00:00:00 IGIHE NETWORK KN KINYARWANDA EN ENGLISH FR FRANCAIS

Tuvuge ku kibazo cy’ibyo kurya byihuse muri Kigali

Yanditswe na Mukiza H.
Kuya 22 Mata 2021 saa 12:28
Yasuwe :
0 0

Ubwo nandikaga nari mfite amafaranga ibihumbi bitatu (3000 Frw) ndi gushakisha ikintu nafata cyo kurya cya mu gitondo. Kubera izindi nshingano nari mfite zihuta ntabwo nabonye umwanya wo kuva mu rugo hari icyo mfashe.

Byageze saa tatu zuzuye ndi mu biro by’imwe mu nyubako iherereye mu Mujyi wa Kigali rwagati! Ntabwo byoroshye kuko kugeza ubwo nari mfite amahitamo nk’abiri gusa! Icya mbere ni uko nakoresha bwa buryo bw’ikoranabuhanga nkatumiza ibyo kurya! Ariko aha naho harimo ibibazo bibiri bikomeye!

Icya mbere ni ugutinda! Ndamutse nkoresheje ubwo buryo ni ukuvuga ko ibiryo byari kungeraho hafi saa yine! Ariko kandi usibye no gutinda byansaba no kongera amafaranga cyangwa nkatumiza utuntu duke tutari bufate mu nda kuko nitwo twajyana n’ibihumbi bitatu nkurikije ibiciro bya ziriya serivisi.

Andi mahitamo ya kabiri ni ugusohoka nkajya kugura ibisuguti cyangwa amandazi n’amata, ibintu ntashobora gukora! Nta hantu napfa kubona ibiryo byihuse nahita mpakira nkasubira mu biro gukora. Iki ni kimwe mu bibazo bikomeye ubuyobozi bw’Umujyi wa Kigali bugomba gukemura.

Dufate urugero ko uri gusoma iyi iki gitekerezo saa tatu n’igice z’amanywa, kandi ufite inama saa tatu na mirongo ine n’itanu! Mbwira niba ushatse kurya hari aho wabona ibiryo byihuse hafi yawe?

Uyu mujyi wa Kigali umaze gutera imbere mu bintu byinshi harimo inyubako zigezweho, kuwurimbisha n’ibindi. Ariko ikibazo cy’ibiryo kiracyari ingorabahizi cyane. Uko umujyi ugenda utera imbere ni ko ibiryo byihuse birushaho kuba iyanga ku batari bake.

Ubundi mbere wasangaga hari n’ahantu henshi bacuruza ibivuguto n’utundi bijyana turimo ibijumba bikaranze n’ibindi. Ariko uyu munsi biri kugenda nabyo bikendera kubera amabwiriza ahanini atuma gucuruza mu buryo buciriritse bisa nk’aho bidashoboka.

Umuntu utariye ntashobora gutekereza neza ndetse biragoye ko yatanga umusaruro wifuzwa. Muri uyu Mujyi wa Kigali iyo saa sita zigucitse utariye bikaba byagera na saa munani ubwo biba bivuze ko nta handi wapfa kubona icyo ushyira mu nda cyereka wenda bya bindi abaganga batubuza birimo amandazi, ibisuguti n’ibindi! Aha ndavuga ku bantu b’amikoro aringaniye.

Ahandi ikijyanye no kurya baragikemuye! Uko uhagaze ubona ibiryo kandi byiza! Nk’ubu mba namaze kwikoza hanze muri metero nke bakampfunyikira akaguru k’inkoko, ifiriti se, n’ibindi! Ariko muri uyu mujyi wa Kigali n’iyo wabibona mu masaha atari aya saa sita byagusaba kuzenguruka ahantu hose ubaririza, wanabibona ugasanga birakosha kuko ababicuruza bakorera mu nzu bishyura ibihumbi za magana buri kwezi!

Nashimye uburyo ubuyobozi bushya bw’uyu mujyi wacu bworohereje abantu kuvugurura inzu! Bimwe babasabaga kubaka imiturirwa kandi nta mikoro ahagije bisa n’ibyadohowe abantu batangira kuvugurura mu bushobozi bwabo buke. Ibi twabibonye i Nyamirambo, Kicukiro ubu na Remera kuri gare niko biri gukorwa. Rwose ni byiza turashima!

Hanyuma rero ni na byiza ko umujyi wacu ugira isuku kandi ababishinzwe bakawurinda akavuyo ariko rwose mushake n’uko mushyiraho ahantu abantu bashobora kugurira ibiryo byo kurya ako kanya bya make ndetse amasaha ayo ariyo yose.

Hashobora gushyirwaho uburyo abacuruzi baciriritse bashyira mu bikorwa iyi gahunda kuko ntibibananiye ndetse hari n’abagiye babigerageza ariko ikibazo ugerageje kubikora bamubwira ko ari umwanda azanye cyangwa se ubundi ugasanga baracibwa intege n’amafaranga bakwa y’amoko atandukanye maze ibitoki 4 byakaguze nka 400 bikarangira bihagaze 2000.

Mwabereka uko babikora badateje umwanda ariko batanisanze mu ikorosi ryo gucibwa amafaranga batinjiza.

Umushinwa iyo ashaka kukubaza amakuru ngo amenye ko umeze neza arakubaza ngo “Wariye?” “你吃了吗”

Murakoze!

Ubwanditsi: Ibikubiye muri iyi nyandiko ni ibitekerezo bwite by’umwanditsi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .