Uganda ntiyavuga ko ikunda Rwigema ngo ikorere Abanyarwanda iyicarubozo

Yanditswe na Albert Rudatsimburwa
Kuya 4 Ukwakira 2019 saa 10:20
Yasuwe :
0 0

Ku wa 2 Ukwakira 2019 nibwo mu kinyamakuru cya Leta ya Uganda, The New Vision, hasohotse inkuru yahawe umutwe ugira uti “Rwigyema yaraturokoye –Janet Museveni”, yari igamije kuzirikana ubuzima bwa Gen Fred Gisa Rwigema.

Rwigema ni intwari yo ku rugamba, kimwe n’ibindi bihumbi by’urubyiruko rw’Abanyarwanda babaga muri Uganda muri icyo gihe, bitangiye kubohora Uganda, nyuma abayobora ku rugamba rwo kubohora igihugu cyabo, u Rwanda.

Ku wa 2 Ukwakira 1990, isasu ry’umwanzi ryafashe Rwigema mu mutwe ari ku rugamba. Yitabye Imana. Aho kwishimira iyi ntwari itaratinyaga, ubuyobozi bwa Uganda bwahisemo kuyitatira.

All Saleh bivugwa ko yari inshuti ye ikomeye, icyo avuga yibuka ni uko yitaye ku muryango wa Rwigema amaze gupfa. Museveni we ngo yibuka “umuhungu muto”. Inkuru y’amagambo hafi 1500 agenda agaruka ku wo bita “umurinzi”.

Bisa nk’aho umuhungu muto Museveni yahuye na we mu myaka ya za 1970 arangije amashuri yisumbuye atigeze akura no mu myaka ya 1990. Ariko uku kwishyira hejuru gutuma yita abantu bakuru “abasore bato”, biri mu bituma ahora abwira abayobozi b’amahanga ko ubuyobozi bw’ibihugu bifite ubusugire, “ntibajya banyumva.”

Hari ubwo Rwigema yari umusore muto ndetse n’umurinzi. Ariko yapfuye nka General Major muri National Resistance Army (NRA), ari nayo yaje kubyara Uganda People’s Defense Force (UPDF). Yanabaye Minisitiri wungirije muri Repubulika ya Uganda. Rwigema yanabaye Umugaba w’Ingabo kuva mu 1983 kugeza mu 1986 ubwo NRA yafataga ubutegetsi.

Mu 1983 yafashe uwo mwanya ubwo nyuma y’uko Gen. Elly Tumwine yari agiye i Nairobi kwivuza amaso. Tumwine yagumye i Nairobi mu gihe cyose cy’urugamba rukomeye, kuva mu 1983 kugeza mu 1986.

Yavuye i Nairobi ngo asubirane umwanya we wari ufitwe na Rwigema urugamba bamaze kurutsinda mu 1986, nk’uko byanditswe na William Pike mu gitabo yise “Combatants: A memoir of the Bush War and the Press in Uganda.”

Kubera iki Rwigema yakomeje kuyobora nk’umwungiriza? Rwigema ntiyahishaga ko ari Umunyarwanda. Ibyo bikagira ingaruka ko adashobora kuba Minisitiri w’Ingabo cyangwa Umugaba w’Ingabo. Byari kuba bivuze ikintu gikomeye muri politiki.

Kuri paji ya 209 Pike yagize ati “Rwigema ntabwo yashoboraga kugirwa Umugaba w’Ingabo kuko yasri impunzi y’Umunyarwanda.”

Nyamara bamwe muri bagenzi be bishakishirizaga amahirwe wasangaga bigize Abanya-Uganda, bakiyita Abahima.

Rwigema n’abandi Banyarwanda benshi babohoye Uganda nyuma bakanabohora igihugu cyabo, bari abantu badashobora gukora icyo bagenzi babo bakoze kubera gusa ubusambo no kwiyanga. We kimwe n’abandi bari biteguye kurenza amaso ibintu byose byabasabaga kubanza kuzibukira ko ari Abanyarwanda.

We kimwe n’abandi benshi, bari bafite amahame bagenderaho, atari uguterereza amahirwe ayo ariyo yose no gushaka kwigwizaho ibintu. Ni ukuri ko Fred Rwigema atari kwiyita Umuhima ngo akunde agire ibyo ahabwa cyangwa kubera ubusambo nka Maj. Gen. Pecos Kutesa, Lt Gen Henry Tumukunde, Brig-Gen Abel Kandiho, n’abandi mu nzego zo hejuru z’igisirikare cya Uganda, bahisemo kwituriza bakiyita Abanya-Uganda bagahitamo kugaragariza urwango inkomoko yabo nyakuri.

Rwigema yahaze ubuzima bwe muri NRA aharanira gusubiza agaciro Abanyarwanda bari bakomeje gutoterezwa muri Uganda, by’umwihariko ku butegetsi bwa Obote. Ibyo byatumye ibihumbi byinshi by’Abanyarwanda bajya muri NRA.

Bityo Rwigema yabohoye Uganda kubera ko yakundaga Abanyarwanda. Ababohoye Uganda kubera ko bikunda ubwabo bagumyeyo ndetse bakomeza kwihakana inkomoko mu Rwanda. Baracyabikora kugeza magingo aya.

Rwigema agomba kuba ashavurizwa mu mva ye no kubona abantu bamuhunda ibisigo ari nabo batoteza batumye ajya muri NRA ngo abarengere: Abanyarwanda bari muri Uganda. Ntabwo watoteza Abanyarwanda ngo nurangiza uvuge ko ukunda Rwigema.

Ibi ntabwo bishoboka. Bigaragaza ko ubuyobozi bwa Uganda buba burimo kwishimira umuntu bwibagiwe kera cyangwa uwo batigeze bafata umwanya ngo babanze kumenya, kubera ko icyo barebaga gusa kwari ukumwifashisha ngo bagere aho bari none.

Niba ubuyobozi bwa Uganda bushaka kwibuka Rwigema, bukwiye kurekura Abanyarwanda bose bafungiwe muri kasho zitazwi z’icyo gihugu bukaniyemeza guhagarika itotezwa ribakorerwa muri icyo gihugu. Nyuma y’ibyo, bazaba barimo kubahiriza amategeko.

Igitangaje, Abanyarwanda bihinduye Abanya-Uganda binyuze mu kwiyita Abahima ubu ni bo barimo guhohotera bene wabo muri Uganda. Mu kugerageza gushaka kwigira Abagatolika kurusha Papa, bibwira ko bashimangira Ubunya-Uganda bwabo - nabwo bushidikanywaho mu bitekerezo byabo - mu kwanga u Rwanda n’Abanyarwanda.

Bazakora ibishoboka byose mu kurwana n’uyu muzimu bagendana: Ikibazo cy’inkomoko. Ibaze kwadukira intwari nka Rwigema ukayifashisha nk’intwaro yo gucamo ibice abaturage bawe, nubwo atari ko waba ubafata.

Rwigema yakundaga abantu yagiye kurwanana nabo mu kubohora Uganda, no mu gihe yari umurinzi wabo. Yarabitangiye abageza ku butegetsi. Agatima yabagiriraga ni uko bari basangiye Ubunyarwanda. Kimwe na we, bari Abanyarwanda. Nyamara bo bitandukanyije n’inkoko yabo.

Kwiyanga ni byo biranga politiki idafite amahame igenderaho ikomeje guteza ukutumvikana hagati y’ibi bihugu bibiri, ndetse yigeze gutuma bijya mu ntambara. Guharabika urwibutso rwa Rwigema ni ikindi kigaragaza uko iki kinyamakuru cya leta gikomeje kugana ahabi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza