Hakenewe izindi mbaraga twifitemo mu guhangana n’icyorezo cya Coronavirus

Yanditswe na Muhirwa Ernest
Kuya 31 Nyakanga 2020 saa 08:37
Yasuwe :
0 0

Kuva kera ibibazo bitandukanye byarabaga, ndetse bikaba ingorabahizi. Nk’uko bisanzwe hari ubwo byasabaga amaboko aturutse hirya no hino. Duhereye no mu ngo iyo hadukaga ikibazo, byabaga byiza iyo abagize umuryango biyambaje ingufu z’abaturanyi. Ibi ariko ntabwo byavugaga ko ikibazo cyugarije bene cyo cyakemukaga burundu, ahubwo hari iturufu nziza yiyambazwaga.

Hirya no hino ibibazo bikomeza kuba urusobe , nyamara abantu batandukanye bakomeza kugerageza gushaka inzira banyuramo kugira ngo bakemure ibibazo byabo, gusa muri byose isoko yo kugera ku gisubizo cy’ibibazo ni imwe rukumbi. Biragoye ariko kandi byiza ko biba, yewe duhereye ino mu Rwanda dufite icyo bita “intore ntiganya ahubwo yishakira ibisubizo”.

Magingo aya icyorezo cya coronavirus gikomeje kuba imbogamizi kuri byinshi, kandi ku isi yose cyamaze kuba karahabutaka, abantu b’ingeri zose bari kurira kimwe, abakomeye bataka kimwe n’abaroheje, abize barira kimwe n’abatarize, abayobozi bafite ubwoba kimwe n’abayoborwa, yewe impande zose zaratangatanzwe.

Inzego zitandukanye zakomeje gukora iyo bwabaga ariko COVID-19 yakomeje kuvugisha amangambure abantu bose, byagera mu bihugu bimwe na bimwe ho icyorezo kigasya kitanzitse, abafata ingamba zitandukanye nka guma mu rugo, kwambara agapfukamunwa, gukaraba intoki n’amazi meza n’isabune zabugenewe cyangwa umuti wabugenewe n’izindi ngamba byakomeje gushyirwamo ingufu zitandukanye.

Kimwe nk’ibindi bihugu u Rwanda natwe turi mu ruhande rwo gukaza ingamba zo kwirinda icyorezo ngo kidakomeza kuduhekura, dore ko n’abo kidahekuye kibasigira ihungabana mu mitekerereze, nk’uko indwara zose zikaze iyo zifashe umwe mu bagize umuryago basigara bibazo byinshi.

Zimwe mu ngero zafashije kwishakamo ibisubizo

Naganiriye n’abanyeshuri bigaga mu ishami ry’imicungire y’ibidukikije (Environment Management) ndetse n’abo mu ishami rya Urban Planning bigaga muri Kaminuza Nkuru y’u Rwanda, ubu yabaye Kaminuza y’u Rwanda. Abo banyeshuri bakoze akazi kari gukorwa imyaka cumi n’itanu maze bakemura ikibazo cyo gukata ubutaka no gupima ibibanza birangira mu gihe cy’imyaka itageze kuri itatu.

Inkotanyi

Inzira zitandukanye zarakoreshejwe ngo Abana b’abanyarwana batataniye ishyanga batahe mu rwabo, ibiganiro by’amahoro byagaragaye ko nta cyo byigeze bitanga, abana b’u Rwanda ubwabo nibo bafashe iya mbere maze iya mbere u kwakira 1990 barataha maze muri 1994 Jenoside irahagarikwa. Inkotanyi ubwazo ni zo zishatsemo igisubizo kuko bari bazi icyo baharanira.

Gacaca

Kimwe mu kibazo cyari gikomereye inkiko mu Rwanda, nyuma y’uko Inkotanyi zihagaritse Jenoside yakorewe abatutsi, cyari gutanga ubutabera bwiza. Ubushishozi bw’abanyarwanda no gukoresha zimwe mu ngamba zari zisanzweho kuva kera u Rwanda rwahangwa kwari ugukoresha Gacaca maze imanza zose ziracibwa.
Izi ni ingero zitandukanye zagiye zikoreshwa kugira ngo ibibazo twagakemuriwe n’abandi natwe ubwacu tubyikemurire.

Hakorwa iki?

Duhereye kuri iki cyorezo cyugarije isi yose, COVID-19 ikwiye kuba umugani rwose. Dufite abanyeshuri bize amasomo ajyanye n’ubuzima kandi ntibafite akazi, kandi burya icyo umuntu yize agikorana umurava kandi neza. Harabura iki ngo abo bantu bose bari mu gihugu cyacu bakoreshwe mu guhangana n’icyo cyago cyane ko baba bazi neza gukurikiza ingamba z’ubuzima, aha sinirengagije ko hashyizeho urubyiruko rw’abakorerabushake, njyewe ndibanda mu gukora ibikorwa byo guhashya COVID-19 hakoreshejwe abize iby’ubuzima bagafatanya n’abasanzwe bahari.

Mu nsengero no mu misigiti, hagomba guhabwa umwanya abo bantu batandukanye, akaba ari bo bafasha Ministeri y’Ubuzima. Birababaza kubona umuntu wize icungamutungo ariwe ukarabya abantu mbere yo kwinjira ahantu runaka kandi hari abize ibyo bintu.

Mu bufatanye bwuje ubuhanga kandi bwiyongeyeho guha umwanya cyangwa gusaba abize iby’ubuzima, dushobora guhashya Coronavirus.

Isuku ni imwe mu ngamba zafashwe zo guhashya icyorezo cya coronavirus

Muhirwa Ernest,
Umusomyi wa IGIHE


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .