00:00:00 IGIHE NETWORK KN KINYARWANDA EN ENGLISH FR FRANCAIS

Ibikurura ba mukerarugendo muri Rutsiro, iwabo w’amahumbezi akomoka mu Kiyaga cya Kivu

Yanditswe na Nsanzimana Erneste
Kuya 23 December 2021 saa 10:12
Yasuwe :

Mu Karere ka Rutsiro hari ahantu nyaburanga hagera kuri 26, hakurura ba mukerarugendo. Ibi bituma ubukerarugendo buba imwe mu nkingi z’iterambere ry’abagatuye. Mbere y’umwaduko wa Covid-19, ba mukerarugendo barenga 200 buri munsi banyuraga muri aka karere bakihera ijisho ibyiza nyaburanga birimo inkengero z’Ikiyaga cya Kivu, imisozi iteye amabengeza na Pariki ya Gishwati-Mukura irimo amoko anyuranye y’inyamaswa.

Ubukerarugendo ni kimwe mu bintu byinjiriza abaturage amafaranga. Hari abashinzwe gutwaza imizigo ba mukerarugendo n’abashinzwe kubayobora. Aba bose wongeyeho abafite amacumbi, abakora ubukorikori n’abacuruza ibikomoka ku buhinzi ni abantu bagerwaho by’ako kanya n’amafaranga ava mu bukerarugendo.

Ni akarere kagizwe n’imisozi miremire, bituma gasurwa na ba mukerarugendo benshi by’umwihariko abakora ubushingiye ku iyobokamana bwo guterera imisozi biyambaza Imana. Hari ahitwa ku murwa wa Bikiramariya.

Inzira ikikiye Ikiyaga cya Kivu, abanyamaguru n’abanyamagare bayinyuramo bacyitegeye bakitegereza neza imiterere y’ibirwa birimo. Ibi bibafasha kwishima no kuruhuka mu mutwe.

Ubukerarugendo bushingiye ku iterambere ry’umuturage ‘comminity based tourism’ na bwo buhagaze neza muri aka karere. Abakeneye kumenya uko umuturage wa Rutsiro ari kwiteza imbere basura ahakorerwa imirimo y’ubworozi bw’inzuki, cyane ko aka karere kazwiho kugira ubuki bwiza kubera ishyamba rya Gishwati –Mukura. Muri aka karere kandi hari amakoperative akora ibikoresho bikoze mu migano n’ibikoze mu birere.

Si ibyo gusa kuko hari abavumvu, ababyinnyi, uko ikawa isoromwa n’uko bayitunganya. Nko kuri ibi byo gusoroma kawa ukeneye kubireba yishyura amadorali 10. Hari aho basura abasoroma icyayi, abenga inzoga y’ibitoki, ubucukuzi bw’amabuye y’agaciro n’ibindi.

Ba mukerarugendo bahisemo gusura inzira Congo-Nil trade binjirira mu Murenge wa Kivumu, bakanyura Mushonyi, bagahingukira ahitwa i Boneza, bagakomeza Musasa, bakagera Mushubati ahitwa i Bumba. Iyo bageze aha amahitamo aba ari abiri. Hari abahitamo gukomeza i Karongi n’abahitamo gukomeza berekeza mu bice bya za Musebeya.

Inzira ya Gishwati- Mukura ‘river side trade’, abahisemo kuyinyura, basura ubukorikori bushingiye ku migano, imirimo y’ubuvumvu n’imirima y’ibyayi, bakanasura ibikuyu (inzuri). Muri iyi nzira ikintu benshi baba bafitiye amatsiko ahanini ni isoko y’umugezi wa Sebeya. Iyi soko iri hagati y’umurenge wa Murunda n’uwa Muhanda wo mu Karere ka Ngororero.

Ibikorwaremezo bifasha ba mukerarugendo birahari ku bwinshi

Muri izi nzira zombi, ba mukerarugendo bashyiriwemo aho bashobora kugera bakaruhuka gato bagakomeza urugendo harimo aho bashobora kugera bakaharara bakazakomeza urugendo ku munsi ukurikiyeho; aha hose kandi niko hagiye hari amacumbi.

Umuyobozi wungirije w’Akarere ka Rutsiro, Havugimana Etienne yabwiye IGIHE ko nta mukerarugendo ushobora kugera muri aka karere ngo abure icyumba cyo gucumbikamo kuko bafite amahoteli n’amacumbi bifite ibyumba bihagije.

Ati “Uyu munsi nta kibazo cy’amacumbi tugifite, dufite abikorera, dufite amahoteli, ahantu abantu bashobora kuba bacumbika, ubu nta mbogamizi tugifite nk’uko kera byahoze. Abantu bashobora kugana akarere babona aho bacumbika baba ba mukerarugendo n’abaza mu bindi bikorwa byabo.”

Mu rwego rwo kurushaho guteza imbere ubukerarugendo aka karere gateganya gukomeza guhugura abashinzwe kuyobora ba mukerarugendo n’ababatwaza kugira ngo bajye bashyira akarusho muri serivisi babaha.

Aka karere kagiye gusana ibiraro no gushyira ibyapa muri izi nzira zombi mu rwego rwo korohereza ba mukerarugendo bazinyuramo basura ahantu nyaburanga hatandukanye.

Akarere ka Rutsiro gashishikariza abashoramari gushora imari mu kubaka amahoteli by’umwihariko ku nkengero z’ikiyaga cya Kivu.

Mbere ya COVID-19, Akarere ka Rutsiro kakiraga ba mukerarugendo barenga 200 buri munsi ariko kubera iki cyorezo baragabanutse ubu kakira abari hagati ya 50 na 70. Ba mukerarugendo basura aka karere, hejuru ya 95% ni abanyamahanga. Aha niho gahera gasaba Abanyarwanda kugira umuco wo gusura ibyiza nyaburanga biri mu gihugu cyabo.

Ishyamba rya Gishwati-Mukura na ryo riri mu bikurura ba mukerarugendo mu Karere ka Rutsiro
Akarere ka Rutsiro karateganya kuzajya gategura imikino n'amarushanwa yo gutwara ubwato mu Kivu
Amahoteli agenda yiyongera mu Karere ka Rutsiro bituma abagasura badashobora kubura aho bacumbika
Abakunda gusohoka ku mucanga bahawe ikaze mu Karere ka Rutsiro
Kubaka ibikorwaremezo byorohereza ba mukerarugendo byashyizwemo imbaraga
Ku Kiyaga cya Kivu hubatswe Home Stays kugira ngo ba mukerarugendo bakeneye kuharuhukira babone aho barara
Mu Karere ka Rutsiro hari site zirenga 20 z'ubukerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .