz, Audi, BMW, Fiat n’izindi modoka zikorerwa i Burayi nyinshi ziba zibisikana.

Biragoye kubonayo imodoka nka Toyota z’iyo mu Buyapani cyangwa Ford z’inyamerika, kuko mu modoka 1000 wabonamo imwe.

Gukoresha gari ya moshi zitwarwa n’amashanyarazi, kuba bus zitwara abagenzi zifite umuhanda zihariye, ni bimwe mu bituma nk’abantu bagiye ku kazi badaheranwa n’uwo muvundo.

Istanbul irasukuye, indabo z’amabara cyane iz’umutuku n’umuhondo mu nkengero z’umuhanda; nta mupolisi; nta moto nta n’igare. Navuyeyo mbonye umupolisi umwe ku kiraro cya Bosphorus gihuza igice cya Turikiya kiri mu Burayi n’ikiri ku ruhande rwa Asia.

Mu nkengero z'umuhanda i Istanbul wateye indabo z'amabara y'umutuku

Ni Umujyi w’Abanyamaboko yombi!

Bibaye ari nk’amafunguro utishimiye, waba uyashaka cyangwa utayashaka uburyo uyahabwa bituma uyakira n’umutima mwiza.

Hari umwe wakira abantu muri restaurant twahuye. Yitwa Celo [ niko kazina k’akabyiniriro] yatanze amafunguro abantu twari kumwe bati rwose urakoze.

Celo ahagarara imbere ya buri wese aciye bugufi mu cyongereza ahandura ati ‘Try it my friend, try!’ Uburyo yabivuze, buri wese yananiwe kumuhakanira aremera arafungura. Akiri aho, Celo na none anyura kuri buri wese mu cyongereza ngo yigiye i Miami aho yakoze igihe kitari gito abaza uko byari bimeze ati ‘How was it my friend?’

Serivisi nziza nk’izi nizo usanga n’ahandi hose wagera, yaba muri restaurant cyangwa no mu iguriro rindi.

Njye nkibibibona naravuze nti reka reka aba bantu baba bajijisha, ni abanyamahanga bakira neza gutya gusa. Ntibyatinze kuko bukeye bwaho nanyuze ahandi hari restaurant, mbona umugabo wari uhagaze ku muryango yingiga abantu banyuraga aho abasaba kwinjira aho acururiza ngo abahe amafunguro.

Nanjye aho nari ndi nigira umuntu uhuze cyane nifatisha amafoto mvuga nti maze ndebe ko n’abantu banyu aribyo mubakorera! Nitegereje uburyo uwo mugabo yasobanurira abanegihugu bagenzi be ndavuga nti iki cyo muragitsinze!

Umujyi ubumbatiye amateka

Istanbul ni umujyi ubumbatiye amateka ya kera kuva mu myaka 1299 ku ngoma ya Osman I ubwo hari mu bwami bwa Ottoman. Icyo gihe Umurwa mukuru w’ubu bwami witwaga Constantinople.

Ni umujyi urimo buri kimwe cyose kiranga amateka y’icyo gihe. Kuva ku misigiti ya kera imwe igikoreshwa n’indi yahinduwe inzu ndangamurage.

Bimwe mu byo udakwiye gucikwa wasuye Istanbul ni ikiraro gihuza Turikiya y’i Burayi n’iya Asia, Bosphorus Bridge. Gifite uburebure bwa kilometero n’igice, na metero 165 hejuru y’inyanja ya Bosphorus.

Hari kandi umusigiti witiriwe Sultan Ahmed, umwe mu isaga ibihumbi bitatu ufite umwihariko. Bawita ‘Blue Mosque’ kubera ko uburyo wubatse hejuru ufitemo amatafari asa n’ubururu mu gihe indi yose yera. Wafunguwe bwa mbere mu 1616, ubu usengerwamo ariko na ba mukerarugendo barawusura.

Hejuru ku nkuta muri uyu musigiti harimo amatafari afite ibara ry'ubururu

Isoko ryamamaye, ‘Grand Bazaar’, ryafunguwe mu 1455 ribarizwamo amaguriro arenga ibihumbi bine aho usangamo abantu benshi b’abanyamahanga kuko icyo washaka cyose cyane mu bikorerwa muri Turikiya wabihabonera.

Istanbul kandi nk’Umujyi uteretse ku mazi, abantu bagira amahirwe yo kujya kuroba amafi ku mugezi wa Galata ahari ikiraro ‘Galata Brigde’.

Muri Grand Bazaar nta kibazo ushobora guciririkanwa

Umuco washinze imizi

Turikiya muri rusange, ni igihugu kibumbatiye umuco wacyo, kuva ku rurimi kugera ku migenzo isanzwe.

Mu gihe mu Rwanda aho batunze inka wakirizwa amata, Istanbul n’aho divayi zabuze abanywi, usanganirizwa icyayi. Ni umuco wabo, bakiguha mu gatasi kangana urwara, si bimwe by’ibikombe binini tumenyereye.

Icyayi nicyo kiza ku isonga mu bintu byose ubona muri Turikiya. Mu gace ka nyaburanga kitiriwe Pierre Loti kigura amafaranga 857 y'u Rwanda

Ikawa yaho, abakuze bayinywa itarimo isukari. Nyuma yo gutegurwa mu buryo bwihariye, bayitanga mu gakombe gato gashoboka, kamwe wanywa intama imwe; ku ruhande bakaguha n’amazi kugira ngo numara kuyinywa wiyunyuguze.

Nubwo benshi ari abayisilamu, biragoye kubona abakobwa bambaye kumwe bahisha umusatsi. Oya, baba bambaye bisanzwe kuwa Gatanu bakajya gusenga bavayo bagasubira mu kazi. Ni ibanga ritumye Turikiya iri mu bihugu byateye imbere kuko guhera ku mwana kugeza ku mukambwe, bose nta n’umwe w’inabute.

Ni abakozi pe! Saa tatu z’ijoro i Istanbul (saa mbili zo mu Rwanda) nibwo amatara ku muhanda yaka, abantu baba bagikora nta gitekerezo cyo gutaha kugera mu ma saa tanu.

Mu myidagaduro…

Iyo iza kuba yambara ubururu mba mvuze ko ari nka Gikundiro y’i Nyanza ariko ubwo reka tuyite APR FC kuko yambara umweru n’umukara.

Beskitas, ubu niyo kipe muri Istanbul. Ifite icyicaro neza muri uyu mujyi bituma abantu benshi bayifana. Stade yayo yitwa Vodafone Arena, uyibona mu ibara ry’umutuku uri hejuru mu ndege, ukayibona ibengerana uyegereye.

Niyo yatwaye igikombe cya shampiyona uyu mwaka bituma ahantu hose ubu hari ibyapa byayo, abafana bayo ni abahuriga bemewe bamwe baba bikokoye mu muhanda.

Umuziki gakondo wo muri Turikiya wagira ngo ni mudasobwa iba iwuyungurura kuko wumvise ukuntu bakaraga umurya w’icyuma kimeze nk’inanga n’utugoma duto; wasinzira uri kugenda.

Nta byinshi abantu b’i Istanbul bazi kuri Afurika mu bijyanye na muzika gusa ab’urubyiruko banyuzamo bakabyina indirimbo zo muri Nigeria nk’iz’abahanzi nka Davido n’abandi.

Umuturirwa wa Donald Trump, umukandida uri kwiyamamariza kuyobora Leta Zunze Ubumwe za Amerika

Made in Rwanda ikwiye kwigira kuri Made in Turkey

U Rwanda rurangajwe imbere no guteza imbere ibikorerwa mu gihugu, ni gahunda rwafatiraho isomo kuri Turikiya.

Ni igihugu gikoresha byinshi mu bikorerwa imbere mu gihugu, usibye kuba gifite inganda zikomeye zibitunganya; ibikorerwa muri Turikiya nibyo bihendutse ku isoko kandi n’ibindi bihugu bijya kubirangura.

Urugero ni urw’umuntu twari kumwe wagiye mu iduka kugurira umwana we imyenda, atarebye neza iduka yinjiyemo agura ikabutura n’ishati by’umwana, yishyura amadolari 100 y’amerika. Ni amafaranga asaga ibihumbi 78 by’amafaranga y’u Rwanda.

Impamvu ibyo byamuhenze ntabwo ari uko ari byiza ahubwo ni uko ari ibintu bikorerwa muri Amerika.

Mu guteza imbere ibikorerwa mu gihugu, u Rwanda rwanatangira no gutekereza ku buryo byazaba biri ku rwego rumwe n’iby’ahandi ariko bihendutse kurushaho.

Muri Turikiya, inkweto zihendutse hamwe n’ibindi biva mu ruhu ni ibikorerwa imbere mu gihugu.

Ifaranga rikoreshwa muri Turikiya ryitwa Lira, rimwe rikangana n’amafaranga y’u Rwanda 260.

Cable car, akamodoka gatwara abantu kagendera ku migozi ku musozi wa Eyüp kabajyana hasi ku muhanda
Aho wahagarara hose Istanbul ubona umusigiti
Abantu benshi bakora ingendo bifashishije ubwato
Ku kiraro cya Galata [Galata Brigde] umuntu ashobora gushyira umuriro muri telefone ye yishyure i Lira rimwe
Yeni Cami, Umusigiti wafunguwe mu 1665
Imibavu ihumura neza uyisanga i Istanbul. Iyo igura ama Lira atanu n'atandatu ari hagati ya 1300 Frw na 1600
I Lira rimwe rivunjwa amanyarwanda 260
Muri Blue Mosque haba hari ba mukerarugendo benshi
Abagiye kwinjira muri Blue Mosque bahabwa isashi bagatwaramo inkweto zabo
Sultan Ahmed Mosque cyangwa Sultan Ahmet Mosque wafunguwe mu 1616
Mu Mujyi gari ya moshi zitwarwa n'ingufu z'amashanyarazi ziba zinyuranyuranamo nka kimwe mu byoroshya ingendo
Bosphorus, ikiraro kimwe muri bitatu bihuza igice cy'u Burayi cya Turikiya n'ikindi kiri muri Asia
Imodoka mu muhanda urenze Bosphorus aba ari uruvunganzoka
Imodoka zitwara abagenzi zigenda mu mwanya wazo kugira ngo zitabatinza mu nzira kubera umuvundo
Indabo uzisanga mu masangano y'imihanda
Anadolubank, imwe muri banki zikomeye i Istanbul
Beskitas ni ikipe ya rubanda, ubu amabendera yayo amanitse hose mu nkengero za Istanbul kuko ariyo yatwaye igikombe cya shampiyona
Çamlıca Tepesi, umusozi nyaburanga uri muri Asia ni ahantu ba mukerarugendo bakunda kwicara banywa icyayi
Imiturirwa ubona iyo uri ku musozi witwa Çamlıca yose iherereye muri Asia
Ikiraro cya Bosphorus saa moya z'ijoro izuba riri kurenga

[email protected]

Amafoto: Philbert Girinema - Istanbul


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .