Urugendo rwo kwiyubaka k’urubyiruko rw’u Rwanda mu myaka 25 ishize

Yanditswe na Marcel Ntazinda
Kuya 19 Kamena 2019 saa 03:23
Yasuwe :
0 0

Nyuma y’imyaka 25 Jenoside yakorewe Abatutsi ibaye, u Rwanda rumaze gutera intambwe ikomeye mu ngeri zose yaba mu kwiyubaka mu bikorwaremezo, mu bumwe n’ubwiyunge ndetse no kugira icyerekezo kimwe cy’aho igihugu kigana.

Urubyiruko rugize 70% by’abaturage bose, ni rumwe mu misingi y’ingenzi mu kugera kuri ibi byose. Icya mbere rufite inshingano zikomeye zo gusigasira ibyo igihugu kimaze kugeraho nyuma y’amahano ya Jenoside yakorewe Abatutsi. Ku isonga rurebwa cyane no gukomeza kubumbatira ubumwe n’ubwiyunge bw’abanyarwanda.

Muri iyi myaka 25 ishize, urubyiruko rugaragara hose mu bikorwa by’iterambere. Rugaragara mu nzego z’ubuyobozi, rufite ibigo bikomeye n’ibindi bituma u Rwanda ari igihugu tubona magingo aya.

Uru rubyiruko mu myaka 25 ishize, rwanyuze mu bihe bikomeye, ndetse ukoze isesengura warugabanyamo ibice nka bibiri cyangwa bitatu.

Hari urubyiruko rwavutse mbere ya Jenoside gato n’abandi baribo ubu baherutse kuva muri iki cyiciro kubera imyaka. Aba babonye amahano igihugu cyacu cyanyuzemo, hari bamwe babonye ababyeyi babo bica nk’umusore umwe mperutse kubona mu itangazamakuru atanga ubuhamya bubabaje.

Avuga ukuntu se yamufataga akaboko agiye kwica abatutsi, ubu yarakuze ariko aterwa agahinda gakomeye n’ibyo bikorwa bya kinyamaswa byaranze umubyeyi we. Amahirwe dufite, ni uko dufite igihugu cyiza, kimenya ingingimira ya buri muturage ku buryo atahutazwa.

Ni umusore wemera uruhare se yagize muri Jenoside, akaruheraho atanga ubutumwa bw’uburyo Jenoside yakoranywe ubugome ndetse n’umusanzu twe nk’urubyiruko dukwiye kugira ngo hato tutazaba nka se.

Hari urundi rubyiruko rwanyuze mu bihe bikomeye, rwariho muri Jenoside, rubura ababyeyi n’abavandimwe bazize Jenoside. Rwisanze muri sosiyete rugomba kubana na wa musore se yagendaga afashe akaboko agiye gutsemba wenda abarimo ababyeyi be. Uribaza ubwo buzima?

Ni urubyiruko rwisanze mu buzima bugoye gusa rugira amahirwe akomeye yo gusigarana leta nk’umubyeyi nubwo rutabuze ibirutera ipfunwe kubera amateka.

Ndibuka kera, kubera kwa kugira umubyeyi wa gatatu ariwe nakwita leta kuko wenda Papa na Mama bo bagiye; wasangaga mu ishuri bahamagara bati abana barihirwa na FARG, bari kureba abishyuye amafaranga y’ishuri. Ni ibintu byateraga ipfunwe abarihirwa n’iki kigega.

Nibura iyo bavuga bati abana ba leta, icyiza ni uko leta yarihiraga abana biciye muri FARG, ikarenzaho igafata n’abandi bakennye barimo n’abo mu miryango yakoze Jenoside ikabarihira, urumva ko iyo bavuga aba leta nta wari gusigara yicaye.

Hari ikintu kimwe abantu bajya bibeshyaho, ko abana barihiwe na leta ari abafashijwe na FARG bakirengagiza ko hari n’abandi barihiwe na leta biciye muri Minaloc bo mu miryango ikennye, barimo abafite ababyeyi bafunze.

Ni ubuzima bwari bugoye kuko abana bamwe bananirwaga kumva uburyo bariho badafite ababyeyi, gusa Imana ishimwe leta yarahabaye.

Hari n’urundi rubyiruko rwa gatatu dufite ubu, rwiganjemo abana bavutse nyuma ya Jenoside yakorewe Abatutsi. Bisanze mu buzima badasobanukiwe, hari nka bamwe bagize amahirwe yo kugira umubyeyi umwe ariko ugasanga yavukanye nka sida, cyangwa abana na nyina wafashwe ku ngufu n’Interahamwe. Uribaza ubwo buzima?

Ni abana bavuka mu miryango yagize uruhare muri Jenoside, no mu miryango yakoze Jenoside, kandi bose bagomba kujya hamwe bagashyikirana.

Uru rubyiruko rw’u Rwanda buri cyiciro cyanyuze mu byacyo ariko magingo aya, bose bafite intumbero imwe. Ni ukubaka igihugu, ni ukugira u Rwanda twese twishimiye kandi twisangamo; rutandukanye n’urwo ababyeyi bacu twabuze babayemo.

Yaba umwana wavukiye mu Rwanda, uwakuriye hanze y’igihugu buri wese yisanga nk’umuturage ubereye u Rwanda. Ariko na none hari umukoro ukomeye ku rubyiruko rw’uyu munsi kuko ni rwo rufite mu biganza ejo hazaza.

Nabaza nti, ko imyaka 25 ishize Jenoside yakorewe Abatutsi ibaye, mu myaka 25 iri imbere ubwo tuzaba twibuka ku nshuro ya 50, ese rubyiruko ni he dushaka kugeza u Rwanda rwacu? Ese twumva neza ko dufite inshingano zo kudasubira inyuma? Ese twe tukiri urubyiruko uyu munsi, ko dufite amahirwe yo kuba mu gihugu gihuza bya byiciro byose, twiteguye gukomera kuri uwo musingi?

Dufite amahirwe akomeye ashingiye ku kuba ibyo twagezeho uyu munsi tubikesha umurongo uhamye twahawe n’umutoza wacu Perezida Kagame. Sinzi u Rwanda uko rwari kuba rumeze iyo hatabaho umuntu nkawe ukunda igihugu, ucyitangira kandi ureba kure.

Mu 2013, yigeze kutubwira muri Youth Connekt ku kiganiro yagiranye n’umwana warokotse Jenoside, wamubwiraga ku bikomere yagize yatewe no kubura abe.

Icyo gihe umutoza w’ikirenga yatubwiye uburyo yumvise inkuru y’uwo mwana ikamukora ku mutima, akamubaza uko abaho, uko yiyumva mu mitekereze maze undi akamusubiza ati “waratubwiye ngo tubeho”.

Ni ngombwa ko dukomeza kubaho muri aya mahitamo meza; dore tugiye no kugera mu gihe cyo kwibohora, tugakomeza kwibohora imitekerereze mibi iganisha ku rwango no ku kindi cyadutanya nk’abanyarwanda, nk’urubyiruko ahubwo tugakurikira inzira iganisha aheza igihugu cyacu.

Ubwanditsi: Ibikubiye muri iyi nyandiko ni ibitekerezo bwite by’umwanditsi. Marcel Ntazinda, ni urubyiruko. Akora mu kigo gishinzwe gukusanya no gusangiza ibigo by’imari amakuru ku nguzanyo, Credit information system. Asanzwe kandi ari umwanditsi w’imivugo n’amakinamico.

Marcel Ntazinda asaba urubyiruko kwibuka impanuro za Perezida Kagame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza