Umunya-Sénégal yavuze ibigwi Perezida Kagame wagizwe indahiro n’urubyiruko rwa Afurika

Yanditswe na IGIHE
Kuya 15 Nyakanga 2019 saa 01:18
Yasuwe :
0 0

Ubwanditsi: Iki ni igitekerezo cya Ibrahima Kane washinze akaba n’umuyobozi w’Ikigo Gaynako gikora ibijyanye n’itumanaho n’imenyekanishabikorwa hakoreshejwe ikoranabuhanga.

Perezida w’u Rwanda ukunzwe na bose kandi utajenjeka na mba ntanavugirwemo, ubu niwe uri ku ruhembe. Kuri ubu urubyiruko rwose rwa Afurika niwe rwirahira, ku bw’umurava wo ku rwego rwo hejuru mu gukora impinduka mu gihugu cye no mu nzego za Afurika n’iz’akarere.

Ku mugabane utari ufite inkingi iwugaragaza, Perezida Kagame yawubereye nka ‘kibonumwe’. Afurika ntiyagiraga umuyobozi w’icyitegererezo ahubwo bari abanengwa gusa. Ni uko Kagame yabashije gushyira ku murongo itumanaho no kumenyekanisha politiki, abasha kwigarurira imitima ya benshi birenga imbibi n’abaturage ba Afurika.

“Natewe ishema na Paul Kagame”, Ni ko uwari Perezida w’u Bufaransa Nicolas Sarkozy yigeze kwivugira. Umwaka ushize yatowe nk’umuyobozi mwiza w’Umunyafurika w’umwaka na Televiziyo ya CNBC na Forbes Africa. Ariko se ni ikihe kidasanzwe cy’uyu mugabo w’igitangaza udahukubuka? Ni gute yabashije kwigarurira ibitekerezo by’Abanyafurika n’Isi muri rusange, ni iki akora kirenze cyangwa akora neza kuruta bagenzi be?

Uburyo bwo kuganira

Si ibanga, abayobozi bakomeye bazi uko bifashisha ubugeni bwo kubaka amateka. Muri rusange ni abantu bazi kuganira, bafite impano yo kujyana n’amarangamutima no gutuma abantu bakomeza kubakurikira. Kuba Perezida w’u Rwanda yarabashije gukora ku mbamutima ndetse akigarurira miliyoni z’urubyiruko rwa Afurika, ni uko mbere na mbere azi uburyo yinjira mu ntekerezo zarwo akoresheje ibyo aruganiriza.

Mbere na mbere, ni amateka atangaje. U Rwanda, igihugu cyiza cy’imisozi igihumbi cyanyuze mu mateka ababaje ya Jenoside yakorewe Abatutsi. Igihugu cyasenyutse burundu ku buryo nta muntu washoboraga gutega ko mu myaka 20 nyuma ya Jenoside u Rwanda rwaba imwe muri moteri zo guhanga ibishya n’iterambere rya Afurika. Umusaruro mbumbe w’u Rwanda warazamutse uva kuri miliyari 1989 mu mwaka wa 1998, ugera kuri miliyari 9509 mu 2018. Icyizere cyo kubaho cyarazamutse kiva ku myaka 44 kigera kuri 68 mu gihe nka kiriya.

Kuganira ku kindi cyerekezo cy’igihugu cye

Uruhare rwa Perezida Kagame mu kuzuka k’u Rwanda, ni umusingi. Ni we, binyuze mu bikorwa bye by’ingenzi, wahinduye igihugu. Azi uburyo bwo kugarura icyizere mu baturage bari barashegeshwe n’amagambo abiba urwango. Paul Kagame yabashije kubabwira ikindi cyerekezo cy’igihugu.

Mu magambo mashya ababwira ko u Rwanda n’abaturage ko ari bo mbaraga z’iterambere. Ni abaturage bagize uruhare mu kongera kubaho kwabo binyuze muri gahunda z’ubwiyunge nka ‘Ndi Umunyarwanda’, igaragaza akamaro ko kwiyumva nkawe ubwawe ko uri umunyarwanda, indangagaciro zishingiye kuri iyi myumvire na kirazira zatumye igera ku ntego.

Hari gahunda y’Umuganda iba buri cyumweru cya nyuma cy’ukwezi. Guverinoma kandi yashyizeho ikigega gifasha abacitse ku icumu batishoboye (FARG).

Muri izi ngero ebyiri, harimo igitekerezo cyo guhuza ubushake no kugira indangagaciro zimwe. Ubutumwa bw’icyizere bugira buti “Twese hamwe dushobora kubaka igihugu cyunze ubumwe mu bworoherane”. Ni amagambo Paul Kagame akoresha kugira ngo igihugu cye kigere ku byiza. Yashyizeho uburyo bwo gusaba imbabazi kandi abanyarwanda babigiramo uruhare.

Abaturage b’u Rwanda barenga miliyoni 12 biyumvamo ko bafite amahoro kandi barinzwe. Igihugu cyateye imbere bidasanzwe. Ibi byose ntibyari gushoboka iyo Perezida Kagame ataza guhuza amagambo n’ibikorwa.

Nta gushidikanya muri we harimo ihame ry’inshingano. Akora ibyo avuga, akavuga ibyo akora. Ukwiyemeza ibikorwa kurakomeye gusigasirwa muri politiki uyu munsi kubera ko impinduka zisaba igihe kirekire kandi akenshi zizitirwa n’igihe gito kigenwa n’amatora. Igihe kandi Kagame amaze ayoboye u Rwanda cyabigizemo uruhare gituma abasha gushyira mu bikorwa gahunda ze n’ibyifuzo by’abaturage.

Kagame yabonye igihe n’imbaraga zo gutuma u Rwanda rugira ubukungu buciriritse mu 2020 nk’uko abyifuza.

Perezida Kagame kandi yashyizeho igenamigambi risobanutse ryiswe ‘Vision 2020’. Muri iyi nyandiko, Perezida w’u Rwanda arabisobanura neza. Arashaka kubaka imyumvire rusange. “Icyerekezo 2020 kigaragaza intego n’umuhate w’abanyarwanda mu kubaka isura y’u Rwanda rwunze ubumwe, demokarasi kandi buri wese yibonamo nyuma y’imyaka myinshi y’ubutegetsi bw’igitugu n’ivangura”.

Inkingi z’uwo mushinga ni; imiyoborere myiza, ukwigira, abaturage bashoboye, ubukungu bushingiye ku bumenyi, ubukungu bugizwemo uruhare n’abikorera, iterambere ry’ibikorwa remezo, kongerera agaciro ibikomoka ku buhinzi no kubigeza ku masoko, ukwihuza mu miryango y’akarere n’iy’amahanga.

Hari umurongo usobanutse ufite intego yo guhindura igihugu no kukivana mu rwego rw’ibitihagije mu bukungu n’imibereho myiza. Kagame yashyize imbaraga mu kugeza uburezi n’ubuzima kuri bose. Yashyize ubushobozi bukenewe mu buhinzi, ubucukuzi bw’amabuye y’agaciro n’inganda, byihariye 57% by’imishinga y’igihugu.

Kwiyegereza abo hanze y’imipaka y’u Rwanda

Iki cyerekezo cyatekerejweho neza kandi gisubiza intego z’abaturage b’u Rwanda n’iz’abaterankunga, umuryango mpuzamahanga ubona muri Kagame umuntu wo kwicarana mukaganira. Ishoramari mu gihugu ryageze kuri miliyari ebyiri z’amadolari mu 2018, 47% byaryo ni iry’abanyamahanga. Ni umuhigo. Yatsuye imikoranire n’abantu bakomeye nka Bill Clinton na Tony Blair, bamufasha mu gushaka abashoramari.

Murifuza kubonwa nk’umuyobozi ukorera mu mucyo, mugomba gukorera mu mucyo. Ishingiro ryo kwimenyekanisha ni ukuba umunyakuri. Kwimenyekanisha ntabwo ari ugukoresha amanyanga. Mu gihugu cye ndetse no ku buyobozi bwa AU, Paul Kagame yashyize imbere ubunyangamugayo.

Perezida wa Repubulika y’u Rwanda ni umwe mu baharanira Ubwigenge, Agaciro n’Iterambere by’Umunyafurika. Ni umwe mu bagize uruhare mu isinywa ry’amasezerano y’isoko rusange (AfCFTA). Aya masezerano amaze gusinywa n’ibihugu 54 kuri 55 by’uyu mugabane.

Kagame kandi ashyize imbere ukwihuza k’uturere aho ubu ayoboye Umuryango wa Afurika y’Iburasirazuba (EAC), uhuza u Burundi, u Rwanda, Tanzania, Kenya, Uganda na Sudani y’Epfo. Afite ubushake bw’uko urujya n’uruza rw’abantu n’ibintu muri Afurika rushinga imizi.

Icyakora haracyari ikibazo n’u Burundi agomba gukemura nubwo ibya RDC birimo kujya ku murongo kuva ubwo Félix Tshisekedi agiriye ku butegetsi.

Kuvana mu bitekerezo ushyira mu bikorwa: Ubutumwa bugezweho n’ibikorwa remezo

Perezida Kagame kandi yashoye imari mu bikorwa remezo kugira ngo akurure abanyamahanga. RwandAir ni imwe muri sosiyete z’ubwikorezi bw’indege zikomeye muri Afurika.

U Rwanda rufite ishema mu mutekano, isuku n’isukura ndetse n’imihanda imeze neza. Kigali Convention Centre yatwaye miliyoni 300 z’amadolari. U Rwanda ni ahantu heza habereye ubucuruzi ndetse habera n’inama nyinshi. Iyi sura ituma ubukerarugendo butera imbere. Miliyoni 438 z’amadolari zinjiye mu bukungu bw’igihugu kubera iyo sura.

Ubukerarugendo bwo ku rwego rwo hejuru bwateye imbere, gusura Pariki y’Ibirunga ukirebera ingagi bisaba nibura amadolari 1500. Urubuga rwa visitrwanda.com rwerekana neza ko ari igihugu cy’imisozi igihumbi, abaturage bakira abantu neza gifite urusobe rw’ibinyabuzima, yaba mu birunga, mu mashyamba n’ibibaya.

Ubuyobozi bw’igihugu bwasinye amasezerano n’ikipe y’umupira w’amaguru ya Arsenal FC yo kumenyekanisha ubukerarugendo bw’u Rwanda. Mu kumenyekanisha isura y’igihugu kandi, u Rwanda rwasinyanye amasezerano n’ibigo mpuzamahanga bizobereye mu imenyekanishabikorwan’itumanaho nka Racepoint Global na Solimar.

Umuyobozi ujyana n’ibigezweho

Ku bijyanye n’itumanaho mu ikoranabuhanga rigezweho, Perezida Kagame ntiyasigaye inyuma kuko aba ku mbuga nkoranyambaga. Afite abantu miliyoni 1.5 bamukurikira kuri Twitter, 349,000 kuri Instagram na 953,000 kuri Facebook.

Ni umwe mu bayobozi ba Afurika bakoresha cyane izi mbuga. Akunda gufatana amafoto ya Selfie n’abandi biganjemo urubyiruko ruba rumwishimiye. Ashyira imbere umuryango.

Kagame yakoze byinshi mu guharanira uburinganire n’ubutabera rusange. Agaragaza ko ari hafi y’urubyiruko rw’u Rwanda. Yashyizeho gahunda ya “MeetThePresident”, inama ahuriramo n’urubyiruko 2000 akarushishikariza kwihangira imirimo.

Umukuru w’Igihugu kandi ashaka kugira u Rwanda igihugu cyo guhanga ibishya ari yo mpamvu ashora imari cyane mu ikoranabuhanga. Gahunda ya “One Laptop per Child”, yatangijwe mu 2008, ni urugero rw’ubushake bwa Perezida bwo guteza imbere ikoranabuhanga mu gihugu.

Indi gahunda yo gushima ni uburinganire bw’abagabo n’abagore, ihame ubu riri mu Itegeko Nshinga. U Rwanda nicyo gihugu cya mbere aho abagore ari benshi mu Nteko Ishinga Amategeko, ni abadepite 51 kuri 80 bagize Inteko Ishinga Amategeko.

Hari abavuga ko Kagame atari umuyobozi wubahiriza demokarasi, utubahiriza ubwisanzure bw’abantu. Abatavuga rumwe na we barafunzwe, abandi batinya ubutegetsi bwe. Bagendera ku wavugaga ko aziyamamariza kuyobora u Rwanda mu 2017, Diane Rwigara, kuri Internet hakagaragara amafoto ye yambaye ubusa mbere yuko afungwa.

Avuga ko byakozwe n’ishyaka riri ku butegetsi. Nyuma yakuwe mu bakandida mu matora Kagame yatsinze ku majwi menshi arenga 98%. Abandi bavuga ko icy’ingenzi gihari ari uko Perezida Kagame ari umuyobozi mwiza wagejeje igihugu cye ku burumbuke, akabasha kugeza abaturage ku mutekano ndetse n’iterambere ry’ubukungu.

Uko byagenda kose, Perezida w’u Rwanda yashoboye kubaka isura nziza n’igikundiro cye, mbere na mbere kuri we no ku gihugu muri rusange.

Iyi sura ntabwo ari amahirwe ahubwo ni umusaruro wo gutekereza neza, kugira umurongo ngenderwaho usobanutse no guhitamo neza abo mukorana. Ikibura ku bayobozi ba Afurika benshi havuyemo Kagame, ni uburyo bw’itumanaho buboneye bugendanye n’indangagaciro z’abaturage babo.

Muri Kanama umwaka ushize Perezida Kagame yahuriye n'urubyiruko mu Intare Conference Arena
Perezida Kagame ni umuntu utegwa amatwi cyane iyo ari kumwe n'abandi bayobozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza