Ijwi ry’Umusomyi: Ibitekerezo by’ingenzi byatanzwe ku nkuru za IGIHE mu cyumweru gishize

Yanditswe na IGIHE
Kuya 10 Kanama 2020 saa 04:30
Yasuwe :
0 0

Nk’uko twabibasezeranyije, buri wa Mbere tubakusanyiriza bimwe mu bitekerezo by’abasomyi byatanzwe mu cyumweru gishize, mu rwego rwo kuba hafi y’abasomyi bacu no kubereka ko ibitekerezo byabo tubizirikana.

Ni muri urwo rwego uyu munsi twabahitiyemo bimwe mu byatambutse mu cyumweru gishize, guhera tariki 3 Kanama kugeza ku wa 9 Kanama 2020.

Icyitonderwa: Ibitekerezo bitoranywa si uko ari byo byonyine byubaka biba byatanzwe, igitekerezo cyose gitangwa tugiha agaciro ahubwo ni uko ari byo biba byahurijweho na benshi mu itsinda rishinzwe kubisesengura.

Tariki 9 Kanama uwitwa Janvier yatanze igitekerezo ku nkuru igita iti “Ibiciro by’imyambaro ya Moshions byarikoroje ku mbuga nkoranyambaga".

Yagize ati “Ibi harimo gutesha ifaranga agaciro, ibaze niba umushara fatizo ari 45,000 Frw ku kwezi warangiza ukagurisha ingofero 95,000 Frw. Iyi Ni capitalism kandi biragaragaza ko abakene bazarushaho gukena kuko hari ababona amafaranga badafite icyo kuyakoza bakayapfusha ubusa.”

Tariki 9 Kanama kandi Muvunyi yatanze igitekerezo ku nkuru igira iti “Perezida Ndayishimiye yashinje u Rwanda gufata impunzi z’abarundi nk’imbohe, abusanya n’ibimenyetso”.

Yagize ati “u Burundi ni butuze duturane neza, duhahirane, dushyingirane kuko turi abavandimwe. Hariya ni mu rundi Rwanda. Naho nibahitamo kuduteza ibibazo muzehe wacu adufashe azabibarangirize, u Rwanda ruratera ntiruterwa ibyo birazwi, inkuruzi y’urukoba yikururira umuriro kandi urwishigishiye arasuma.”

Tariki 8 Kanama, Panafricanist EastZone yatanze igitekerezo ku nkuru igira iti “FERWAFA igiye gushaka Umuyobozi wa tekinike mushya usimbura Habimana Hussein"

Yagize ati “Kubera iki mwishimira kuvuga ko atitwaye neza kandi manda ye irangiye akiri mu kazi mutaramwirukanye? ibyo ntibihagije, Si uguharabika izina ry’umuntu? Ntekereza ko bitari ngombwa kumwongera manda kuko hari n’abandi bagomba kwigaragaza! Kuki abanyafurika tugira ibitekerezo bibi. Kwikubira imyanya si umushinga icya mbere ni ukunoza ibyo urimo umusaruro waba muto cyangwa mwinshi byose ni umusaruro.”

Tariki 7 Kanama uwitwa Soso yatanze igitekerezo ku nkuru igira iti “Perezida Ndayishimiye yashinje u Rwanda gufata impunzi z’Abarundi nk’imbohe, abusanya n’ibimenyetso”.

Yagize ati “Njye nari mu bakiriye impunzi zavuye mu Kirundo hagati ya Mata- Kamena 2015. Ndemeranya n’umutima wanjye ko impunzi ziri mu Rwanda 70% zahunze inzara. Bari bafite amavunja, badakaraba, rwose ubona neza ko batavuye mu gihugu. Hafi ya bose, uretse abavaga i Bujumbura, ntibari bazi n’icyo bahungaga.

Bageze Mahama bararya, barakaraba, baravurwa, abana babo bariga, none ngo u Rwanda rubafashe ku ngufu, ku zihe nyungu se? Abenshi muri ziriya mpunzi ni bamwe bari barirukanywe ku ngufu mu nkambi ya Gikongoro baranze gusubira iwabo kubwo gutinya inzara, babonye intambara yadutse, bati tubonye impamvu.

Reka twemere ko ibyo Nyakubahwa Perezida w’u Burundi avuga ari byo ra, ese abari Tanzania, Uganda nabo RDC nabo bafashwe ku ngufu? kereka niba barahindutse zahabu. Birababaje kandi biteye agahinda kuba umuntu nk’uriya bamuha igihugu gifite imbibi ngo akiyobore. Abarundi nshuti zajye, ntimunyumve nabi ntacyo mfa namwe ariko nta buyobozi mugira.”

Tariki 5 Kanama uwitwa abana Eric yatanze igitekerezo ku nkuru igira iti “Ibidasanzwe biri mu gishushanyo mbonera gishya cy’imikoreshereze y’ubutaka".

Yagize ati “Leta nishyiremo imbaraga z’umurengera, abanyarwanda dutuzwe hamwe mu midugudu kandi izo nzu zubakwe mu buryo bwa Etage, kandi ntihazagire umuntu wongera kubaka mu gasambu ke, kuko ubutaka bwaradushiranye. Ikindi Leta itegeke abanyarwanda kutarenza abana 1 cyangwa 2 nk’uko abashinwa babigenje kuko ikigaragara Leta ifite umutwaro wo kuzagaburira abantu niba ubutaka bukomeje kubakwaho no gukoreshwa nabi nkuko birimo gukorwa. Niba umuryango ufite abana babiri, bakure neza biga neza bityo igihugu kizagira abantu b’abahanga bafite ubushobozi bwo guhangana ku murimo ku rwego mpuzamahanga.

Icya nyuma Leta nishyiremo imbaraga zo kubungabunga ibishanga, abahatuye bimurwe nta zindi mpaka, kandi Leta idufashe utujagari two mu mujyi tugabanuke kuko n’ubu inzego z’ibanze zo mu mijyi zirarebera, akenshi ugasanga harimo na ruswa.

Tariki 7 Kanama uwitwa John Kayihura yatanze igitekerezo klu nkuru igira iti “Urubyiruko rwakoze application ishobora gufasha umuntu kwiga indimi 11,"

Yagize ati “Njye nkorera muri USA akenshi no mu Bufaransa. Iyi application izagenda imfasha cyane kuko mu byo nkora mu kazi kanjye ka buri munsi kumenya indimi nyinshi zo muri Afurika biba ari akarusho. Niyo mpamvu mvuga ko mu Rwanda dufite abanyempano. Kubona urubyiruko rutari mu biyobyabwenge ahubwo rutanga umusanzu mu kubaka igihugu rwihangira Imirimo ni ibintu bidutera ishema. Ejo ni heza.”

Uwitwa The truth yatanze igitekerezo ku nkuru igira iti “Abantu batagira ubwenegihugu bakirwa n’u Rwanda bafashwa iki?

Yagize ati “Nshingiye ku byo abadafite ubwenegihugu bemererwa mu bihugu byabakiriye, ndabona baba borohewe no gukora ikiza cyangwa ikibi nta kibatangira cyane ko baba bidegembya nk’abaturage basanzwe b’ icyo gihugu. None ubwo hashingirwa kuki kugira ngo umuntu yizerwe ako kageni? Ese kuki umuntu nk’ uwo atakagombye gutekerezwaho kabiri, byaba na byiza akagaragaza icyangombwa cyo kuba ’indakemwa’ mu mico no mu myifatire mbere yo kwakirwa? Murakoze.”

Tariki 9 Kanama uwitwa Bonke yatanze igitekerezo ku nkuru igira iti “Polisi yerekanye abakekwaho ubujura n’abaguraga ibyo bibye: Menya uko itsinda ryabo ryakoraga".

Yagize ati “Abajura bacu bamaze kuba inzobere n’abanyamwuga. Ese nihe hatari abajura?! Ni hose keretse baretse abaturage buri wese akagira umuzamu maze ay’irondo bakayareka. Njye mfite imbwa , bajya kuza yabatahuye ariko barahahora, ndetse iyo bakuguyeho uryamye baragukubita bitavugwa. Baza banyoye urumogi, hari n’umu-veteran duturanye bari batemeye mu nzu. Abajura bavuye Nyabugogo ubu basigaye bari muri za quartiers , keteretse ba Mudugudu babamenyekanishije ahasigaye leta ikajya kubahingisha amaterasi.”

N’abandi bose batanze ibitekerezo byabo tutabashije kwandika hano, turabashimiye kandi tubasaba gukomeza kudukurikira no kuduha ibitekerezo ku nkuru tubagezaho. Ibitekerezo byatambukijwe uko byakabaye ntakigabanyijwe mu butumwa bw’umwimerere [aho biri ngombwa hakosowe amakosa y’imyandikire].

IGIHE.COM iri ku isonga mu bitangazamakuru bisomwa na benshi ku butaka bw'u Rwanda no mu Banyarwanda baba mu mahanga ku bikorera kuri internet

Ifoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .