00:00:00 IGIHE NETWORK KN KINYARWANDA EN ENGLISH FR FRANCAIS

Ubutumwa bwa Kagame kuri Afurika: ‘Discours’ zavuzwe zirahagije, dushyire mu bikorwa ibyo twiyemeje

Yanditswe na Joseph Kamanzi
Kuya 14 April 2022 saa 01:33
Yasuwe :

Umuhanda wa Gari ya Moshi uva ku Cyambu cya Mombasa muri Kenya ukagera i Kigali wagombye kuba ugeze ku ntambwe nziza. Igiciro cy’ingendo zo mu kirere imbere ku mugabane cyari gikwiye kuba kimwe cya kabiri cy’uko gihagaze uyu munsi cyangwa kinari munsi kurushaho.

Kugeza ubu, ikiguzi cy’ubwikorezi bw’ibintu na serivisi byambukiranya imipaka byagombye kuba byaragabanutse iyo ibijyanye n’isoko rusange rya Afurika biba bitabikwa mu tubati.

Mu gihe hari ababona ubu bukererwe nk’ikintu gisanzwe, mu Rwanda, ni ihame gukora ibyo twiyemeje nta kuzarira. Perezida w’u Rwanda, Paul Kagame yahagurukiye kurwanya icyatuma habaho uburangare mu gushyira mu bikorwa gahunda zemeranyijweho mu bihugu bitandukanye.

Igikorwa cya vuba aha ni uruzinduko yagiriye muri Repubulika ya Congo. Mu mbwirwaruhame yavugiye mu Nteko Ishinga Amategeko mu Murwa Mukuru Brazaville, Kagame yagaragaje urutonde rw’imishinga n’ibikorwa byerekeye Afurika bigomba gushyirwa mu bikorwa.

Perezida Kagame yagize ati “Tuzi ibibazo Afurika ihanganye na byo. Kandi tuzi n’ibisubizo byabyo. Ikibura ni uguhagurukira hamwe, tukava mu magambo tukajya mu bikorwa bwangu.”

Mu cyumweru gishize, Repubulika Iharanira Demokarasi ya Congo, yujuje ibisabwa kugira ngo yinjire mu Muryango wa Afurika y’Iburasirazuba (EAC).

Ibi byatumye abaturage b’ibihugu biri muri uyu muryango bagera kuri miliyoni 300, ikintu gifungura amahirwe mu nzego zitandukanye z’ubuzima haba ku bo mu karere no hanze yako.

Inama yo kwakira RDC yabereye i Nairobi muri Kenya, yakiriwe na Perezida wa Kenya, Uhuru Kenyatta initabirwa na Perezida wa Uganda, Yoweri Kaguta Museveni.

Perezida Kagame yongeye kugaruka kuri ubu butumwa: Yego, RDC yinjiye mu muryango wacu, igifite agaciro ni uburyo Abanye-Congo bazabigiramo inyungu. Ukuza kwa DR Congo, ubwayo yonyine, nubwo ari intsinzi ikomeye cyane, bigomba kubonwa nk’intangiriro - hamwe n’ibindi byinshi bitegerejwe ku meza.

Kagame yabwiye bagenzi be ati “Twavuze imbwirwaruhame nyinshi mu myaka ya vuba aha. Tugomba kumanuka tugakora akazi gakubiye mu magambo twabwiye abantu bacu. Ndi kumwe namwe mu rugendo rwose kugira ngo tugere ku ntego yo kurushaho kwishyira hamwe kw’umuryango wacu.”

Ubutumwa nk’ubu Perezida Kagame yakunze kubugarukaho kuva mu myaka yashize.

Ubwo habaga inama ya 14 ku mishanga y’umuhora wa Ruguru yabereye i Nairobi muri Kenya muri Kamena 2018, ibikorwa bitandukanye byari byemeranyijweho mu myaka ine ishize byari bikiri inyuma. Umuhora wa Ruguru ni inzira y’ubwikorezi ihuza u Rwanda, Uganda, Tanzania, Sudani y’Epfo na Kenya.

Mu by’ukuri, igihe inama ya 14 yabaga, abayobozi ubwabo bari bateraniye hamwe kugira ngo basuzume iterambere ryabayeho mu myaka ibiri yari ishize.

Kagame yagize ati "Ndashimira Perezida Kenyatta kutwakira no kongera kudutumira nyuma y’imyaka ibiri kugira ngo dukomeze imbaraga twatangiranye mu karere kacu. Ariko uyu mwanya uratanga amahirwe yo kongera gusuzuma ibyakozwe n’ibyo dukeneye gukora.”

Ikindi kibazo gikomeye ku mugabane Kagame yashyizemo imbaraga ngo gikemurwe ni ikiguzi cy’ingendo zo mu kirere kuva mu gihugu kimwe ujya mu kindi.

Birahenze cyane kuva i Kigali ujya i Kinshasa muri Repubulika ya Demokarasi ya Congo (icyerekezo kimwe ni amadolari 358) kurusha kuva i Kigali ujya mu Bwongereza (icyerekezo kimwe ni amadolari 317)-mu gihe ari ku wundi mugabane. Ibi ni ibiciro nibura byatanzwe n’ibigo bibiri by’ingendo mpuzamahanga ariko ibiciro biri hejuru bitewe na sosiyete y’indege.

Kuba ibirere bya Afurika bifunze byatwaye umugabane arenga miliyoni 700 z’amadolari mu 2015 n’arenga miliyoni 800 mu 2016 mu gihe u Burayi bwungutse agera kuri miliyari 35,6 mu 2016 nk’uko byatangajwe Ikigo Mpuzamahanga gishinzwe Ingendo zo mu Kirere (IATA).

Inama ya kabiri ya Aviation Africa (AVAF), yabereye i Kigali muri Gashyantare 2017. Afurika Yunze Ubumwe yari yariyemeje mbere y’imyaka 15 kuzamura urwego rw’ingendo zo mu kirere.

Kuri Perezida Kagame ariko ntibihagije gukuraho inzitizi zibangamiye iterambere ry’ingendo zo mu kirere hatabayeho kubaka ubushobozi mu nzego zose zibangamiye iterambere ry’uru rwego.

Ati “Gukuraho inzitizi ni ihame ariko ntibihagije. Dukeneye kubaka ubushobozi mu buryo butandukanye mu rwego rw’ingendo zo mu kirere.”

Agaruka ku bya sosiyete y’u Rwanda y’ingendo zo mu kirere (RwandAir) na Ethiopian Airlines, Kagame yagize ati “U Rwanda ruracyiyubaka ariko ruhuza ibice byinshi mu Karere. Ethiopian Airlines yinjiza za miliyoni. Turamutse tudafunguye ikirere ngo dukureho izo nzitizi tuzagira igihombo kinini.”

Ikindi gikorwa Kagame yagizemo uruhare ni ‘One Africa Network (OAN) cyatangijwe mu 2016 nyuma y’Inama ya Afurika Yunze Ubumwe yabereye i Kigali.

OAN ni gahunda yari igamije gufasha ko itumanaho ry’imbere ku mugabane ritekana ndetse rigahenduka hagamijwe kwihutisha imibereho n’ubukungu by’umugabane.

Uru ni urundi rugero: Byari bihendutse guhamagara muri Leta Zunze Ubumwe za Amerika na Canada kurusha uko byari bimeze mu gihe umuntu ahamagara mu bihugu byo muri EAC. Wishyuzwa cyane iyo ujyanye telefone hanze y’imipaka. Iki kiguzi ugisabwa mu gihe uhamagara cyangwa witaba na bwo kiri hejuru. Ibiciro byo guhamagara biracyahenze nk’uko ibigo by’itumanaho ubwabyo bibigaragaza.

Kubera iki serivisi zihutirwa n’ibikorwaremezo byafata igihe kirekire? Inararibonye indorerezi mpuzamahanga zifite ku Rwanda ni uko guverinoma yita ku ishyirwa mu bikorwa ry’imishinga. Ahandi henshi, imishinga ntishyirwa mu bikorwa. Imihanda ifata imyaka mirongo kugira ngo yubakwe. Kugira ngo amashuri yubakwe biba ari ingorabahizi. Ahanini usanga nta kigenda.

Perezida Kagame, ubudasiba ashyigikira ibisubizo, ibisubizo, ibisubizo. Mu magambo ye bwite ati “Tuve mu mihango, tujye mu bikorwa.Tuzi igikwiye gukorwa. Mubyaze umusaruro serivisi za leta zihari. Twe (guverinoma) tuzakomeza kwaguka no kubateza imbere, kandi dushyigikire ubusugire bwa rubanda.”

Perezida Kagame ubwo yagezaga ijambo ku Nteko Ishinga Amategeko ya Repubulika ya Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .