Ijwi ry’Umusomyi: Ibitekerezo by’ingenzi byatanzwe ku nkuru za IGIHE mu cyumweru gishize

Yanditswe na IGIHE
Kuya 3 Kanama 2020 saa 03:25
Yasuwe :
0 0

Nk’uko twabibasezeranyije, buri wa Mbere tubakusanyiriza bimwe mu bitekerezo by’abasomyi byatanzwe mu cyumweru gishize, mu rwego rwo kuba hafi y’abasomyi bacu no kubereka ko ibitekerezo byabo tubizirikana.

Ni muri urwo rwego uyu munsi twabahitiyemo bimwe mu byatambutse mu cyumweru gishize, guhera tariki 27 Nyakanga kugeza ku wa 2 Kanama 2020.

Icyitonderwa: Ibitekerezo bitoranywa si uko ari byo byonyine byubaka biba byatanzwe, igitekerezo cyose gitangwa tugiha agaciro, ahubwo ni uko ari byo biba byahurijweho na benshi mu itsinda rishinzwe kubisesengura.

Biraza tariki 3 Kanama yatanze igitekerezo ku nkuru igira iti “Ikibazo kiri mu midugudu yacu, ntikiri ku Kibuga cy’indege – Dr Nsanzimana avuga kuri COVID-19”.

Yagize ati “Nk’ejobundi kwa Gatanu habaye ikirori gikomeye mu baturanyi banjye ngo basezeraga ku mwana wabo wagombaga kujya muri America bukeye bw’aho kwa gatandatu. Sinagiyeyo nubwo bantumiye ariko nabaze imodoka zari ziparitse imbere yaho zigera kuri 28, kandi ubwo harimo n’urubyiruko rwinshi rw’inshuti z’uwo mwana rwajeyo n’amaguru.

Nzi neza ko harimo abantu barenga 50 (barenze na wa mubare 30 w’abemerewe gutaha ubukwe). Ikindi cyantangaje, uwo mwana basezeraga yarafite icyemezo kitarenza amasaha 72 cy’uko yapimwe coronavirus bagasanga ari négatif. None se niba muri abo bose bitabiriye ikirori harimo urwaye corona akayibanduza na wawundi azayijyana muri America kandi yitwa ko ari muzima kuko afite cya cyemezo. Jye numva corona itazashira abantu bakibera muri mama wararaye batubahiriza amabwiriza.”

Uwitwa R.kda kuwa 1 Kanama yanditse igitekerezo ku nkuru igira iti “Minisiteri y’Uburezi yatangiye gutekereza uburyo bwafasha abanyeshuri kwigira aho bari hose”.

Yagize ati “Abanyeshuri ba Kaminuza bashobora kwiga bajya ku ishuri bagakurikiza amabwiriza yo kwirinda Covid-19 bigashoboka, kuko baba bakuze (mature) ku buryo byakoroha ko batangira ishuri mu kwa cyenda Kandi banirinda icyorezo.”

Tariki 31 Nyakanga, uwitwa Kelly yatanze igitekerezo ku nkuru igira iti “Kigali: Imwe mu midugudu yakuwe muri Guma mu Rugo, indi iyigumamo”.

Yagize ati “Na Rusizi nyabuneka, amezi arenga ane tutemerewe kurenga akarere! Hari abatatanyijwe n’imiryango kubera lockdown. Mu busesenguzi bwanyu mwareba uko hasuzumwa uko abantu bajya bipimisha coronavirus i Rusizi basanga ntayo bakemererwa kurenga imbibi zako, hagashyirwaho n’aho bakwipimishiriza aho bageze bakareba niba nta bwandu bahajyanye mbere yo kwemererwa kujya mu miryango yabo cyangwa ahahurira abandi bantu,nkuko abanyamahanga n’abanyarwanda bifuza gutemberera Kigali bizajya bikorwa.Murakoze”.

Tariki 31 Nyakanga, Bigirumwami yatanze igitekerezo ku nkuru igira iti “Ibirego by’abakekwaho gusambanya abana bimaze kurenga 2100 muri uyu mwaka – RIB".

Yagize ati “Ntabwo nshyigikiye ihohoterwa. Njye mbona imyaka y’ubukure ikwiriye kumanurwa ikava kuri 18 wenda igashyirwa kuri 16, kuko abantu bageze muri iriya myaka baba bashaka gukora imibonano kurusha abandi bose basigaye, biba muri DNA. Birashoboka rero ko umuti waba ushakirwa aho utari.

Niba buri mwaka hakazwa ibihano ariko abatwara inda bakiyongera kurushaho, birashoboka ko ababikora babikunze cyangwa bibanyuze, mu gihe mubaha ubutabera ahubwo bakumva muri kubahohotera. None wowe uwagufungira se w’umwana ariwe wakwitagaho, ubwo yaba aguhaye ubutabera cyangwa yaba aguhohoteye? Mukwiye kwicara mukabyigaho, kuko abakobwa benshi birababaza iyo mubafungiye abagabo, n’ikimenyimenyi abenshi ntabwo baba baje kurega, mubategera kwa muganga baje kubyara. Nitangiranga igitekerezo, murakoze.”

Kuri iyo nkuru kandi uwitwa Dr Paul yagize ati “Leta yacu nihindure itegeko. Namwe mushyize mu gaciro umugabo utarubaka ashakanye n’umukobwa wimyaka guhera kuri 16 bagahitamo kwibanira, ko ntawe baba babangamiye mubaretse byabatwara iki? None se nihafungwa abantu biyubakiye urugo bishimye, mukabasenyera ubwo bo ntibazaba bahohotewe? Ubushakashatsi bugaragaza ko umukobwa ufite 16 aba akuze mu mitekerereze no mu gihagararo, leta nigabanye imyaka y’ubukure ive kuri 18 ijye kuri 16 kuko no mu Rwanda rw’abakurambere dukomokaho bashyingiranwaga bageze muri iyo myaka kandi zigakomera. Ikindi imyaka y’ubukure mu bindi bihugu babonye biri ngombwa barayimanura ijya kuri 17, 16 , 15 na 14.

Urugero rwaho bafatira kuri 16 ni muri America (USA), Canada, u Burusiya, Afurika y’Epfo, Zimbabwe, ,Ghana, u Bwongereza, muri Israel, Singapore, Hong Kong n’ahandi henshi. Aho bafatira kuri 15 ni muri Seychelles. Aho bafatira kuri 14 ni mu Budage, Angola , u Bushinwa n’ahandi kandi ibi bihugu nibyo bya mbere bikize ku isi.

Tariki 31 Nyakanga, uwitwa Ernest yatanze igitekerezo ku nkuru igira iti “RIB yerekanye abakobwa bakurikiranyweho gushyira ku mbuga nkoranyambaga amashusho y’urukozasoni".

Yagize ati “Aba bakobwa babahane babere abandi akabarore nabo batazahirahira babikora. Ibyo avuga ngo babikoreshejwe n’ubusinzi sibyo kuko yivugiye ko babimwemereye bataragera iwe ngo abahe inzoga, murumva rero ko babikoze babizi. Urubyiruko rero nirukoreshe amaboko yarwo ruve mu bunebwe no gukunda iraha ririmo kwitesha agaciro.”

Tariki 30 Nyakanga uwitwa Wizo yatanze igitekerezo ku nkuru iira iti “Ni nde wafungura amashuri tukibona abantu 40 buri munsi barwaye?-Minisitiri Ngamije”.

Yagize ati “Ibyo Minisitiri avuga nibyo rwose. Abanyarwanda turi abanyarwenya kabisa! Covid19 twayiciye amazi wagira ngo ntikiri ikibazo. Namwe nimumbwire ukuntu wakohereza abana ku ishuri ngo bazirinde Covid19 n’ababyeyi babo byarabananiye kuyirinda? Ahandi iri kwisasira imbaga buri munsi naho twe wagira ngo ni ibicurane bisanzwe. Uyu mwaka wa 2020 wagakwiye kudusigira isomo mu nzego zose z’ubuzima duhereye mu ngo zacu. Amashuri azatangira mu kwa mbere umwaka utaha wa 2021 kandi nimukomeza kuregeza mwirengagiza ingamba zashyizweho zo kwirinda Covid19 bazakomeza bicare mu ngo kugeza igihe muzagaraza ko muri responsible!”

Tariki 30 Nyakanga kandi uwitwa Emmanuel yatanze igitekerezo ku nkuru igira iti “Ibyemezo by-Inama y-Abaminisitiri yo ku wa 29 Nyakanga 2020”

Yagize ati “Abayobozi bacu bakoze Imana ibahe umugisha ariko banafashe abafite insengero kuva mu gihirahiro. Amabwiriza ya Minaloc avuga ko ku rusengero hagati y’umuntu n’undi hagamba kubamo intera ya metero 1’5 hanyuma umujyi wa Kigali wo ukuvuga metero eshatu, ibyo babikura he? Ikindi rwose abayobozi b’inzego z’ibanze nibareke abujuje ibisabwa baterane kuko hari insengero nyinshi zujuje ibisabwa ariko zabujijwe guterana, ubundi Perezida wacu Imana imukomereze amaboko.”

Tariki 29 Nyakanga Derreck yatanze igitekerezo ku nkuru igira iti “Urwibutso kuri ‘Camp Zaïre’, irembo Abanye-Congo benshi banyuzemo binjira mu Rwanda (Video), ”

Yagize ati “Yooo, cyakoze kariya gace kasize amateka meza pe! Wabonaga n’abantu batuye i Gikondo bafite ukuntu umuco wabo wivanze n’uwabanye-Congo. Njye narabikunze pe! Ndasaba ko leta yazongera gushaka ahandi hantu hazashyirwa agace kameze nka kariya kuko byatsuraga umubano mwiza bikanatuma ubumenyi buhererekanywa . Abenshi muri twe twigishijwe n’aba banye-Congo, kuva kuri za siyansi kugera ku myambarire . Aba bantu nakunze igikoni cyabo. Nukuri leta itegure indi Camp yabo pe. Njye nuko mbyumva”.

Tariki 27 Nyakanga, Aloys yatanze igitekerezo ku nkuru igira iti “Leta igiye guha ibiribwa abarimu bo mu mashuri yigenga bamaze igihe badahembwa”.

Yagize ati “Bariya bakozi bari bakwiriye gutabarwa ku buryo butagoye leta. BRD yari ikwiye kubaguriza nkuko abandi banyarwanda bahabwa buruse yo kwiga nabo bagahabwa ingoboka ya buri kwezi, amashuri yatangira bagatangira kwishyura iyo ngoboka nyuma y’amezi abiri.”

N’abandi bose batanze ibitekerezo byabo tutabashije kwandika hano, turabashimiye kandi tubasaba gukomeza kudukurikira no kuduha ibitekerezo ku nkuru tubagezaho. Ibitekerezo byatambukijwe uko byakabaye ntakigabanyijwe mu butumwa bw’umwimerere [aho biri ngombwa hakosowe amakosa y’imyandikire]

IGIHE.COM iri ku isonga mu bitangazamakuru bisomwa na benshi ku butaka bw'u Rwanda no mu Banyarwanda baba mu mahanga ku bikorera kuri internet

Ifoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .