Inkubi y’impinduka muri RDC n’icyo ihatse

Yanditswe na Muhumuza Alex
Kuya 12 Ukuboza 2019 saa 10:56
Yasuwe :
0 0

Gukubita inshuro imitwe ya gisirikare ikorera muri Congo imyinshi ikorana na Kampala, ntabwo byabaye intangiriro y’ibihe bishya mu karere gusa; ahubwo byaneyuye igicu ku byifuzo bya Perezida Yoweri Museveni ku kwigarurira akarere. Ibintu bikomeje kumugaruka mu buryo butangaje.

Museveni yakomeje kwibona nka Napoleon, ubundi “Bismarck wa Afurika”. Abenshi bagiye bitegereza imvugo ze n’ibikorwa bakabonamo ukwikuza. Ibihamya biri buri hamwe, ibikorwa igisirikare cye kigiramo uruhare n’aho kidakenewe; mu nyandiko ze n’imvugo; cyangwa se icyifuzo cye cyo kuba Perezida wa mbere wa Leta ya Afurika y’Iburasirazuba.

Ariko nanone niba uyu mutegetsi wa Uganda yibona nk’umuntu ukomeye mu mateka, uburyo yahisemo gukurikirana indoto ze binyuranye cyane n’ibyo abantu bakomeye bakora. Ahubwo bisanga mu rwego rumwe n’abo yahoze anenga, nka Idi Amin.

Mu gitabo cye Sowing the Mustard Seed, Museveni yanditse ati “Nahoraga mbona (Milton) Obote nk’umuntu w’amayeri atarangira; umuntu udafite amahame agenderaho wahoraga avuga ko ibyo wagezeho bigaragaza inzira waciyemo. Uretse kuri Obote, iherezo ryakunze kuba ribi kurusha uburyo bwaribanjirije.

Iyo mvugo ahubwo ishobora guhindukizwa igakoreshwa mu kugaragaza Museveni uwo ari we n’ibyo yakomeje kugerageza imyaka mirongo mu ntego ze zo kwishyira hejuru.

Gusa nyuma yo gusenywa mu bya gisirikare kw’abambari be muri RDC, abo yari yiringiyeho kuzahungabanya umutekano w’u Rwanda nk’imwe mu ntego ze zagutse, imigambi ye ubu iri mu rungabangabo.

Ubu umutwe wa RNC w’igikoresho cye Kayumba Nyamwasa, wugarijwe n’amatiku aturukamo imbere. Nyamwasa ashinjwa ko yategetse ifatwa rya Ben Rutabana, umwe mu bayobozi bakuru b’uwo mutwe, kubera amakimbirane arimo imbere kandi umugore wa Rutabana yamaze gushyira hanze, hamwe yifashisha amabaruwa yagiye yandika ahandi agakoresha murandasi n’ibiganiro na radio mpuzamahanga.

Umuryango wa Rutabana by’umwihariko washinje Nyamwasa kumushimuta. Ubu umuryango wa Rutabana bivugwa ko “wamaze kwirukanwa muri RNC”.

Abasesenguzi bavuga ko umwuka mubi muri uwo mutwe ufitanye isano n’ugutsindwa muri RDC, guhera mu ntangiriro z’uyu mwaka ubwo abantu bayo basaga 200 bicirwaga mu bice bya Minembwe n’abayobozi b’igisirikare cyayo nka Habib Mudathiru bagafatwa, bakoherezwa mu Rwanda bakagezwa imbere y’inkiko.

Uku gutakaza imbaraga mu mitwe ifashwa na Museveni byakomeje kugira ingaruka, ndetse mu bantu bo hejuru muri RNC batangira gushinja Kayumba Nyamwasa gucunga nabi ibikorwa bya RNC nko kunyereza umutungo; kwironda no gutonesha abantu bamwe na bamwe no kuba nyamwigendaho mu miyoborere.

Uko byaba bimeze kose, impuguke zivuga ko nubwo RNC itera u Rwanda ibibazo iri kure, ubu isa n’iyarangiye.

Gishegesha ya mbere yabaye ubwo muri RDC hajyagaho ubuyobozi bukuriwe n’umuntu ushyize imbere imibereho myiza y’abaturage be. Ibyemezo byafashwe birimo guhindura politiki y’akarere ndetse bishobora kudasubira inyuma.

Imigambi ya Perezida Museveni ya mpatse ibihugu buri gihe yagiye yubakira ku guhungabanya ubutegetsi bwose bw’ibihugu bimukikije. Mu buryo bwamaze igihe, aka karere kakomeje kurangwa n’umutekano muke kahaye uyu muyobozi wa Uganda, abantu be ba hafi n’abantu bamwe muri UPDF urubuga rwo kuzuza imifuka yabo, akababaro k’abaturage gakomeza kwirengagizwa.

Igitangaje nta rundi rwego uretse Urukiko Mpuzamahanga rw’Ubutabera rwabihamije, ubwo mu 2005 rwemezaga ko Uganda igihe yari muri Congo mu 1998 kugeza 2003, yayoboye ubwicanyi n’iyicarubozo byakorewe abasivili ndetse hasenywa insisiro mu gihe ubusahuzi bwari bukataje. Urukiko rwahaye RDC miliyari 10 z’amadorali nk’indishyi ku byangijwe n’ubwo Uganda itarishyura.

Iki gikorwa cy’urukiko nticyigeze gica Museveni intege mu gukomeza kwivanga muri gahunda z’iki gihugu cy’igituranyi. Impamvu ni uko uretse amahirwe yo gusahura, uwo muturanyi munini yari urufunguzo ku migambi ye yo kwigarurira ibihugu.

Ibice byose by’icyo gihugu byagizweho ingaruka n’imitwe y’inyeshyamba ifashwa na Leta ya Kampala irimo RNC ya Kayumba Nyamwasa yubakiye ku byifuzo bya Museveni byo guhirika ubutegetsi bwa Kigali.

RNC n’indi mitwe itandukanye nk’ishamikiye kuri FDLR yahinduye Uburasirazuba bwa Repubulika Iharanira Demokarasi ya Congo ibirindiro byayo aho abayigize bahohotera abaturage b’Abanye-Congo mu gihe bagishakisha uko batera u Rwanda.

Gusa imigambi ya Museveni n’imitwe ashyigikiye yajemo kirogoya.

Ubuyobozi bushya muri Kinshasa butihanganira na gake amabandi y’uburyo bwose ahutaza abaturage b’abasivili, agasahura ndetse agafata ku ngufu, ubu nibwo buyoboye. Ni ubuyobozi bwatanze gasopo ku mitwe yitwaje intwaro ko igihe cy’ibikorwa byayo by’amarorerwa cyarangiye!

Niba imitwe yitwaje intwaro yaracyekaga ko ari imikino, basogongejweho ubwo itsinda rya Mudathiru ryagamburuzwaga (hamwe na Sibo Charles we hamwe n’abandi batagize amahirwe nk’aya Mudathiru ngo babashe gukomeza kubaho).

Magingo aya, Museveni wakomeje gushaka kuvangira ubuyobozi bw’u Rwanda kubera ko yumvaga ko mu buryo bwa gitware ashobora gutegeka uko ibintu bigenda muri Kigali (ibintu yabwiwe ko nta gihugu gifite ubusugire gihabwa amategeko n’ikindi) icya kabiri kuko yabonye Kigali nk’inzitizi ku migambi afite yo kwigarurira akarere, asa n’uwananijwe.

Uyu mugambi wa Uganda wagerwaho igihe waba ushyizwe mu gihugu kiyobowe n’abantu bashyira inyungu z’abaturage munsi y’izabo bwite. Congo ni igihugu cyategereje igihe kirekire umuntu udashobora kwihanganira abanyamahanga basahura abaturage n’umutungo w’igihugu cye. Ubu isa n’iyamaze kumubona.

Perezida Félix Tshisekedi aherutse gutangaza ko bibaye ngombwa yiteguye gufatanya n’abaturanyi mu bya gisirakare kugira ngo imitwe yitwaje intwaro irimburwe mu gihugu cye.

Imwe mu ntambwe yatewe ni amasezerano y’ubufatanye yasinywe hagati y’ibihugu byo mu karere, agamije ibikorwa bihuriweho mu gihugu cye byo kurandura indi mitwe yose y’inyeshyamba nyuma y’ibiheruka byagenze neza kuri RNC.

Impande zitabiriye inama yabereye i Goma kuva tariki ya 25 kugeza ku ya 26 Ukwakira 2019, zose zashyize umukono ku masezerano y’ubufatanye, usibye Uganda. Iyo nama yahuje abayobozi b’Ingabo ba RDC, u Rwanda, u Burundi ndetse n’abahagarariye US AFRICOM na MONUSCO.

Uganda yanze gusinya, ahubwo ihitamo guhimba inkuru mu binyamakuru bitandukanye by’icengezamatwara, igerageza gushinja u Rwanda nk’impamvu yo kwanga gushyira umukono ku masezerano. Byari byoroshye gutahura ayo macenga.

RNC, FDLR, RUD Urunana, FLN n’indi itandukanye ikorana na Kampala; bityo nta kuntu yari gushyira umukono ku masezerano agambiriye gukuraho iyo mitwe. Iki ni ikindi gihamya, niba hari ikindi gikenewe mu kugaragaza uruhare rwa Kampala ku kubaho kw’iriya mitwe ibangamiye amahoro.

Guseta ibirenge kwa Museveni ku masezerano ya Goma ariko nta ruhare runini byagize mu kudindiza uwo mugambi. Abayobozi benshi ba FDLR, RUD na FLN bamaze kwicwa cyangwa se batawe muri yombi mu minsi mike ishize. Amagana y’abasirikare bayo bamanitse amaboko, bishyikiriza ibirindiro bya FARDC.

Indorerezi zihamya ko RNC ishobora kuzagumaho ariko ku izina gusa. Izakomeza ikorere muri Uganda. Izakomeza kubera ikibazo gikomeye by’umwihariko Abanyarwanda baba muri Uganda. Abantu bayo baba muri Kampala n’ahandi nka Mbarara, bazakomeza gukorana n’inzego z’iperereza zaho mu gushimuta, gutoteza no gukorera iyicarubozo inzirakarengane z’Abanyarwanda.

Impamvu ikomeye y’iyi kinamico ni uko, usibye Museveni, izindi nyungu zikomeye muri Uganda zashowe mu kubaho kwa RNC. Ntibazahagarika kugaragaza ko RNC igifite intego, babwira Museveni ibyo ashaka kumva, ko RNC ikiri iturufu ikomeye mu guhindura ubuyozi bwa Kigali.

Inzego z’ubutasi zirangajwe imbere n’Urwego rwa Gisirikare rushinzwe Ubutasi, CMI, zikoresha ingengo y’imari nini mu buryo bw’ibanga, itajya ibazwa uko ikoreshwa, RNC ikaba urwitwazo.

Benshi mu bagize agatsiko gakikije Museveni bagifitiye inzika u Rwanda bakomora ku ntambara ya Kisangani yabaye mu myaka hafi 20 ishize, ntibazarekura ukwihorera kwabo kutagezweho. Ibyo kimwe n’izindi nyungu bizakomeza guhurira kuri RNC. Ndetse bizakomeza kunyunyuza ku mutungo wa Uganda.

Abarwanyi bagize imitwe yitwaje intwaro ifashwa na Uganda bakomeje gutabwa muri yombi umusubizo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .