Uruhare rw’umugore w’umunyarwandakazi ku rugamba rwo Kubohora Igihugu

Yanditswe na Amb. Umutoni Nyinawumwami Christine
Kuya 6 Kanama 2020 saa 09:13
Yasuwe :
0 0

Twongere twibuke uruhare rw’abari n’abategarugori mu rugamba rwo kwibohora no kubohora igihugu cyacu.

Mu minsi ishize twari mu bihe byo kwibuka ku nshuro ya 26 urugamba rwo kubohora u Rwanda, ariko ntibirangira, ni byiza ko igihe cyose biduhora ku mutima bikatubera urugero mu bikorwa bya buri munsi, mu kazi, mu miryango yacu, mu nshuti, kuko kwibohora bijyana n‘ubutwari, umuntu wese mu byo akora yifuza ko yagiramo ubutwari.

Tugarutse kuri iki gikorwa, urugamba rwo kwibohora rwitabiriwe n’abantu b’ingeri zitandukanye: benshi bari bakiri bato, abasore n’inkumi, abagabo n’abagore.

Uruhare rwabo bose rwagaragariye mu bwitange no gukunda igihugu mu bikorwa bitandukanye ku rugamba rw’intambara y’amasasu, hari abakoraga byinshi birimo ubukangurambaga, kwigisha politike na dipolomasi ndetse n’ibikorwa byo kwamamaza umuco, cyanane mu bato.

Ibyo byose byajyanaga no gushakisha umusanzu ufasha ibikorwa bitandukanye, kuko ntahanandi twakuraga imfashanyo kugirango tubashe gukomeza urugamba.

Hagombaga no kubaho ubutabazi ku nkomere n‘abandi barwayi birumvikana, hari n‘abanyarwanda batari bake bakuwe mu byabo n’intambara, gutabara impfubyi no gufasha mu bindi bikorwa by’ubutabazi.

Buriya urugamba si ukurwana gusa kuko habanza kurutegura, no kwagura umuryango hongerwa umubare w’abanyamuryango, gusobanura intego y’urugamba neza higishwa gahunda n‘ibitekerezo bya politike ruzagenderaho, gushakisha umusanzu no kwitegura mu buryo bwa gisirikare.

Ibi byose igitsina gore cyabigizemo uruhare

Bishingiye kuri politike ya FPR yo kudaheza uwo ari we wese mu gutanga umusanzu, bishingiye ku buyobozi bwiza bwateguye ingamba n’uburyo bwihariye abari n’abategarugori bahawe ubukangurambaga nka Komisiyo yabari n’abategarugori, inzego zabategarugori, ndibuka ko hari ’unit’ ya gisisikare y’abari n’abategarugori yitwaga "Yankee mobile".

Iyo tuvuga twibuka n‘ababyeyi ba mama na ba nyogokuru bakomeje kwigisha abana umuco mwiza wo gukunda igihugu, bamwe batari banakizi kuko batakivukiyemo cyangwa ngo bagikuriremo, kuko bisanze bari mu mahanga kubera ubuhunzi bw’ababyeyi babo.

Aba babyeyi bakoze byinshi harimo kwigisha abana ururimi rw’Ikinyarwanda n’ibindi birimo kumenya indangagaciro z’umuco.

Urugero hari umubyeyi wari ifite umwana umwe yabyaye - aramuherekeza amugeza aho abandi bahuriraga bajya kurugamba, ati "Sanga abandi utabare, nguhaye imugisha wa kibyeyi.

Aba babyeyi mu gukangurira abana kwiga umuco babashishikarizaga kujya mu matorero, aha twavuga nk’i Burundi hari Imanzi, muri Congo hari Intare, muri Tanzania hari Amariza, i Bugande hari Amaraba, Nyampinga muri Kenya, mu Bubiligi hari Imitari na Muyango, Isamaza, Amarebe... aho urugamba rutangiriye bamwe muri abo nibo batangije Indahemuka Cultural Troupe, zakoze ubukangurambaga hirya no hino ndetse banabaye ku rugamba.

Abagore bari ku rugamba bagiraga n’igihe cyo gusengera urugamba, hari amatsinda y’ababyeyi babikora, muri gahunda zabo bikaba birimo.

Mu gihugu hagati mu Rwanda abagore bahabereye intwari, bakwirakwiza amatwara ya FPR mu matsinda atandukanye, kandi mu bihe bigoye n’umutekano muke

Hari kandi abategarugori basigaye ku ngo abagabo bagiye ku rugamba, bakamenya urugo, bakarera abana. Ibi byose bakabifatanya n‘ubukangurambaga no gushaka umusanzu wo gufasha urugamba.

Hari kandi abagore bafashe iya mbere nabo bajya mu gisirikare, bamwe baguye no ku rugamba, tuzahora tubibuka.

Uyu munsi umunyarwandakazi aho ari hose, haba mu Rwanda cyangwa mu mahanga, yishimiye umwanya afite mu buyobozi bufata ibyemezo, mu miryango mpuzamahanga, mu bucuruzi, mu bucamanza, ubuvuzi, ubuhanzi n‘ibindi bijyanye n’iterambere mu Rwanda.

Amb. Umutoni Nyinawumwami Christine ubu ni Umuhuzabikorwa w’Umuryango w’Abibumbye muri Mauritius na Seychelles. Ni umwe mu barwanye urugamba rwo Kwibohora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .