Impamvu itangazamakuru mpuzamahanga ryahisemo kuyobya uburari ku byaha Rusesabagina ashinjwa

Yanditswe na Lonzen Rugira
Kuya 12 Nzeri 2020 saa 08:48
Yasuwe :
0 0

Toni Morrison, Umunyamerikakazi wahawe igihembo cyitiriwe Nobel mu Buvanganzo yaravuze ngo "intego n’ingaruka nyamukuru y’ivanguraruhu ni ukurangaza abantu; ivanguraruhu rikubuza gukora akazi kawe; rituma wisobanura mu buryo butarangira impamvu uriho.”

Aya magambo ya Toni Morrison ni ingenzi ku muntu wese ukeneye kumva ibirimo kuba nyuma y’itangazwa ry’inkuru ku ifatwa rya Paul Rusesabagina.

Abakoresha irondaruhu bavuga ibintu bitandukanye bitesha agaciro mu rwego rwo kurangaza no gutesha abandi umwanya; nko kuvuga ngo ururimi rw’abantu runaka ntabwo rwujuje ibyangombwa by’ururimi rwemewe, ibyo bigafata imyaka makumyabiri musobanura ururimi rwanyu. Undi muntu akaza yigize impuguke akavuga ko umutwe w’abantu runaka utabumbye neza, ugakoranya abahanga b’Igihugu cyose kugira ngo bakore ubushakashatsi bwo kubihinyuza.

Umuvamahanga akaza akavuga ko abantu runaka batagira umuco, iyobokamana cyangwa ubugeni, ubwo ibindi byose bigahagarara mukajya guhangana nabyo mwisobanura. Umuntu akavuga ko nta gihugu n’ubuyobozi bwiza mugira, mukarara amajoro muhangayikishijwe no kwisobanura. Buri gihe ibyo bisobanuro biba intandaro y’ibindi bibazo, bikaba uruhererekane rutari ngombwa uretse kurangaza no gutesha umwanya gusa.

Ibinyamakuru mpuzamahanga bizwi cyane nka CNN, BBC, The New York Times, The Washington Post, Reuters n’ibindi, birimo kuyobya uburari kugira ngo abantu bibagirwe ibyaha Paul Rusesabagina ashinjwa; ahubwo bahugire mu nkuru z’uburyo yageze mu Rwanda n’aho yafatiwe.

Abantu badafite amakuru ahagije cyangwa yuzuye ku byaha Rusesabagina ashinjwa, bashobora kurangazwa n’ibikorwa by’iryo tangazamakuru mpuzamahanga byo kuyobya uburari, kandi urebye neza ntabwo umuntu yabarenganya, kuko umugambi wo kuyobya uburari ugamije gupfukirana abantu benshi bashoboka, kugira ngo batekereze ko Rusesabagina akurikiranywe n’ubutabera kubera kwiyita "Intwari" cyangwa “kutavuga rumwe n’ubutegetsi.”

Mu ntangiro, inkuru yo kurangaza yavugaga ko Rusesabagina yashimuswe n’u Rwanda; ubu ishimutwa ntirikivugwa, hagezweho kuvuga ko yafashwe binyuranyije n’amategeko yohererezwa u Rwanda rwihishwa (“rendition”). Mu by’ukuri izi nkuru zivuga ko Rusesabagina yashimuswe cyangwa yafashwe binyuranye n’amategeko akohererezwa u Rwanda rwihishwa, nta shingiro zifite kuko nta gihugu na kimwe cyigeze kivuga ko ubusugire bwacyo bwavogerewe, kandi nta kimenyetso na kimwe kigaragaza ko Rusesabagina yakorewe ishimutwa.

Ndetse na nyuma y’aho bimenyekaniye ko Rusesabagina yizanye mu Rwanda, iryo tangazamakuru ryakomeje gutsimbarara ku ishimutwa cyangwa gushyikirizwa u Rwanda rwihishwa. Iyo bitabaye ishimutwa, batangaza inkuru zamagana ko Rusesabagina bamuteze umutego w’amayeri, cyangwa ko yashutswe akagenda atazi ko agiye mu Rwanda.

Ubwo nari ndimo kwandika iyi nkuru, umwe mu banyamategeko b’inararibonye yarambwiye ati “Abakekwaho ibyaha bahunze, ntabwo ubucamanza butegereza ko bizana ngo bishyire mu maboko y’ubutabera”. "Abashakishwa n’ubutabera buri gihe bafatwa bibatunguye; kubera ko nabo bagerageza kwihisha no kujya aho bumva ko badashobora gufatwa."

"Gukoresha amayeri cyangwa kugwa mu mutego ntabwo ari uburyo budasanzwe bukoreshwa mu gufata abakekwaho ibyaha, by’umwihariko abihishahisha nka Rusesabagina. Kohereza umuntu rwihishwa cyangwa kumushimuta nabyo bifite uko bisobanurwa mu mategeko, kandi nta na kimwe kigaragaza ko ari byo byabaye kuri Rusesabagina."

Yanongeyeho ko "haramutse hari ufite ikibazo kijyanye n’uburyo bwakoreshejwe mu kumufata, byasuzumwa n’ubutabera, nta kibazo." Yavuze kandi ko "Amategeko y’u Rwanda abuza ifatwa ritemewe n’amategeko agateganya n’inzira zo kurenganurwa. Ariko icy’ingenzi kandi gikomeye ni uko Rusesabagina yari akenewe mu Rwanda kandi yarahageze, ubu arimo kubazwa ibyo akurikiranyweho." Mu yandi magambo, ibindi bivugwa ku ruhande ni ukurangaza abantu gusa.

Itangazamakuru rikoreshwa mu kurangaza abantu ryanatangaje inkuru zamagana ko umuntu w’icyamamare nka Rusesabagina "yerekanwa yambaye amapingu."

Nyamara ntabwo Rusesabagina ari icyamamare kuruta umunyamareka witwa Bill Cosby, ndetse nawe afite umudali w’ishimwe (Presidential Medal of Freedom) yahawe na Perezida w’Amerika.

Abayobya uburari kuri Rusesabagina ntabwo bigeze bavuga ko Bill Cosby atagomba kwerekanwa yambaye amapingu kubera ubwamamare bwe; none ubu induru yarabasumbye ngo Paul Rusesabagina agomba kurekurwa kuko ari icyamamare.

Byongeye, ntabwo ari ubwa mbere ibyamamare bitabwa muri yombi bikerekanwa byamabaye amapingu, harimo n’abafatwa kubera ibyaha byoroshye ugeraranije n’ibyaha Rusesabagina akekwaho.

Uburyo bwa gatatu bukoreshwa mu kurangaza abantu, ni abavuga cyangwa abandika ko umuryango wa Rusesabagina n’abanyamategeko bamwunganira bangiwe kumubona cyangwa kuvugana nawe; ndetse banongeraho ko hari impungenge ko ashobora gukorerwa iyicarubozo.

Nyamara abatangajwe n’umuryango wa Rusesabagina ko ari abanyamategeko bashinzwe kumwunganira ntabwo bari mu Rwanda, ndetse n’abo mu muryango we batuye mu mahanga. Niba koko ibyo birego bitagamije kurangaza abantu gusa, ni ubuhe buryo nk’umuryango we n’abo watangaje ko bamwunganira bateganyaga kubonana na Rusesabagina mu gihe batari mu Rwanda?

Cyangwa se, ni gute bazi ko Rusesabagina akorerwa iyicarubozo kandi batemererwa kumugeraho cyangwa kuvugana na we nk’uko babivuga? Izi nkuru z’ibinyoma zitandukanye n’amakuru yizewe avuga ko Rusesabagina yavuganye n’abo mu muryango we kuri telefoni.

Mu kiganiro yagiranye n’itangazamakuru, Rusesabagina yanivugiye ko afashwe neza, ndetse ko yahawe uburenganzira bwo kwihitiramo abamwunganira.

Yagize ati "nahawe uburenganzira bwo kwihitiramo abagomba kunyunganira. Iperereza rirakomeje, ntabwo nshaka kujya mu mizi y’ibyo nkurikiranweho mu butabera. Ntabwo nshaka kuganira ku byo ndegwa kubera ko biri mu nzira z’ubutabera no mu iperereza."

Amakuru yizewe ahamya kandi ko umudipolomate uhagarariye Ambasade y’u Bubiligi yasuye Rusesabagina aho afungiwe kuri Sitasiyo ya Polisi i Remera, barabonana. Umuntu yakwibaza kuyobya uburari ku byaha Rusesabagina aregwa icyo bagamije!

Gusuzugura inzego z’igihugu

Nabajije uwahoze ari umushinjacyaha wakoze ku rubanza rwakurikiranywe cyane mu itangazamakuru mpuzamahanga, icyo atekereza ku nkuru zigaragara mu itangazamakuru mpuzamahanga zigamije kuyobya uburari ku mpamvu nyakuri z’ifatwa rya Rusesabagina, zirimo ibyaha by’iterabwoba, ndetse by’umwihariko kuba iryo tangazamakuru ritavuga ku bantu bagizweho ingaruka n’ibitero bya FLN – Force for National Liberation – umutwe witwaje intwaro w’ishyaka MRCD (Movement for Change and Democracy in Rwanda) rya Rusesabagina.

Itangazamakuru mpuzamahanga ryirengagiza ko hari na “video” yashyizwe ku rubuga rwa YouTube rwa Radio Ubumwe y’Ishyaka MRCD, igaragaza Rusesabagina atangaza ko FLN yatangije urugamba rwa gisirikare rugamije kuvanaho ubutegetsi.

Uwo wahoze ari umushinjacyaha yagize ati "Ntabwo ari ubwa mbere bakoze nk’ibi [kurangaza abantu]. Mu 2010, hari umunyamahanga watawe muri yombi hashingiwe ku mategeko y’u Rwanda ahana icyaha cyo guhakana no gupfobya Jenoside yakorewe Abatutsi. Na mbere y’uko ubushinjacyaha burangiza dosiye ikubiyemo ibyo yaregwaga, mu gihugu akomokamo bari batangiye gukwirakwizwa inyandiko zisaba ko arekurwa."

"Muri yo minsi naje kujya mu rugendo muri icyo gihugu, maze mpura na bamwe mu bandikaga inyandiko zisaba ko arekurwa. Nababajije niba bazi ibyaha akurikiranyweho. Ntabyo bari bazi kubera ko izo nyandiko zabo zatangiye gukwirakwizwa na mbere y’uko Ubushinjacyaha burangiza gutunganya dosiye ye ngo bumurege mu nkiko. Narababajije nti ’none murashingira kuki musaba ko arekurwa?’ Nta n’umwe muri bo washoboraga gusubiza ikibazo cyanjye."

Izo nyandiko zakwirakwijwe kubera uwo munyamahanga wari watawe muri yombi mu 2010, kimwe n’ibyo ibinyamakuru mpuzamahanga birimo gutangaza ku ifatwa rya Rusesabagina, byose ku mpamvu yo kuyobya uburari no kurangaza abantu, kubera agasuzuguro bafitiye inzego z’u Rwanda.

Nk’uko byagarutsweho muri iyi nyandiko, mu itangazamakuru mpuzamahanga huzuyemo inyandiko zigamije guharabika Guverinoma y’u Rwanda, harimo ibijyanye n’uburyo Rusesabagina yafashwe kugeza iyubahirizwa ry’uburenganzira bwe nko kwangirwa gusurwa, ndetse n’impungenge zidafite ishingiro ko ashobora gukorerwa iyicarubozo, birimo gukwirakwizwa n’itsinda ry’abanyamategeko (n’umuvugizi wa Rusesabagina Foundation) batigeze bimenyekanisha ku nzego z’ubutabera bw’u Rwanda nk’abunganizi ba Rusesabagina, kandi ntibigeze bagerageza kuza kumureba aho afungiwe ngo baganire nawe nk’umukiliya wabo.

Agasuzuguro bafitiye inzego z’u Rwanda ni yo impamvu ikinyamakuru ’The Washington Post’ cyatangaje inkuru ivuga ko Rusesabagina yafashwe "n’Urwego rw’u Rwanda rw’Ubugenzaha rukorera mu kwaha kwa Leta", bishatse kuvuga ko kuri bo Rusesabagina afunzwe n’urwego rwa baringa rushaka kumushyikiriza urukiko rwa gishenzi ngo rumuburanishe.

Uwitwa Madamu Kitty Kurth, umuvugizi wa Rusesabagina Foundation, ni we muhuzabikorwa w’uwo mugambi wo gukoresha nabi nkana itangazamakuru mpuzamahanga, hagamijwe kurangaza amahanga no kuyobya uburari ku byaha Rusesabagina akurikiranyweho.

Umuntu yitegereje neza ibyo uwo muvugizi wa Rusesabagina Foundation arimo gukora, bigaragara ko isanzwe ari umuryango w’abatekamutwe wubakiye ku binyoma. Ku ruhande rumwe, umuntu yakwibaza niba mu nshingano z’iyo ’Foundation’ ya Rusesabagina harimo kumuburanira no gukoresha umutungo wayo mu rwego rwo kwirengera ibyaha aregwa; ndetse bikajyana no kuyobya uburari ku bikorwa by’iterabwoba yiyemereye mu mashusho yakwirakwiye, ubwo yahamagariraga abantu gushyigikira imitwe yitwaje intwaro.

Ntabwo iyo ’Foundation’ ya Rusesabagina ishobora kuba icyarimwe umuryango wigenga udaranira inyungu za politiki, hanyuma ngo abayobozi n’umuvugizi wabo bahinduke abavugizi ba Rusesabagina mu bikorwa yishoyemo by’iterabwoba no kurema umutwe witwaje intwaro.

Niba ibyo bakora byo kuvugira Rusesabagina barimo kubikora ku giti cyabo cyangwa niba ari mu rwego rw’inshingano nshya bahawe na ’Foundation’ ya Rusesabagina, iyo ’Foundation’ igomba gutangaza gahunda nshya yihaye muri iki kibazo, kugira ngo urwego rw’ubutabera bw’u Rwanda ndetse n’amahanga muri rusange bamenye urwego bayifatamo.

Nk’uko ibyo Madamu Kurth arimo gukora bibigaragaza, niba yariyemeje gukingira ikibaba no kuba umuvugizi wa Rusesabagina nk’umunyarwanda ukurikiranywe n’ubutabera bw’u Rwanda kubera ibyaha yakoreye mu Rwanda, ni uburenganzira bw’Abanyarwanda bifuza ubutabera kumenya abihishe inyuma y’umugambi wo gushaka kuburizamo ubutabera.

Kugira ngo Madamu Kurth yambare impu zombi, nk’umuvugizi wa ’Foundation Rusesabagina’ ndetse akaba n’umuvugizi wa Rusesabagina nk’umuntu ukurikiranywe n’ubutabera ku byaha akekwaho ku giti cye, ibyo abishobozwa n’uko hari itangazamakuru ryahindutse igikoresho cyo kuyobya uburari rimukingira ikibaba, ntibamubaze aho inshingano za ’Foundation’ n’ize nk’umukozi wayo zitangirira n’aho zigarukukira.

Muri make nk’uko Morrison yabivuze neza, "nta yindi mpamvu itera kuyobya uburari ku byaha bya Rusesabagina no gusuzugura inzego z’u Rwanda uretse irondaruhu n’inyungu za mpatsibihugu."

Iyi nkuru yabaje gusohoka mu Cyongereza ku rubuga rwa Panafricanreview.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .