Rusizi: Ni iki cyadindije umushinga wa hoteli imeze nk’ubwato yagombaga kubakwa ku kirwa?

Yanditswe na Sitio Ndoli
Kuya 6 Gashyantare 2020 saa 05:49
Yasuwe :
0 0

Mu mwaka wa 2016 nibwo hatangajwe ko ku kirwa cya Gihaya hagiye kubakwa hoteli izaba ikoze mu ishusho y’ubwato bumeze nk’ubwa Titanic. Ni hoteli yagombaga kuzura bitarenze 2019 ariko kugeza ubu ntirubakwa.

Gihaya Island Resort yagombaga kuba ifite ishusho nk’iy’ubwato bwa Titanic ndetse igizwe n’amagorofa atatu, ikubakwa mu Kagari ka Gihaya mu murenge wa Gihundwe, ku buso buri hagati ya hegitari 20 na 40.

Ugeze kuri iki kirwa usanga abahatuye bari mu mirimo yabo nk’ibisanzwe ndetse nta n’igikorwa kigaragaza iyubakwa ry’iyi hoteli.

Nyabyenda Faustin, umwe mu bahatuye ati “Urebye imirimo y’abaturage irakomeje ariko hoteli yo ntituzi ibyayo kuko tubona nta cyahindutse uretse ko hari abaturage bacye baguriye.”

Muneza Nira, nyiri uyu mushinga avuga ko bahuye n’imbogamizi nyinshi zituma badatangira ibikorwa ariko ko ubu ziri kugenda zicyemuka kuburyo imirimo yo kubaka izatangira muri Nyakanga cyangwa Kanama uyu mwaka.

Ati “Twagize ikibazo cy’ibyangombwa, ibyangombwa byaho byangombaga guhuzwa bikaba icyangombwa kimwe kuko hari ubutaka bw’abaturage benshi, hagiye haza n’ibindi bibazo byinshi byo kugurira abantu aho hari abaturage wasangaga ubutaka butabanditseho.”

Yakomeje agira ati “ Twahuye n’ikindi kibazo kuko hatari haragenewe amahotei cyangwa ubuhinzi, ubu turi mu ndunduro twabonye inyandiko ko aho hantu hashobora guhuzwa, hakaba ubutaka bumwe. Tuzatangira ibikorwa by’ibanze kuburyo bitakagombye kurenza muri 2022.”

Muneza yavuze mu gice cya mbere himuwe imiryango igera muri 50 ariko ko hoteli ifite ibice bitatu kuburyo bizarangira abaturage bose bimuwe hakubakwa ibikorwa by’ubukerarugendo.

Gihaya Island Resort biteganyijwe ko izuzura itwaye akayabo ka miliyoni 56 z’amadolari ya Amerika.

Iyi hoteli yagombaga kuzura bitarenze 2019
Izindi nzu zigomba kubakwa mu mushinga wa Gihaya Island Resort

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .