00:00:00 IGIHE NETWORK KN KINYARWANDA EN ENGLISH FR FRANCAIS

Umukiranutsi yakora iki mu gihe cy’ibyago n’amakuba?

Yanditswe na Urinzwenimana Mike
Kuya 23 Mutarama 2021 saa 06:25
Yasuwe :
0 0

"Ariko umukiranutsi wanjye azabeshwaho no kwizera. Nyamara nasubira inyuma, umutima wanjye ntuzamwishimira. Ariko twebweho ntidufite gusubira inyuma ngo turimbuke, ahubwo dufite kwizera kugira ngo tuzakize ubugingo bwacu." (Abaheburayo 10:38; 39)

Umwanditsi wa Zaburi ya 11 muri Bibiliya Yera, yibajije ikibazo gikomeye kandi gisa n’ikigoye kukibonera igisubizo kigira giti:" Niba imfatiro zishenywe, umukiranutsi yakora iki?"

Iyo usomye iyi zaburi, bigaragara ko Dawidi yayanditse ari mu kaga gakomeye, ibigeragezo bimugose impande zose kandi amajwi y’icyo yakora yamubanye menshi yaba ayaturukaga imbere muri we no mu bamuzengurutse.

Bigaragara ko uburyo bwose n’ahantu hose hashobokaga yashoboraga gukura igisubizo cy’ibibazo yari afite hari hananiwe cyangwa hatagihari ariko abona ko yari asigaranye intwaro imwe yo kuba "umukiranutsi" bivuze ko intwaro yo kuba umwami, umusirikare ukomeye wishe goriyati, akica inzovu z’abafirisitiya n’ibindi byari byarangiye, byari byabuze igisubizo hasigaye gusa intwaro yo kwitwa umukiranutsi.

Mu buzima bwa muntu hari imfatiro aba yarubatseho ubuzima bwe, aha twavuga: umuryango ukomeye, amashuri menshi umuntu yize, amafaranga menshi atunze, abantu bakomeye baziranye, ubushabitsi bukomeye akora n’ibindi.

Abami n’abatware bo bizera ingabo n’intwaro zikomeye, imbaraga zabo bayoboye n’ibindi. Ariko hari igihe kigera izi mfatiro zikanyeganyezwa cyangwa zigakurwaho kandi zari zikenewe kugira ngo uzishingikirijeho atabarwe.

Isi yagiye ica mu bihe by’indwara z’ibyorezo bikomeye nk’ibyo irimo uyu munsi kubera Coronavirusi, byagiye bisenya imfatiro za benshi, aha twavuga nka La peste antonine (165-166), bivugwa ko ariyo yaje kuvamo indwara ya Variole.
Bivugwa kandi iyo yahitanye abantu bagera kuri miliyoni icumi. Iyo ndwara yayikomotseho bivugwa ko yatsinzwe burundu mu 1980.

La peste noire (1347-1353), iyi bavuga ko ariyo virus yabaye ikomeye cyane mu Isi ndetse banayise La grande peste kuko yishe abantu hagati ya miliyoni 25 na 40 mu Burayi kandi abo bari kimwe cya kabiri cy’abaturage u Burayi bwari bufite.

Grippe Espagnole (1918-1919), yari yatewe na virusi y’ubwoko bwa A H1N1. Iyi yari yaturutse muri Aziya, ihita iboneza muri Amerika, hanyuma u Bufaransa.

Iyi mu gihe gito yamaze, yahitanye abantu hagati ya miliyoni 20 na 30 mu Burayi gusa, naho mu rwego rw’Isi, yahitanye miliyoni 50. Bivugwa kandi ko hafi kimwe cya gatatu cy’abaturage b’Isi bayanduye.

Cholera (1927-1932) yatangiriye mu Buhinde, ikomeza mu Burusiya, Pologne, Berlin, u Bufaransa, Canada n’ahandi. Yahitanye abantu bagera ku bihumbi 100 mu gihe cy’amezi atandatu gusa.

Grippe asiatique (1956-1957), yari itewe na virus ya H2N2, bivugwa ko yabaye iya kabiri mu guhitana abantu benshi ku isi kuko yahitanye hagati ya miliyoni ebyiri n’eshatu.

Yatangiriye mu Bushinwa, Hong Kong, Singapore, Australie, Amerika y’Epfo, u Burayi, nyuma igera muri Afurika. Yaje guhindura isura ivamo indi virus yitwa H3N2, yabaye ikindi cyorezo mu 1968-1969, icyo gihe ifata izina rya Grippe de Hong-Kong.
Iyi ya kabiri niyo yatumye haboneka inkingo zizewe zo kuyihashya.

Sida (1981 kugeza ubu), yatangiriye i Kinshasa muri Zaire (RDC y’ubu) kugeza mu mwaka wa 2000, ubushakashatsi bwagaragazaga ko yari imaze guhitana abasaga miliyoni ebyiri, ndetse bivugwa ko ababana n’ubwandu bwayo kugeza ubu bangana na miliyoni 36,9.

Ibi n’ibindi tutavuze kandi biza byiyongera ku nzara n’intambara nabyo byasenye imfatiro z’abami n’abatware, abakomeye n’aboroheje.

Ikibazo Dawidi yibajije muri Zaburi 11:3, icyo umukiranutsi yakora igihe imfatiro zaba zisenywe, umwanditsi w’urwandiko rwandikiwe Abaheburayo yagitangiye igisubizo agira ati "Ariko umukiranutsi wanjye azabeshwaho no kwizera. Nyamara nasubira inyuma, umutima wanjye ntuzamwishimira. Ariko twebweho ntidufite gusubira inyuma ngo turimbuke, ahubwo dufite kwizera kugira ngo tuzakize ubugingo bwacu." (Abaheburayo 10:38; 39).

Dawidi we yibajije icyo umukiranutsi yakora ariko aha noneho umuntu yakwibaza icyo utari umukiranutsi yakora mu gihe imfatiro zaba zisenywe?

Abaheburayo babwiwe ko Umukiranutsi w’Imana yabeshwaho no kwizera igihe imfatiro zaba zisenywe ariko umwanditsi w’igitabo cya Yobu muri bibiliya Yera avuga ko utari umukiranutsi we icyo yakora ari ugushaka Imana.

Yagize ati: "Ariko ari njye ubu mba nshatse Imana, kandi Imana nkaba ari yo negurira ibyanjye. Ni yo ikora ibikomeye bitarondoreka, n’ibitangaza bitabarika. Ni yo ivubira isi imvura, igasandaza amazi mu mirima. Ni yo ishyira hejuru aboroheje, n’ababoroga ibashyira mu mahoro. Yica imigambi y’incakura, kugira ngo amaboko yazo adasohoza imirimo yazo. Kandi Imana itegera abanyabwenge mu buriganya bwabo, n’inama z’ab’incakura ikazubika. (Yobu 5:8-10).”

Muri iki gihe imfatiro zisa nkizasenywe kuri benshi kubera ingamba zo kwirinda ikwirakwira ry’icyorezo cya Coronavirusi. Abantu bamwe bari muri guma mu rugo, ibikorwa benshi bari bacungiyeho imibereho byarahagaze, hirya no himo mu gihugu naho ubwoba ni bwinshi, amakuru y’impuha ariyongera, abafite amadeni muri za banki babuze ayo bacira n’ayo bamira, ubuzima busa nk’aho bwaburiwe ishusho buri wese aribaza icyo yakora ngo ubuzima busubire mu buryo ariko igisubuzo nta kindi ni uko umukiranutsi w’Imana akomeza kuyizera akaba ariyo imubeshaho.

Naho uwari ugihanze amaso ku zindi mfatiro zitari ukwizera Imana nawe akayihindukirira, akayizera agashaka mu maso yayo, akizera agakiza ku buntu kabonerwa muri Kristo Yesu kuko umwizeye aba avuye mu rupfu ageze mu bugingo, nk’uko Yohana.

Ati:"Kuko Imana yakunze abari mu Isi cyane, byatumye itanga Umwana wayo w’ikinege kugira ngo umwizera wese atarimbuka, ahubwo ahabwe ubugingo buhoraho. Kuko Imana itatumye Umwana wayo mu Isi gucira abari mu Isi ho iteka, ahubwo yabikoreye kugira ngo abari mu Isi bakizwe na we. Umwizera ntacirwaho iteka, utamwizera amaze kuricirwaho kuko atizeye izina ry’Umwana w’Imana w’ikinege." (Yohana 3:16;18)

Wowe usoma iyi nkuru, humura kandi ndagutangariza ko urukundo rw’Imana ku buzima bwawe rurusha kure imbaraga za Coronavirus, rurusha imbaraga ibihuha kandi iyo urwikomejeho rutuma ugira amahoro no mu gihe cy’amakuba.

Pawulo yandikiye Abaroma abasobanurira iby’urukundo rw’Imana mu gihe gikomeye agira ati:"Ni nde wadutandukanya n’urukundo rwa Kristo? Mbese ni amakuba, cyangwa ni ibyago, cyangwa ni ukurenganywa, cyangwa ni inzara, cyangwa ni ukwambara ubusa, cyangwa ni ukuba mu kaga, cyangwa ni inkota?”

Nk’uko byanditswe ngo "Turicwa umunsi ukira bakuduhora, twahwanijwe n’intama z’imbagwa. Oya, ahubwo muri ibyo byose turushishwaho kunesha n’uwadukunze, kuko menye neza ko naho rwaba urupfu cyangwa ubugingo cyangwa abamarayika cyangwa abategeka, cyangwa ibiriho cyangwa ibizaba, cyangwa abafite ubushobozi, cyangwa uburebure bw’igihagararo, cyangwa uburebure bw’ikijyepfo, cyangwa ikindi cyaremwe cyose, bitazabasha kudutandukanya n’urukundo rw’Imana ruri muri Kristo Yesu Umwami wacu." (Abaroma 8:35-39)

Dawidi wibajije icyo umukiranutsi yakora imfatiro ziramutse zisenye muri zaburi ya 11:3, yageze muri zaburi ya 121:1-8, aguha igisubizo cy’ubuzima urimo uyu munsi agira ati"Nduburira amaso yanjye ku misozi, gutabarwa kwanjye kuzava he? gutabarwa kwanjye kuva k’uwiteka, waremye ijuru n’isi.”

“Ntazakundira ibirenge byawe ko biteguza, ukurinda ntazahunikira. Dore urinda Abisirayeli, ntazahunikira kandi ntazasinzira. Uwiteka ni we murinzi wawe, uwiteka ni igicucu cyawe iburyo bwawe. Uwiteka azakurinda ikibi cyose, ni we uzarinda ubugingo bwawe. Uwiteka azakurinda amajya n’amaza, uhereye none ukageza iteka ryose." (Zaburi 121:1;8)

Humura, kora ibyo ushoboye wubahiriza ingamba zose zo kwirinda Coronavirus, ibyo udashoboye hari Imana ibishoboye, ukomeze uyizere kandi niba wari utarayizera iki nicyo gihe gikwiye cyo gusubiza amaso inyuma ukayishaka kuko imfatiro wari wishingikirijeho isaha iyo ariyo yose zasenywa!


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .