Kuki iyo havuzwe ifungwa n’ifungurwa ry’insengero benshi bumva amaturo?

Yanditswe na Urinzwenimana Mike
Kuya 9 Mutarama 2021 saa 01:00
Yasuwe :
0 0

Kuva Ishami ry’Umuryango w’Abibumbye ryita ku Buzima (OMS) ryakwemeza COVID-19 nk’icyorezo kibangamiye Isi, Leta zitandukanye zarakangutse, zishyiraho ingamba zo kwirinda ikwirakwira ryacyo.

Mu Rwanda muri izo ngamba zashyizweho harimo izo kubuza abantu guteranira hamwe, bakaguma mu rugo ari nabyo byatumye icyo gihe insengero ndetse n’ahandi abantu bateraniraga hafungwa.

Kimwe n’ibindi bikorwa byatumaga abantu bihurira hamwe, amateraniro yatangiye gukorwa mu buryo bw’ikoranabuhanga buzwi nka online.

Igihe ubwo buryo bwatangiraga gukoreshwa, abayobozi b’amatorero amwe n’amwe batangarije abayoboke b’amatorero yabo uburyo bushya bwo gutanga amaturo n’ibyacumi bakoresheje ikoranabuhanga babinyujije kuri konti za banki, MoMo ndetse na Airtel Money.

Ubu buryo bushya bwo gutura bwatanzwe n’abayobozi b’amatorero nk’imwe mu ngamba yatanzwe yo kwirinda guhererekanya amafaranga mu ntoki, bwazamuye impaka nyinshi, benshi babashinja ko ikibaraje ishinga atari ubuzima bw’abayoboke babo ahubwo ko ari amaturo babakuramo. Hari n’abataratinye kuvuga ko abayobozi b’amadini n’amatorero muri kino gihe turi mu cyorezo cya COVID-19 bari bakwiye gufata mu maturo abayoboke babo batuye mbere y’icyorezo agakoreshwa mu gutabara ubuzima bwahuye n’ingaruka z’iki cyorezo.

Mu 2020 ubwo ingamba zo kwirinda COVID-19 zagendaga zoroshywa ibikorwa bimwe bikongera gutangira, insengero zakomeje gufungwa ariko taliki ya 15 Nyakanga 2020 nibwo Inama y’Abaministiri yemeje ko insengero zongera gukora ariko uburenganzira bwo gufungurwa bukajya butangwa n’ubuyobozi bw’inzego z’ibanze zimaze kugenzura ko hubahirijwe amabwiriza ya Minisiteri y’Ubuzima, insengero zimwe zarafunguwe, abantu batangira guterana.

Icyo gihe ku mbuga nkoranyambaga, havutse impaka zigaragaza ko igituma abayobozi b’abamadini n’amatorero bashishikajwe n’ifungurwa ry’insengero atari impuhwe bafitiye intama ahubwo ari amaturo bashaka ngo kuko uburyo bwo kuvuga ubutumwa hakoreshejwe ikoranabuhanga ntibutuma amaturo aboneka nk’igihe abantu bateraniye mu nsengero.

Aha umuntu yakwibaza igituma abantu batekerereza insengero mu maturo aho gutekereza umumaro wazo nyakuri muri sosiyete no mu buzima bwite bwa muntu.

-  Umumaro w’amadini n’amatorero muri sosiyete

Amadini n’amatorero afite umumaro ukomeye muri sosiyete kuko agira uruhare mu bikorwa by’iterambere nko kubaka amashuri, amavuriro, gufasha abatishoboye, imishinga yo kurwanya ubukene n’ibindi.

Ku rundi ruhande, nta wakwirengagiza uruhare rw’amadini n’amatorero mu isanamitima, mu bumwe n’ubwiyunge, imibanire y’abagize umuryango, kurwanya ibiyobyabwenge n’ibindi.

Ariko nanone ku rundi ruhande, nk’uko byagiye bigaragara mu minsi yashize, mu madini n’amatorero ni hamwe mu hagaragaye amakimbirane atandukanye ashingiye ku guhanganira imyanya y’ubuyobozi, gukoresha nabi imitungo mu nyungu za bamwe n’ibindi.

Hatirengagijwe kandi n’abagiye bigisha inyigisho tutatinya kuvuga ko zirimo ubuyobe bukomeye zagiye zihindura abazumva kuba abayoboke b’idini n’abayobozi baryo aho kuba abayoboke b’Imana. Ubuhanuzi bw’ibinyoma bwagiye bukura imitima y’abantu, bwasenye imiryango ubundi bugakoreshwa nk’inzira y’ubushukanyi bwo kwambura ababwumva ibyabo babyitirira ko bahaye Imana izabakubira n’ibindi.

Ariko n’ubwo bimeze bityo, ibyiza bikorwa n’amadini n’amatorero ntibikwiye kwirengagizwa kubera ibibi bike byakozwe na bamwe mu bagize ubuyobozi bw’amadini n’amatorero.

-  Umwuka utera abantu kubona amatorero mu ishusho y’amaturo aho kubona akamaro kayo muri sosiyete

Nk’uko nabivuze hejuru, amadini n’amatorero bifite umumaro ukomeye mu buzima bwa muntu kuko ni imwe mu nzira ikoreshwa mu guhindura imitekerereze n’imyitwarire ya muntu mu kuyoboka Imana biciye mu ivugabutumwa.

Mu rusengero niho honyine abantu bashobora kugera bakumva bari mu mwanya ukwiye bashobora guhuza ibitekerezo, bagahanga amaso ku kintu kimwe kandi bakemera bakanakira ubutumwa bahawe mu buryo bworoshye, niho umuntu agera amarangamutima ye akayagaragaza mu buryo budafite imbereka.

Ni yo mpamvu leta ikwiye gukorana bya hafi n’abayobozi b’amadini n’amatorero, bagakangurira abizera babo kubahiriza ingamba zashyizweho mu kwirinda iki cyorezo.

Mu myemerere ya gikirisitu, urusengero bemeza ko ariho hakwiye ho kuramiriza Imana no gusabana n’abavandimwe muhuje ukwemera. Umwuka utekerereza urusengero mu maturo ni umwuka urwanya ivugabutumwa rikorerwa mu nsengero ni umwuka urwanya ubusabane bw’abahuje ukwemera, ni umwuka urwanya uburenganzira bwo guteranira hamwe kw’abera.

Umwuka w’Imana ntushobora gutuma umuntu atekerereza urusengero mu maturo, aho kurutekerereza mu kubohoka, mu guhinduka no guhembuka kw’abaruteraniramo.

Abatekerereza urusengero mu maturo ni abafite umwuka w’Ubufarisayo, cyangwa umwuka w’ubuhakanamana, bahora batekerereza ko kubaha Imana ari inkomoko yo kubona inyungu z’ibifatika.

-  Ni gute uyu mwuka warwanywa?

Bibiliya mu Gitabo cya Tito 2:7-8 igira iti “Wiyerekane muri byose nk’icyitegererezo cy’imirimo myiza, kandi mu iyigisha ryawe ugaragaze uko uboneye udapfa gutera waraza, n’ijambo ryawe ribe rizima ritariho umugayo, kugira ngo umuntu uri mu ruhande rw’ababisha amware atabonye ikibi yakuvuga.’’

Mu byemezo by’Inama y’Abaminisitiri biheruka gutangazwa byemeje ko amateraniro rusange imihango y’ubukwe ikorerwa mu nsengero n’inama bibujijwe.

Igihe cyose insengero zizaba zongeye kwemererwa gufungurwa abantu bemerewe guteranira hamwe nta mbereka, abayobozi b’amadini n’amatorero bafite umukoro wo kwigisha ijambo ry’Imana rishingiye ku guhindura abaryumva no kubagira abayoboke b’Imana kuruta kubagira ababo, kwirinda inyigisho n’ubuhanuzi bw’ikinyoma.

Gushishikariza abayoboke babo kwita ku buzima bwabo no kwirinda, gushyiraho uburyo busobanutse bwo gucunga umutungo w’amadini n’amatorero bayoboye azaboneka aturutse muri ya maturo n’indi mishinga kugira ngo abari mu ruhande rw’ababonera insengero mu maturo bamware batabonye ikibi babarega.

Ibikubiye muri iyi nyandiko ni ibitekerezo bwite bya Urinzwenimana Mike


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .