Umurage w’urwango

Yanditswe na Gatete Nyiringabo Ruhumuliza
Kuya 6 Gashyantare 2020 saa 06:25
Yasuwe :
0 0

‘Iyo uza kwimenya, nanjye ukamenya, ntiwari kunyica’- Urwibutso rwa Jenoside rwa Kigali ku Gisozi. Iyi video (yashyizwe nabi mu Gifaransa) yerekana uwahoze ari Minisitiri w’Ingabo ubu akaba ari Umujyanama wa Perezida mu by’Umutekano, Gen James Kabarebe aha impanuro abagize Umuryango w’Abanyeshuri barokotse Jenoside yakorewe Abatutsi, AERG, mu Ugushyingo 2019.

Gen Kabarebe yaganirizaga (http://bit.ly/2GCUxuS) uru rubyiruko rwa AERG ibijyanye n’ubwitange ndetse n’ingengabitekerezo yabibwe muri bagenzi babo bakuriye mu mahanga.

Yagize ati “Hari urundi rubyiruko rw’Abanyarwanda rwabyirutse nk’uko namwe mwabyirutse, kuri ubu bari mu mwanya wo kuvuga ngo ‘ubu ngubu tumaze kwisuganya, muri Mozambique nitwe dufite ubukungu bwose, muri Zambia nitwe dufite ubukungu bwose. Amashuri turiga turatsinda.’’

Yakomeje agira ati “Nigeze kubona ikinyamakuru cyo muri Lesotho gitangaza amanota y’ibizamini bya leta muri uwo mwaka, uko amashuri yatsinze n’abatsinze, nahereye ku mwana wa mbere: ‘Nshimirimana, Twagirimana, Twagirumukiza, kugeza ku bana 20 mpita mbyumva, kubera ko natwe turi muri Uganda, nkanjye ndi mu mwaka wa Karindwi w’amashuri abanza ndi hafi kujya mu yisumbuye bamanikaga abanyeshuri batsinze guhera ku wa mbere kugera ku w’ijana bari Abanyarwanda gusa. None nabo nyuma y’imyaka 20 baramanika abana batsinze ugasanga ni Abanyarwanda gusa.

None na bo nyuma y’imyaka 20 baramanika abana batsinze ugasanga ni bo gusa. Ibyo ntacyo byakabaye bitwaye iyaba bari abana bazima, batekereza neza ariko ikibazo ni uko imitekerereze yabo ari iy’ababyeyi babo, ari iyo gusenya igihugu, ubwo urumva ni urubyiruko rugiye guhangana.’’

Hari mwebwe mwarokotse mufite igihugu, hari n’abandi nabo bamaze kwisuganya na bo bavuga bati ubu dufite imbaraga mu bijyanye n’ubukungu nk’ubu muri Malawi nibo bagenzura ubukungu, ubucuruzi, ubuhinzi, Mozambique n’uko, Afurika y’Amajyepfo ni bo bagenzura ubukungu n’ahandi hose n’i Burayi usanga bagenda bishyira hamwe mu rubyiruko rwabo.

Nubwo rimwe na rimwe igihugu nacyo gikora ibikorwa byo kurwanya ingengabitekerezo ya Jenoside muri ayo matsinda ndetse bamwe bakitandukanya nayo. Ibi bisobanuye ko hari ikindi gisekuru kizahangana namwe ku kibazo cy’ingengabitekerezo ; bo babyumva ko ariwo murongo bakwiye gukomeza namwe mwumva uko uwo murongo hano mu Rwanda udakwiye guhabwa umwanya.

Mu guhuza ibi n’amateka igihugu cyanyuzemo, Afande Kabarebe yagize ati: ‘‘Icyo kintu kuzagisenya biragoranye cyane kubera ko amateka y’u Rwanda niko ameze; kuva ingengabitekerezo ya Jenoside yabibwa mu Rwanda, ikanakorwa kugira ngo izaranduke burundu ni ibintu biba bigoye cyane. Nyuma ya 1994 murabyumva ko abantu bagiye banyanyagiye bakagerageza ibitero, byose usanga bifite aho bihuriye, uko mu 1995 na 1996 bisuganyije bava Congo bakinjira bagatera mu Majyaruguru ni kimwe n’uko na 1959, 1961, 1962 na 1963 Inyenzi zisuganyije nazo zigatera ariko nyuma zigatsindwa zigasubirayo […] abandi na bo barateye baratsindwa basubirayo, mu gusubirayo igihugu cyarihuse cyane, ibi byose bimaze kubakwa, byiyubatse bamaze gusubirayo.

Basubiyeyo kuko baneshejwe. Iki gihe cyose bari barimo barisuganya, bafite amaraso bashya, bafite imitekerereze yindi, bafite imikorere yindi; iri koranabuhanga mufite na bo bararifite, murarwanira ku rubuga rumwe. Hari n’abari hano, ubona b’intagondwa, ujya muri gereza yavayo akaza ari wa wundi. Bafite abantu babo. Twe dufite igihugu, dufite ubushobozi. Hari igihe bibeshya bakavuga bati mwamaze imyaka 30, natwe haraburaho ine ngo 30 igere. Icyo bakoresha iyo myaka n’icyo tuyikoresha biratandukanye. Twe ntitumaze imyaka 30 twubaka ingengabitekerezo nk’iyo bubakaga, tuyimaze twubaka igihugu.

Birasaba imyumvire kandi si uko twarokotse, abarokotse n’abahagaritse Jenoside twagizweho ingaruka. Niyo mpamvu ubona nk’uyu munsi, urugamba rwo kubaka igihugu, ntawe RDF irusiganya, uritanga ukanatanga. Gutanga si ubwoba, ubugwari, ni nko kuvuga ngo ufite igihugu, ahubwo ureba igihugu aho kwireba. Ni ukugira umutima waguye. Namwe yaba GAERG na AERG mwarabikoze.

Inshingano mufite ku gihugu iraruta iy’ushaka kugisenya, ni mwe mufite inyungu mu kubaka igihugu. Nimwe mufite icyo gutanga kurusha udafite icyo abaha. Mwatanze imbabazi ariko no gukorera igihugu uba ukwiye kubikora utiganda.

Ugize amahirwe uriya wundi akakwiyungaho byaba byiza kurusha, inyungu zacu ni uko igihugu cyose cyagendera hamwe. Uzagira uruhare mu guharanira ko igihugu cyose kigendera hamwe ni mwebwe kuko uwabonye ikibi, akagera ahabi cyane ni we umenya icyo gukora kurusha umuntu w’umutesi.

Izi mpanuro zari zitomoye, ubutumwa bwokwitanga no kwigomwa, ubutumwa bwo gukunda igihugu. Birumvikana ko butanyuze abahakana jenoside barimo Musabyimana Gaspard wahoze ari intasi mu Biro bya Perezida Habyarimana.

Musabyimana yanditse inkuru mu Gifaransa acurika izi mpanuro. Yigambaga ko yavumbuye amashusho yari yarahishwe kubera ko muri yo Gen Kabarebe ‘yigisha urwango’ ndetse ‘agahishura imigambi ya RPF yo guca ibice impunzi ziri mu buhungiro’.

Yavuze ko Kabarebe yerekana abana b’Abahutu nk’ikibi ndetse akabwira abana b’Abatutsi ko ‘ubu bafite igihugu ndetse ko bagomba kucyiharira.’
Nk’uko mwabonye amagambo ari hejuru nta na kimwe muri ibi cy’ukuri. Uwo mugabo Gaspard, ntacyo yigeze avuga na kimwe ku ‘ukugira ubumuntu n’imbabazi’ Gen Kabarebe yakomeje kugarukaho. Ntiyavuze ikintu na kimwe ku ‘kwigomwa’ General [Kabarebe] yasabye aba bana b’Abanyarwanda, ahubwo mu nyandiko ye y’Igifaransa, yashoje agaragaza ko kwiyunga mu Rwanda bikiri inzozi.

Izo nyandiko za Musabyimana zakomeje guhererekanywa n’abasanzwe bahakana Jenoside yakorewe Abatutsi barimo Judy Rever, Filip Reyntjens, n’abarwanya Leta y’u Rwanda hirya no hino.

Gusa uyu mugabo yakoze ikosa rimwe rikomeye: AERG si umuryango w’Abatutsi!!

Nk’uko mubizi, nyuma y’imyaka 25 nta barokotse Jenoside benshi bakiri mu mashuri, AERG yabaye umuryango w’abanyeshuri bishyize hamwe kubera ibikorwa byo Kwibuka (kwibuka no kunamira Abatutsi bazize Jenoside mu 1994).

Uyu muryango w’abanyeshuri uherutse guhabwa igihembo cy’Ubumwe n’Ubwiyunge na Unity Club, kubera kudaheza uwo ariwe wese.

Mu yandi magambo Gen Kabarebe yabwiraga abanyeshuri b’Abatutsi, Abahutu n’Abatwa; abanyeshuri b’Abanyarwanda. Si mu mashuri yisumbuye gusa amoko yose agaragara no mu gisirikare cy’u Rwanda, muri Polisi, mu Nteko Ishinga Amategeko, mu rwego rw’abikorera, muri FPR n’ahandi.

Nari naravuze ko ntazongera gusubiza abafite ingengabitekerezo ya Jenoside mu 2020. Ariko nagize impungenge z’uko iki kintu kiramutse gihise kitavugurujwe, abenshi mu rubyiruko ruba mu mahanga batavuga Ikinyarwanda bashobora gufata ubu butumwa buyobya nk’ukuri.

Buri mwaka, urubyiruko rw’Abanyarwanda baba mu mahanga barenga ku mpanuro z’ababyeyi babo bagasura u Rwanda, bamwe muri bo ndetse baza n’ababyeyi babo batabizi. Kandi ni icyo bisaba gusa: urugendo rumwe rukumbi ruba ruhagije kugira ngo ubone ko ziriya nkuru zose bakuze babwirwa n’ababyeyi babo byari ibinyoma by’urwitwazo, bahishira ibyo basize bakoze.

Ku bafite imyumvire yo guhakana Jenoside uko ni ugutsindwa, bituma bakora ibyo bashoboye byose kugira ngo abana bafite ababyeyi b’Abahutu badakandagira mu Rwanda.

Ese ntibitangaje uburyo nyuma yo guhagarika Jenoside, abatsinze (RPF) batanze ikaze ku bicanyi bagaha n’ahazaza heza abana babo batabigizemo uruhare, ariko abicanyi akaba aribo bakigerageza kwitambika muri iyo nzira y’ubumwe?

Ese si amahano kuba abana b’abakoze Jenoside bagihatirizwa n’ababyeyi babo kwambara umugayo ndetse bagahezwa mu bikorwa byo guhakana ibyakozwe n’ababyeyi babo, mu gihe abarokotse bafite ubushake bwo kubabarira, kwiyunga no kujya mbere?

Ese ntibibabaje kuba kaminuza z’i Burayi by’umwihariko mu Bubiligi zikomeje gutera inkunga, kwakira no gushyigikira ihakana rya Jenoside, kugoreka no guhakana Jenoside yemewe ku Isi hose? Muri make, ibi si agahomamunwa kuba abicanyi n’ababashyigikiye baterwa inkunga mu kuyobya amateka?

Kuba bamwe bo mu bihugu byo mu Burengerazuba bw’Isi babona Paul Kagame, James Kabarebe na RPF nk’abanzi ku mpamvu zitandukanye, ibyo birabareba; ariko gukoresha urwo rwango babogamira abicanyi, bakabiba urwango mu by’abakiri bato bari mu mahanga ni ishyano.

Abana b’Abanyarwanda bose bavuka nta cyaha bafite, bafite ubwisanzure bungana. Gusa ababyeyi bikunda bakabavutsa uburenganzira bwo kwishyira ukizana babajandika mu byaha byabo. Yaba ari umubyeyi nyabaki ushobora kwifuza gucengeza urwango mu bana be, aho kubigisha gukunda u Rwanda kugira ngo bazazahure izina ry’umuryango?

Abishe Abatutsi bashakaga koreka u Rwanda. Ntibigeze batezuka kuri uwo mugambi. Abahanga bavuga ko ingengabitekerezo ya Jenoside izakomeza kubaho mu Rwanda, igihe cyose abakoze Jenoside bagikomeje kuzenguruka Isi nta nkomyi, igihe cyose abayihakana bagiterwa inkunga, igihe cyose BBC Gahuzamiryango izaba igihari, mu gihe cyose Kaminuza ya Antwerp izakomeza kuba icyumba cy’ubushakashatsi bwo kubiba amacakubiri, ingengabitekerezo ya Jenoside izakomeza kubaho.

Kuri uyu Munsi w’Intwari [wizihijwe ku wa 1 Gashyantare 2020] tugomba kuzirikana amagambo ya Gen Kabarebe ndetse tukiyemeza guhora twiteguye no kutarangwa n’ingengabitekerezo kugira ngo dufashe urungano ruba mu mahanga kwanga urwango no gufatanya mu kubaka igihugu cyacu duhuriyeho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .