00:00:00 IGIHE NETWORK KN KINYARWANDA EN ENGLISH FR FRANCAIS

Kurwanya abahakana Jenoside: Nta bwumvikane bukenewe ku kwemera ukuri

Yanditswe na IGIHE
Kuya 24 Mata 2021 saa 03:26
Yasuwe :
0 0

Ububi bwo guhakana Jenoside ni cyo kintu nashoboraga kwizera ko ibigo by’amashuri byubashywe bitazigera byijandikamo. Nk’abarimu, abo bakorana ndetse n’abanyeshuri bajijutse ba Kaminuza ya Cambridge bakamenya ubwicanyi ndengakamere bwakorewe Abatutsi barenga miliyoni mu gihe cy’amezi 3 mu myaka 27 ishize, muri Jenoside yaturutse ku rwango rw’ubwoko, ari narwo u Rwanda rwashatse kurandura kuva icyo gihe.

Izi mbaraga zo komora ibikomere no kunga Abanyarwanda zashingiye ku cyifuzo cy’igihugu cyo guhangana n’ukuri kwari icuraburindi. Biteye isoni ko Judi Rever, umunyamakuru ushidikanywaho, uhakana Jenoside kandi ushyigikira iterabwoba, ashobora guhabwa urubuga mpuzamahanga akagoreka ukuri kwacu muri ibi bihe by’ihungabana ku Barokotse Jenoside n’imiryango yabo.

Ishyano ryo guha uruvugiro abantu bakwirakwiza ko habayeho Jenoside ebyiri nka Rever bakagirwa ngenderwaho mu gusesengura byimbitse Jenoside (kandi akoresha inyandiko zidasobanutse ndetse akavuga ko yahawe amakuru n’abantu atagaragariza imyirondoro) muri Kaminuza iri mu za mbere ku Isi ari yo Cambridge, biteye ubwoba.

Ikibabaje kurushaho ni ubugome buziguye buhora bushyigikiye urwango n’ikinyoma usanga bikorwa n’Abazungu (cyangwa bishingiye ku nyungu z’abo mu Burengerazuba bw’Isi) kandi ingaruka zabyo ziza ku Banyafurika.

Akamaro k’ibiganiro bishingiye ku bigaragara

Mu bihe byo kwibuka Jenoside yakorewe Abatutsi hakunze kugaragara ibibazo byo gukomeretsa imutima. Abarokotse berekana ibimenyetso bifatika bitabarika bumvikanisha ukubabazwa gukabije bakorewe mu 1994 ariko igishengura cyane ni uko muri ibyo bihe ari bwo abo bifatanya n’abakoze Jenoside nka Judi Rever (n’abandi ntakwirirwa ndondora) bagerageza kurushaho gusunikira inkota muri bya bikomere, bagatuma abarokotse batabikira kubera uko batesha agaciro ihungabana ryabo.

“Guhindura intekerezo z’umuntu umuhatira kwibaza ku byo atekereza, ku byo yanyuzemo n’ibiri kumubaho” si uburyo bushya bwo gutesha umutwe Abanyafurika bagiriwe urwango butuma bibaza ku mateka yabo n’ibibaranga. Bwagiye bunakoreshwa n’impuguke zo mu Burengerazuba bw’Isi zikora inyandiko ku bukoloni ku Banyafurika.

Ku kibazo cy’u Rwanda, byarakoreshejwe mu gushyira mu rujijo abantu bose ku mateka yabo uyahurije hamwe. Nta Munyarwanda ushobora kongera kwemera kwamburwa ubumuntu nk’iby’ahahise, gukandamizwa no guterwa ubwoba.

Icyakora twarababaye cyane nta mahitamo dufite. Kuvura ibikomere by’Abanyarwanda bishingiye ku guhangana n’amateka yacu ashaririye no kurwanya twivuye inyuma ibyo abo bo mu Burengerazuba bw’Isi bahakana, bayavugaho bashaka kuyasobanura ukundi.

Irondaruhu rishingiye ku busumbane

Ikinyuranyo kiri hagati y’ihakana rya Jenoside yakorewe Abayahudi n’iyakorewe Abatutsi bigaragaza ugutesha agaciro ubuzima bw’Umunyafurika. Nshimishijwe cyane n’uko abahakana Jenoside yakorewe Abayahudi batabarizwa ubutitsa ngo bagezwe imbere y’ubutabera, ariko nkanashengurwa n’uko iyo bigeze ku Banyafurika bakomeza kwishyirira agati mu ryinyo.

Na none kandi, gutakaza ubuzima ku bo mu Burengerazuba bw’Isi byagiye bifatwa nk’ikintu kibi cyane mu myaka myinshi yaranzwe n’ubunyangamugayo bwo kumva agahinda k’undi, abakoze ibyo byaha bakabiryozwa, naho abo byagizeho ingaruka n’imiryango yabo bagahabwa indishyi.

Ku rundi ruhande, guhangana no kwikura mu kaga, urupfu no kwamburwa ubumuntu biracyajyanishwa no gusobanura ibiranga Umunyafurika.

Itangazamakuru ryo mu Burengerazuba bw’Isi ryitwaza ubuzima turimo bugoye rigakuririza inzangano zishingiye ku moko ngo zatangiye kera (ntirigaragaze uruhare rw’abakoloni mu gutangiza izo nzangano), kuvuga imibare y’Abatutsi bazize Jenoside itari yo ku bushake ndetse no kwemera ibitekerezo by’uko habayeho jenoside ebyiri byatumye Isi itumva agahinda k’Abanyarwanda muri rusange by’umwihariko Abarokotase Jenoside.

Ahubwo abo bari mu mwanya wo kuba bahoza bakanavura ibikomere, bagaragajwe nk’abantu babi ndetse bashinjwa kwitwaza akababaro kabo nk’igikoresho cyo kwanduza isura nziza y’umukoloni.

Hagaragazwa ko Umunyafurika utabangamirwa n’amarangamutima ya kimuntu afuditse agaragarizwa n’abo mu Burengerazuba, adashobora mu by’ukuri kugira akababaro nyako. Ku bw’ibyo, nta hungabana rihari ryakwemerwa cyangwa akarengane.

Aha ngaha irondaruhu ni inkota ifite uturumyo tubiri: kamwe mu kiganza kerekana abantu nka Judi Rever bashimagiza abakoreye ibyaha Abanyafurika, akandi kakaba ku nzirakarengane z’Abanyafurika bitezweho kwemera kugorekerwa ukuri mu buryo batigeze bifuza; bagahakana ubumuntu bwabo ndetse bakibagirwa ibihe byabagoye.

Mu buryo buninura, buri karengane abo mu Burengerazuba bakorera Abanyafurika gahurirana n’ingufu baba bashyira mu guharanira ko ababo bafatwa nk’abantu. Hari amategeko menshi ahana ihakana rya Jenoside yakorewe Abayahudi, yose agamije kwibutsa ko ari ngombwa kurinda ukuri kwayo mu kurwanya ivangura bakorerwa.

Mu Bufaransa, itegeko rya Gayssot ryatowe mu 1990, rigena ko guhakana bifatwa nk’ibyaha byibasiye inyokomuntu. Kuva ubwo mu Bufaransa hahise hashyirwa umucyo ku byo kwirengagiza ibyabaye.

Kwemera imurikwa n’ikwirakwizwa ry’igitabo cya Rever, ni kimwe mu bigamije kwibutsa Raporo ya Duclert igaragaza uko Guverinoma y’u Bufaransa yariho yitwaye “buhumyi” mu mugambi wa Leta y’Abahutu yari ifitanye umubano nayo yagerageje kumaraho Abatutsi mu 1994.

Muri ibyo byombi, uko “kudafasha Abazungu badafite amakuru”, binyuranyije n’uruhande bagombye guhagararaho mu gutegeka ibikwiye kwimakazwa mu mibereho y’Isi, kuko bibuza abo mu Burengerazuba gukora igikwiye iyo bigeze kuri Afurika.

Kaminuza ya Cambridge yahaye ijwi icyifuzo cyo guhakana ibitekerezo bishingiye ku irondaruhu, yewe inatangiza iperereza ku bifite aho bihuriye n’ubucuruzi bw’abacakara. Cambridge kimwe n’ibindi bigo by’Abongereza bifite amazina akomeye muri iki gihe, byagaragaje ko hari inyungu y’amafaranga yavuye mu bukoloni n’ubucuruzi bw’abacakara.
Ariko biteye isoni nka Kaminuza kuvuga kuri ibi bijyanye n’amateka nta bimenyetso utanga! Cambridge ubu iri gushyira imbaraga mu gushyigikira Rever imuha urubuga rwo kugaragarizaho ibitekerezo bye.

Imbuto yo kwambura ubumuntu ikurana ikinyoma gitoshye kivuye mu butaka buhehereye buyikikije, ariko ntizongera guterwa. Ku bw’amahirwe, hari ibihamya byemejwe kandi byashyizwe ahagaragara bisenya amanjwe ya River.

Nta mwanya ku batumva agahinda kacu

Abishe Abanyarwanda bakingiwe ikibaba n’itangazamakuru ndetse ribagaragaza nk’abantu beza byitirirwa “guteza imbere demokarasi” muri Afurika. Igitekerezo cy’ “ubwisanzure bwo kuvuga” bwuzuye gikomeza gushyigikirwa cyane n’abakoloni nk’aho ari uburenganzira bwa muntu, bigashyirwa hejuru y’uburenganzira bwo kubaho ku Batutsi nta vangura bakorerwa no guhinyuza akababaro kabo bitiza umurindi ihakana.

Ariko niba badashobora na rimwe kwemera ubwisanzure kuri abo bafite imitekerereze mishya y’Aba-Nazi mu Burayi nka kimwe mu by’ingenzi byakubaka demokarasi y’Abanyaburayi ahubwo bakumva bibereye Abanyafurika, bigomba kwibazwaho.

Kuba Judi Rever yahabwa urubuga rwo guhakaniraho, kugabanya uburemere no gutesha agaciro intimba y’Abanyarwanda batabarika, ni yo mpamvu Abarokotse Jenoside bagomba gukomeza umutima bakagaragaza uko hageragejwe kubamaraho, ari nako bibuka abo bakundaga bishwe muri Jenoside mu 1994.

Abakoze Jenoside bahawe ubuhungiro mu Burayi, aho bapangira neza ibikorwa byabo by’iterabwoba ku Banyarwanda, ari nako bakomeza gushaka uko bazagaruka ku butegetsi “bakuzuza ako kazi”, ibintu bahora bifuza kenshi. Aho niho batererwa ingabo mu bitugu n’abo mu Burengerazuba babafasha gusobanya amateka y’Abanyarwanda bo bateye ubwoba ndetse bagikomeje kubutera.

Ububi bwabyo ni uko bitaba nk’impanuka, kandi si ni ikintu cyo gushimirwa. Igituma bibabaza kurushaho ni uko bikorerwa Abanyarwanda na bagenzi babo b’Abanyafurika, bagerageza kugaragaza ukuri, cyangwa icyubahiro cyabo.
Birashoboka ko iyo amateka yacu asharira aba atarabagariwe n’imvugo zihembera urwango, Abanyarwanda ntibari gushobora kwamagara abapfobya.

Ku rundi ruhande, dufite ibikomere bidashobora kwirengagizwa. Uko Abanyarwanda bazakomeza komora ibikomere uko bikwiye, ihungabana ryabo rizumvikana, inkuru zabo zigomba kurindwa mu buryo bw’ukuri, ndetse abazishyiramo ibinyoma bakamaganwa. Kugira ngo ubutabera bugerweho bizahora bisaba ubunyangamugayo tudashobora kubaza umuntu utemera ukuri.

Iyi nkuru yanditswe mu cyongereza na Veronique Nyiramongi Mbaye itambuka kuri Panafrican Rreview, ishyirwa mu kinyarwanda na IGIHE


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .