Hari ubwo biba ari ngombwa gutumira itangazamakuru mu bikorwa byo gufasha

Yanditswe na Vital Karangwa Jr.
Kuya 7 Mutarama 2021 saa 03:34
Yasuwe :
0 0

Mperutse gusoma igitekerezo cy’umwe mu banditsi cyatambutse kuri IGIHE gifite umutwe ugira uti “Ese birakwiye ko tujya gufasha abakene tukitwaza itangazamakuru?”

Uyu mwanditsi ubundi usanzwe unyuza ibitekerezo bye hano bigafasha benshi nanjye ndimo iyi nshuro hari ibyo ntemeranywa na we mu gitekerezo cye.

Abajya gufasha bakitwaza itangazamakuru yaba abanyamadini n’abandi bantu batandukanye ntabwo tugomba kubashyira mu gatebo kamwe bose ngo tubafatire umwanzuro ko ibyo barimo byose ari ‘Ukwivura ibikomere by’amateka banyuzemo, ibirarane byo kubahwa, gushaka guhabwa agaciro bitewe n’imiryango bavukamo” n’izindi nyito ziremereye umwanditsi yakoresheje.

Gukoresha itangazamakuru bishobora kuba bikozwe mu rwego rwo gutanga urugero batabariza abababaye maze ababikoze bakabikora bakangurira abandi gukomereza aho bahereye. Cyane cyane ko inkunga abenshi batwara iba itazanamara igihe bityo bikaba ngombwa ko bahamagara n’abandi gukomerezaho. Tuzi ko itangazamakuru ari bumwe mu buryo bworoshye bwo guha ubutumwa abantu benshi kandi bukaba bushobora kuba ari nabwo buhendutse ugereranyije n’ubundi buryo bwo mu ibanga.

Iyo umuntu ababaye ikibazo si itangazamakuru ritangaza ko yafashijwe cyangwa akeneye ubufasha bwisumbuyeho ahubwo ikibazo ni ukubona ubufasha bwose akeneye ibindi bikaza nyuma.

Dukomeje kubona abantu bahaguruka bakishyira hamwe bagafasha abantu batishoboye kandi imbarutso yarabaye ko babonye mu bitangazamakuru abandi bari gufasha noneho nabo bagasa n’abakangutse bagahera aho. Uwabikoze atyo rwose nta kabuza ko Imana yabimuhembera!

Bishobora kuba ivugabutumwa: Yesu yasize avuze ko tuzakora ibiruta ibyo yakoze kandi tuzavuga ubutumwa tugere ku mpera y’Isi (Yohana 14:12 | Matayo 24:14). Kandi kuvuga ubutumwa si uguhagarara imbere y’abantu ngo ubigishe ijambo gusa ahubwo ni ibikorwa dukora birimo ibyo gufasha abatishoboye ubwabyo ni ivugabutumwa. Uyu munsi itangazamakuru, YouTube, amateleviziyo n’ibindi, niryo ridufasha kuvuga ubutumwa kugera ku mpera y’Isi. Iyo ni imwe mu mpamvu kwiyegereza itangazamakuru mu bikorwa nka biriya atari ko byakitwa ikibazo buri gihe.

Yesu yavuze ubutumwa ikoranabuhanga ritaraza ariko uyu munsi dufite amahirwe yo kumenya ko yagaburiye abantu ibihumbi bitanu, tuzi ko yafashije ba Petero kuroba amafi menshi n’ibindi.

Ibyo byose tubizi kuko ba Luka cyangwa Yohana babyanditse niyo tekinoloji bari bafite kandi nabyo twabishyira mu rwego rw’itangazamakuru. Iyo batabyandika se? Ndetse iyo haza kuba uburyo amafoto n’amashusho byari gufatwa uyu munsi tukaba tunabireba ariko byose yabikoraga ngo Imana ihabwe icyubahiro.

Yesu agaburira abantu ibihumbi bitanu byaravuzwe (itangazamakuru) bikwira Isi yose bukeye abantu baza bamukurikiye arababaza ati muraje cyangwa ni ya mitsima y’ejo? Ntabwo rero kuba byaratangajwe bivuze ko Yesu yashakaga kwiyerekana ahubwo byose byari mu kazi k’ivugabutumwa.

Gusa icyo ngarukaho mpuza n’umwanditsi wa kiriya gitekerezo nakomojeho, ni ukutibanda cyane ku mashusho y’abafashijwe byanashoboka abana ntiberekanwe cyangwa hagahishwa imyirondoro yabo. Uyu wo ni umukoro w’itangazamakuru ntabwo ari iby’abafasha.

Kandi burya dusesenguye neza n’ibyanditswe (Bibiliya) ntabwo kugaragaza ibikorwa byiza ku karubanda bibujijwe rwose ahubwo biterwa n’icyo ubikoze ugamije. Petero yandikira abakirisitu batataniye hirya no hino (nk’abagiye i Ponto, Galatiya n’ahandi) yababwiye kugira ingeso nziza *HAGATI Y’ABATIZERA* kugira ngo nubwo babasebya nk’abakora nabi *NIBABONA IMIRIMO YABO* izabatere guhimbaza Imana (1 Petero 2:12).

Icy’ingenzi rero si ukubuza abantu itangazamakuru ahubwo ni ukubibutsa ko bagomba kubikora bagamije guhesha Imana icyubahiro ndetse amahame y’umwuga agakurikizwa aho kubikora ngo aribo bakomerwa amashyi kuko abatabigenje batyo ingororano yabo irangirira kuri ayo mashyi bahawe (Matayo 6:1-2).

Ubwo aha turavuga abakirisitu n’abanyamadini kuko hari n’ababikora bigamije kumenyekanisha ibigo n’izindi mpamvu zidahuye n’izo turi kuvuga hano.

Erega burya n’uwatanze ashaka kwereka abantu ko yatanze ngo babimwubahire uwo na we akwiye kugenzwa gake kuko niba aribyo bimushimisha ntabwo yahita acibwaho iteka! Kuba yatanze ashaka kwigaragaza ntibikuraho ko uwari ushonje arya, uwari ukeneye iryo gare (ry’ababana n’ubumuga) arigendamo ubuzima bugahinduka, uwari urwaye akivuza agakira.

Impamvu Yesu yabwiraga abantu ngo icyo ukuboko kumwe gukoze ukundi ntikukakimenye ni uko azi kamere y’abantu! Abantu iyo bakomewe amashyi kabiri bazamura kamere y’ubwibone ibyakorwaga ngo Imana ihabwe icyubahiro bikarangira bihindutse ibyo kubahisha abantu ku giti cyabo.

Niyo mpamvu abantu bakwiye kwibutswa ko ibyo byose bigomba gukorwa mu guhesha Imana icyubahiro ndetse tugashyiraho ingamba ku buryo ibyo dukora bidahinduka ibikorwa bidutera ubwibone no gushaka icyubahiro ariko nanone ntibibuze ko dukomeza kuvuga ubutumwa kugera ku mpera y’isi twifashishije iryo tangazamakuru.

Imana yanga umwibone ni nayo mpamvu igihe Herode bamureba bakamukekamo Imana bitewe n’ibyo yakoraga (Ibyak 12) Malayika yamanutse akamukumbaganya ava inyo umwuka urahera.

Itangazamakuru ni ryiza rwose mu bikorwa umuntu akora gusa biterwa n’uburyo rikoreshejwe kuko nk’Abanyarwanda tuzi neza rikoreshejwe nabi ibyo ryakora ariko turanabizi ko iyo rikoreshejwe neza ryubaka byinshi. Urikoresheje wese ntidukwiye guhita tumutekerereza ngo tuvuge ko ari gushaka “kubahwa cyangwa kwikiza ibikomere”. Abakora ibikorwa by’ubutabazi nibo bazi impamvu bifashisha itangazamakuru (iyo baryifashishije) ukurikije izo twavuze haruguru.

Ibikubiye muri iyi nyandiko ni ibitekerezo bwite bya Vital Karangwa


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .