Impamvu kubita ‘abasigajwe inyuma n’amateka’ bibadindiza kurushaho

Yanditswe na Vital Karangwa Jr.
Kuya 23 Ukuboza 2019 saa 03:59
Yasuwe :
0 0

Mu minsi ishize nasomye inkuru ivuga ko COPORWA, Umuryango w’Ababumbyi mu Rwanda, wagaragaje ko abasigajwe inyuma n’amateka bakomeje kuguma mu bukene bukabije kubera ko badashobora guhangana n’abandi mu iterambere.

Nubwo njye atari ko mbibona ngereranije n’imiryango nagiye nsura mu myaka ishize nk’umunyamakuru- kuko iterambere ryabo umuntu abishatse anarirebesha amaso- ariko hari imbogamizi ikomeye izakomeza gutuma izina bitwa ubwaryo rishobora gutuma bakomeza kuba inyuma y’abandi banyarwanda. Yego, bakaba batera imbere ugereranyije n’aho bahoze ariko ntibagendere ku muvuduko umwe n’abandi banyarwanda.

Abahanga mu by’imitekerereze y’abantu bagaragaza ko amakuru uhaye ubwonko kenshi gashoboka atuma ubwenge bw’umuntu buyahinduramo ibikorwa bigendanye na ya makuru wahaye ubwonko. Ibi nibyo bita ‘subconscious mind power’ mu Cyongereza.

Impamvu abahanga batubuza guhora twatura amagambo mabi ku bana

Ni kenshi twumva abahanga mu mitekerereze y’abantu batubuza guhora tubwira abana amagambo y’urucantenge. Urugero aba bahanga bavuga ko atari byiza guhora ubwira umwana ko ari ‘umuswa’ , ‘igicucu’ , ‘umunebwe’ n’andi magambo menshi y’urucantege.

Impamvu ibi babitubuza ni uko uko ubwira umwana kenshi ko ari igicucu ayo makuru ageraho akaba menshi mu bwonko/ubwenge (subconscious mind) noneho ubwonko bukageraho bukayakira bukayabyaza ibikorwa by’ubucucu koko kugira ngo bubisanishe na ya makuru buhora bwakira ko umuntu ari igicucu.

Ibi ni ibintu biba nyirabyo atabigizemo uruhare kuko ubwenge bukora iki gikorwa ni nabwo bwenge butuma umutima wacu utera kandi atari twe tubisabye, ni nabwo butuma duhumeka, twayura, igifu kigasya ibiryo n’ibindi bikorwa tudafiteho ubushobozi nyamara tukisanga twabikoze: ‘subconscious mind’.

Ubu ni nabwo bwenge butuma dutwara imodoka tugahinduranya amavitese tutabanje kubitekerezaho cyane nyamara igihe twigaga imodoka twarabanzaga gukora imibare myinshi irimo ukuntu uri bubanze gukandagira embrayage hanyuma ukayirekura gake.

Uko tubikora kenshi bwa bwenge burabifata bukajya bubyikorera butabanje kubinyuza mu bwenge busanzwe ngo tubitekerezeho. Uku ni nako kwaturiraho umuntu amagambo atari meza bimusubiza inyuma aho kumukangura.

Ibi bihuriye he n’izina ‘abasigajwe inyuma n’amateka’ nahereyeho?

Amagambo tubwira umuntu kenshi niyo ubwonko bubyazamo ibikorwa bihuye na ya magambo tumubwira nkuko nabivuze hejuru. Gusubiramo buri gihe ko umuntu yasigajwe inyuma n’amateka – igihe cyose ubwonko bwe bumufasha gukora ibikorwa nk’iby’umuntu amateka yasubije inyuma nyine.

Iyi ni siyanse izwi hose! Iyo uhora ubwirwa ko uri umuswa, igicucu n’ibindi nta kabuza ubwonko bukomeza kugufasha gukora ibikorwa bigaragaza ko uri igicucu koko! Iyo uhora ubwirwa ko amateka yagusubije inyuma ndetse hakavamo n’inyito bakwitirira nta kabuza ubwonko bugufasha gukomeza gusigara inyuma ku buryo buri gihe cyose umuntu akureba akabona koko wasigajwe inyuma n’amateka kugira ngo bize gusa n’ibyo ubwonko buhora bwumva.

Ku bizera iyobokamana Umwami Salomo niwe wavuze ko uko umuntu atekereza ku mutima we ni nako aba abayeho mu buzima bwe (Imigani 23:7) hanyuma namwe mwizera siyanse umugabo witwa William James akaba ari nawe wa mbere wigishije isomo ry’imitekerereze ya muntu (psychology) niwe wavuze bwa mbere ko guhindura imitekerereze bihindura imibereho y’umuntu.

Nkurikije izo mpamvu zose umuntu kuba abantu bose bamwita ko yasubijwe inyuma n’amateka biragoranye ko ayo mateka amurekura ku rwego rwifuzwa mu gihe cyose tukimubona mu isura y’uwasigajwe inyuma n’amateka ndetse tukagera naho tubimushakiramo izina.

Izina ‘umunyarwanda’ rirahagije kimwe n’abandi bose. Hanyuma haba hari ibikorwa byihariye ashaka guhabwa bigakorwa bitabaye ngombwa kumushakira izina rihora rimwemeza ko yasigaye inyuma y’abandi. Binabaye ngombwa cyane ko ahabwa izina ryihariye reka ahabwe izina ritanga icyizere rikamwemeza ko ari gutera imbere. Ibi bibe uko no ku babyeyi bita amazina abana babo.

Vital Karangwa Jr. amaze igihe mu itangazamakuru ryo mu Rwanda

Umwanditsi ni inzobere mu itangazamakuru n’itumanaho. Ibikubiye muri iyi nyandiko ni ibitekerezo bye bwite.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza