00:00:00 IGIHE NETWORK KN KINYARWANDA EN ENGLISH FR FRANCAIS

Ibyumba bya hoteli bihenze kurusha ibindi mu Rwanda (Amafoto)

Yanditswe na Rabbi Malo Umucunguzi
Kuya 30 March 2022 saa 10:44
Yasuwe :

Ni hoteli zigibwamo n’abifite, kuko amafaranga bishyuramo ijoro rimwe hari benshi bayarota ngo bagure imodoka, ikibanza cyangwa bubake inzu iciriritse i Kigali. Ariko akodesha uburiri gusa, ijoro rimwe!

Uko u Rwanda rwubaka amahoteli menshi, ni ko hari abibaza ibisabwa ngo bayararemo, bayataramiremo, nubwo atari ko bose babibasha. Gusa ku bamenyereye umujyi, buri wese ashobora kubona iyo ku rwego rwe.

Ibi ni bimwe mu byumba bya hoteli bya mbere bihenze mu Rwanda ukurikije ibiciro bigaragara ku mbuga zabyo, birimo gukoreshwa n’abakiliya muri ibi bihe.

1. Silverback Suite: Iki ni icyumba cya One and Only Gorilla’s Nest, hoteli yubatswe mu ishyamba ry’inturusu mu Kinigi mu Karere ka Musanze.

Kurara muri iki cyumba ni 15.000$, ni ukuvuga asaga miliyoni 15 Frw. Ni byo, ni miliyoni cumi n’eshanu z’amafaranga y’u Rwanda.

Ni amafaranga ku muherwe ahwanye no gukodesha amashuka n’amafu (imbeho ku batamenyereye ibice byo mu Kinigi), mu gihe ku bafite amikoro aciriritse, ni amafaranga yavamo ivatiri, ikibanza cyiza, inzu iciriritse cyangwa agacyuza ubukwe.

Iki cyumba gishobora kuraramo gusa abantu batarenze babiri, baba bombi ari bakuru cyangwa umwe mukuru n’umwana.

Muri One and Only Gorilla’s Nest, icyumba cya make cyane ni $4000, ni ukuvuga amafaranga asaga miliyoni 4 Frw. Harimo n’ibindi byumba nka Ingagi Suite (13.000$ ku ijoro), Virunga Suite (6000$) n’ibindi.

Kurara muri iki cyumba ni 15.000$

2. Royal Suite: Ni icyumba cyiyubashye gishobora kwakira abashyitsi mu byiciro byose yaba umuherwe, umukuru w’igihugu cyangwa umwami, muri Radisson Blu Hotel and Convention Centre.

Muri ibi bihe bitarimo ba mukerarugendo benshi (Mutarama – Gicurasi n’Ugushyingo – Ukuboza), kurara muri Royal Suite ni amayero 12440.38, ni ukuvuga nibura asaga miliyoni 13.9 Frw. Ni byo, ni miliyoni cumi n’eshatu, mu ijoro rimwe!

Muri ayo mafaranga haba harimo n’imisoro.

Radisson Blu ifite ibyumba byihagazeho

Royal Suite with Lounge Access and Terrace ni icyumba kinini, cyisanzuye gifite n’uruganiriro, hose hamwe hangana na metero kare 699. Hashobora kwakira abantu bakuru batandatu n’abana babiri.

3. Kataza House: Iki ni kimwe mu bice by’inyubako y’ubukerarugendo izwi nka Singita Kwitonda Lodge and Kataza House, iherereye munsi y’ibirunga mu Karere ka Musanze. Muri iki gihe ba mukerarukendo ari bake, kuharara ni 8600$.

Singita Kwitonda Lodge igizwe n’inzu zirindwi zagenewe umuntu umwe cyangwa uherekejwe, uruganiriro rwagutse n’ibindi byangombwa nkenerwa, hakaba n’indi nzu yiswe Kataza House yo igizwe n’ibyumba bine byo kuraramo.

Singita ifite ahantu hahenze abantu bashobora kurara

Muri ibi bihe bitarimo ba mukerarugendo benshi (Mutarama – Gicurasi n’Ugushyingo – Ukuboza) kurara muri ’suite’ imwe ni 2100$, mu gihe mu mezi arimo ba mukerarugendo benshi ari 2800$.

Ni mu gihe kurara ahashyizwe ibyumba bibiri ubu ari 6.300$, naho mu gihe ubukerarugendo bumeze neza arazamuka akagera ku 8.400$.

Noneho kurara muri Kataza House, muri aya mezi ku bantu hagati ya 1-4 ni 8.600$, naho hagati y’abantu 5-8 ni 13.600$.

Mu yandi mezi, hagati y’abantu 1-4 ni 13.150$ naho hagati y’abantu 5-8 ni 20.950$.

4. Presidential Suite: Iki cyumba cyo muri Kigali Marriott Hotel kukiraramo ni ukwishyura 6,883.88$ ku ijoro rimwe, aho haba harimo n’imisoro.

Ni icyumba kigari, gifite uruganiriro, ibaraza n’ibyangombwa nkenerwa bituma niba ari umukuru w’igihugu waharaye, agira ubwisanzure bwose akenera yitegeye ibice byinshi bya Kigali.

Iki cyumba ni cyo gihenze muri Kigali Marriott Hotel

Ubundi umukiliya aba agomba kwishyura 5.556$, ariko muri ayo mafaranga hiyongeraho imisoro ya $1327.88, ku buryo umutu yishyura 6,883.88$.

Ni icyumba gifite ubuso bwa metero kare 215, kikagira aho kuganirira, aho kurira, aho gutekerera n’ibindi byinshi.

5. Forest Suite: Iki ni icyumba cyiyubashye kurusha ibindi muri One & Only Nyungwe House, hoteli igezweho iri mu ishyamba cyimeza rya Nyungwe. Kuharara ni 6600$.

Forest Suite ifite ubwiza bwihariye

6. Volcano Manor: Muri Five Volcanoes Boutique Hotel iherereye mu Karere ka Musanze, ni ho usanga Volcano Manor. Kuharara ni 5,500$ ku ijoro.

Ni inzu mu magambo make igizwe n’ibyumba bitatu, ishobora kwakira abantu batandatu.

7. Presidential Suite: Kigali Serena Hotel: Mu byumba bihenze kandi ntiwabura kuvugamo Presidential Suite ya Kigali Serena Hotel, ho kuharara ni 3425$ ku ijoro rimwe.

Iki cyumba cyagenewe abifite muri Kigali Serena Hotel

Uretse ibi byumba byishyurwa mu bihumbi byinshi by’amadolari, hari n’ibindi bibigwa mu ntege, kuko nka Luxury Pool Villa yo muri hoteli The Retreat, kuharara ijoro rimwe ni 1400$.

Luxury Pool Villa yo muri hoteli The Retreat

Ku muntu wagiye ashaka kwishyura mu mafaranga y’u Rwanda, we yishyura 1.224.000 Frw. Ni icyumba cyagutse, kuko bigaragara ko kiri ku buso bwa metero kare 120.

Hoteli zikomeza kugenda zirutanwa mu biciro, kugeza kuri Executive Suite ya Grand Legacy Hotel itangwa ku 300$.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .