00:00:00 IGIHE NETWORK KN KINYARWANDA EN ENGLISH FR FRANCAIS

Guharura inzira za Gen Muhoozi cyangwa intambara kuri ADF?: Imvano y’imyitwarire itunguranye ya Museveni ku Rwanda

Yanditswe na Musangwa Arthur
Kuya 26 January 2022 saa 04:21
Yasuwe :

Mu gitondo cyo ku wa 22 Mutarama 2022, Gen Muhoozi Kainerugaba, Umugaba Mukuru w’Ingabo zirwanira ku butaka za Uganda, yasesekaye ku Kibuga cy’Indege cya Kigali kiri i Kanombe, mu ruzindiko rw’umunsi umwe rwatunguye benshi hanze aha. Rwari rugamije kuzahura umubano hagati y’u Rwanda na Uganda umaze hafi imyaka ine uri mu kangaratete.

Ni uruzinduko rwatunguranye cyane kuko rwamenyekanye iminsi ibiri mbere y’uko ruba, gusa kuva icyo gihe kugeza n’ubu, rwayoboye ibiganiro mu nkuru zagarutsweho cyane ku mpande z’ibihugu byombi ndetse no mu bitangazamakuru byo muri Afurika no hirya yayo.

Hari impamvu nyinshi zatumye uru ruzinduko rugarukwaho cyane, zirimo n’Umuyobozi Perezida Museveni yahisemo gutuma i Kigali. Uretse kuba ari umuhungu wa Perezida Museveni, Gen Muhoozi ni Umugaba Mukuru w’Ingabo zirwanira ku butaka muri Uganda, akaba n’Umujyanama we wihariye mu bya gisirikare.

Uretse kuba uruzinduko rw’uyu mugabo rwarabaye mu buryo butunguranye, n’icyizere rutanga mu kuba umubano w’ibihugu wakongera kuba mwiza nacyo gikomeje gutangaza benshi.

Uretse ubutumwa Muhoozi yari yanditse mbere yo kugera mu Rwanda, agaragaza ko afata Perezida Kagame nk’umwe mu bagize umuryango we, na nyuma yo gusubira muri uganda yakomeje kwandika ubundi bwinshi bwerekana ko yiteguye gukora igishoboka cyose kugira ngo ibihugu byongere kubana neza.

Tariki 25 Mutarama 2022, abinyujije kuri Twitter yagize ati “Ubumwe bwacu bwabayeho na mbere y’uko amateka azwi yandikwa, Imana ihe umugisha ubumwe bwa Uganda n’u Rwanda.” ubu butumwa bwari buherekejwe n’amafoto y’amabendera y’ibihugu byombi yegeranyije.

Ubu butumwa bwaje bukurikira ubundi uyu mugabo yari yanditse mbere ho iminsi ibiri agaragaza ko ibiganiro yagiranye na Perezida Kagame bitanga icyizere ku kuzahuka ku mubano w’ibihugu byombi.

Maj Gen Kandiho, ruharwa mu guhohotera Abanyarwanda yatewe ishoti

Nyuma y’iminsi ibiri Gen Muhoozi avuye mu Rwanda, Uganda yatangiye gukora impinduka mu Rwego rw’Iperereza mu Gisirikare cya Uganda (CMI), rwakunze kuba ku isonga mu bikorwa bihohotera Abanyarwanda zirimo no guhindurira inshingano Abel Kandiho wari umuyobozi warwo.

Maj Gen Abel Kandiho yahawe inshingano zo kuyobora CMI mu 2017. Ubusanzwe Urwego rw’Iperereza mu Gisirikare rurakomeye cyane ku buryo rukunze kuyoborwa n’abantu bafite ubushobozi runaka burenze ubw’ubutasi cyangwa igisirikare, ahubwo ugasanga baranaminuje mu ngeri zitandukanye.

Kuri Kandiho siko byari bimeze kuko yagarukiye mu mashuri abanza gusa, ndetse amakuru akavuga ko ibikorwa birimo nko gusobanura za raporo zitandukanye no kwisobanura imbere y’Inteko Ishinga Amategeko atashoboraga kubyitabira, ahubwo yoherezaga abamwungirije.

Kandiho yahawe izi nshingano kuko yari yizewe na Perezida Museveni wamurangiwe na Salim Saleh, bose bakamukundira uburyo ari umuntu wari witeguye gukora buri kimwe cyose ategetswe, akabikora uko yabitegetswe kandi atagenzuye ingaruka zabyo.

Bitewe n’uko umugambi wo guhungabanya umutekano w’u Rwanda washoboraga kwamaganwa n’abandi bayobozi bashyira mu gaciro, byatumye Museveni ashyiraho Kandiho yizeye ko atazigera azuyaza mu kubahiriza amategeko ahawe.

CMI ya Kandiho yari afite inshingano zo guhuza ibikorwa by’Abarwanya Leta y’u Rwanda, kubafasha kubona abarwanyi, guhuza abayobozi b’imitwe ihuriye muri uwo mugambi ndetse n’ibindi bijyanye na byo. Museveni kandi yari amwizeyeho ko azakoresha ubugome azwiho kuva mu bwana bwe, mu bikorwa birimo guhohotera Abanyarwanda.

Iyi myiteguro yose yaje kuvamo ibitero byagabwe mu Rwanda mu 2018 na 2019, icyo u Rwanda rwafashe nko kurenga umurongo utukura, ruhitamo kureka politiki yo kugira ibanga ibibazo biri mu mubano warwo na Uganda, runafata icyemezo cyo gufunga umupaka warwo n’icyo gihugu ndetse rugira inama Abanyarwanda yo guhagarika ingendo bakorera muri Uganda.

Ibikorwa bya Abel Kandiho byatumye mu Ukuboza 2021, Leta Zunze Ubumwe za Amerika zimufatira ibihano biri rwego rw’ubukungu.

Iki gihe Amerika yavuze ko Kandiho hamwe n’abandi bayobozi bafatanyije kuyobora uru rwego rwa CMI, bataye muri yombi, bafunze kandi bagahohoterera abantu muri Uganda mu bikorwa bibabaza umubiri.

Nyuma y’uko iki cyemezo cyo guhindurira Kandiho inshingano gifashwe, abenshi mu Banyarwanda binyuze ku mbuga nkoranyambaga bagaragaje ko ashobora kuba ari umwe mu musaruro wavuye mu biganiro Lt Gen Muhoozi yagiranye na Perezida Kagame, ndetse bagaragaza uyu muhungu w’imfura wa Museveni, nk’ushobora kuzana impinduramatwara mu mubano w’ibihugu byombi.

Si Maj Gen Kandiho wakuwe muri CMI gusa kuko na Brig Gen Henry wari ushinzwe ubutasi muri uru rwego yakuwe mu nshingano agirwa umuyobozi w’itsinda rishinzwe kurwanya ruswa mu biro bya Perezida.

Nubwo kugeza ubu bitaramenyekana niba kwirukanwa kwa Kandiho bishyize iherezo kw’ihohoterwa Abanyarwanda bakorerwaga muri Uganda, benshi bagaragaza ko ari intambwe nziza itewe kuko u Rwanda n’amahanga byakunze kugaragaza uyu mugabo nk’ikibazo. Muri make impinduka zikozwe, nyuma y’iminsi mike Muhoozi avuye mu Rwanda zikomeje gutungura benshi.

Maj Gen Kandiho wavuzwe mu guhohotera Abanyarwanda aherutse gukurwa ku nshingano zo kuyobora CMI

Museveni yaba yaravuye ku izima?

Nyuma yo kubona ko imbaraga zose Museveni yakoresheje, zirimo no gukorana n’imitwe y’iterabwoba ku mugaragaro ntacyo zatanze, abakurikiranira ibya Uganda hafi bemeza ko Perezida Museveni yaje gusubiza agatima impembero, abona neza ko ibyo arimo ntaho bitaniye no kuvomera mu rutete.

Ikindi ni uko yasubije amaso inyuma akareba ingaruka ibikorwa byo gukorana n’imitwe y’iterabwoba irwanya u Rwanda byamugizeho, yaba imbere mu gihugu no hanze yacyo.

Inshuro nyinshi, Perezida Museveni yagiye akoresha ibikorwa by’urugomo nk’uburyo bwo gukanga abaturage no kubashyiraho igitsure, tekinike yakunze gukoresha mu bihe byegereye amatora imbere mu gihugu.

Iyi tekinike ni nayo yashatse gukoresha ku Rwanda, uretse ko byasize bimwandurije isura. Ubundi Museveni ni umuntu ukunze kwigaragaza nk’ushyigikiye Ubumwe bw’Umuryango ya Afurika y’Iburasirazuba, ariko ibikorwa yakoreye u Rwanda byahindanyije isura ye, bituma agaragara nk’umuntu utazi icyo ashaka, ahubwo ukoresha amayeri yose ashoboka kugira ngo agere ku nyungu ze bwite.

Ku ruhando mpuzamahanga, uyu mugabo yakomeje kunengwa uburyo Leta ye yitwaye mu kibazo cy’u Rwanda, kuko nta na rimwe yerekanye cyangwa ngo isobanure ishingiro ry’ibirego byayo ku Rwanda, nyamara rwo rwarabigaragaje inshuro nyinshi, rukanerekana ibihamya bidakuka.

Ubwo amasezerano y’ubuhuza bwa Angola na Congo atatangaga umusaruro, byose byarushijeho kwerekana Museveni nk’umuntu utarajwe ishinga no kubaka amahoro arambye kuko ari we wagize uruhare rwo kutubahiriza imyanzuro y’amasezerano.

Ibi byose byakomeje gutuma icyubahiro cye mu Karere no muri Afurika muri rusange kirushaho kuyoyoka, kuko uko yifuza kugaragara nk’impirimbanyi y’amahoro, byanyomozwaga n’ibikorwa bye.

Uretse hanze y’igihugu, abatavuga rumwe na Museveni imbere mu gihugu barimo nka Bobi Wine, bakomeje gukoresha iturufu y’umubano wa Uganda n’u Rwanda mu kugaragaza icyuho mu miyoborere ya Museveni, kuko ibimenyetso bimushinja byarushagaho kwiyongera nyamara ameze nk’umuntu utanifuza kugira icyo abivugaho.

Ibi byatumaga hari abaturage benshi bakomeza kumushyira mu majwi, ku buryo byagize ingaruka ku gikundiro cye imbere mu gihugu, cyane cyane mu baturage baturiye umupaka w’u Rwanda.

Nyuma yo kwitegereza izi ngaruka zose, biragaragara ko ibyo Museveni yasaruye mu gushwana n’u Rwanda, ari bicye ugereranyije n’ibyo yahombye, bityo akaba ari ngombwa kwemera guhindura uburyo atwara iki kibazo nubwo ataba abishaka, akagomba kubikora mu rwego rwo kwirengera.

Nk’urugero, imipaka ijya gufungwa muri Gashyantare 2019, ubucuruzi hagati y’u Rwanda na Uganda bwageraga kuri miliyoni 250$, kuri ubu buri munsi ya miliyoni 10$ ku mwaka, birumvikana ko abacuruzi baheze mu cyeragati batazi impamvu y’iki gihombo, batakwishimira Perezida Museveni.

Biri mu murongo wo guharurira inzira Gen Muhoozi?

Nk’uko twabigarutseho, kuba Perezida Museveni yarohereje umuhungu we mu biganiro na Perezida Kagame, bifite igisobanuro gikomeye gishingiye ku buryo uyu mugabo yitwaye muri iki kibazo, kuko atavuzwe mu bikorwa byo guhohotera Abanyarwanda, bitandukanye n’abandi basirikare bakuru, bakunze guhohotera Abanyarwanda nk’uburyo bwo kwigura kuri Museveni.

Icyakora uretse iyo mpamvu, hanakekwa ko Perezida Museveni ari guharurira inzira umuhungu we, bivugwa ko ashobora kuzamusimbura ku butegetsi.

Museveni afite ibibazo by’ubuzima bitamworoheye birimo uburwayi hakwiyongeraho imyaka ye, dore ko imaze kugera kuri 77, bikarushaho gushimangira ko bigoye cyane ko uyu mugabo aziyamamariza indi manda mu matora ya 2026.

Ibikorwa bya Museveni kandi, birimo no gusenya umubano w’igihugu cye n’u Rwanda, byagize uruhare runini mu gutuma igikundiro cye kigabanuka, bikaba bigaragazwa n’uburyo umubare w’abamutora wakomeje kugabanuka muri ibi bihe.

Mu matora yabaye umwaka ushize, ni bwo bwa mbere Perezida Museveni yari agize amajwi make, aho yatsindiye ku majwi 58,6%. Aya majwi kandi yakomeje kugenda agabanuka kuko mu 2011 yari yatsindiye kuri 68% na 61% mu 2016. Nubwo aya majwi yakomeje kugabanuka ariko, amatora yose yakunze kuvugwamo inyerezwa ry’amajwi inshuro nyinshi, ku buryo bishoboka ko Perezida Museveni aba yatsindiye ku majwi ari munsi y’atangazwa.

Mu gihe rero imyaka itamworoheye, uburwayi n’igikundiro gike bikarushaho kumushyira mu makuba, amakuru avuga ko Perezida Museveni amaze igihe yitegereza umuntu ushobora kumusimbura, kandi yagera ku butegetsi agakomeza kumwubaha no kumurinda ibishobora kumuhungabanya mu myaka ye ya nyuma, birimo nk’ibirego byamujyana mu nkiko n’ibindi nk’ibyo.

Ku bakurikirana politiki ya Uganda, biroroshye kubona ko Perezida Museveni ashobora kuba yaramaze guhitamo umuhungu we, Gen Muhoozi Kainerugaba. Uyu mugabo w’imyaka 47, arakunzwe cyane muri Uganda, bijyanye n’uko akiri muto ugereranyije n’abanyapolitiki cyangwa abasirikare bakuru mu ngabo za Uganda.

Ni umugabo kandi uzi kwiyegereza urubyiruko, cyane cyane binyuze ku mbuga nkoranyambaga amaze kugiraho abamukurikira benshi. Byongeye kandi ni umugabo waminuje mu bya gisirikare mu bihugu nka Misiri na Leta Zunze Ubumwe za Amerika, ku buryo icy’ubumenyi ntawe ugishidikanyaho.

Umushinga w’uko Mohoozi azasimbura Museveni watangiye kugarukwaho cyane mu 2013, ubwo Gen David Sejusa Tinyefuza yavugaga ko uyu ari umugambi muremure wa Perezida Museveni ndetse ko abasirikare bakuru batazawemera bazicwa.

Gen Muhoozi yakomeje kubihakana inshuro nyinshi, akavuga ko nta gahunda afite yo kwinjira muri politiki, ariko ubwo yagirwaga Umujyanama wa Perezida mu bijyanye na gisirikare mu 2017, umushinga wo gusimbura se wongeye kugarukwaho cyane, ndetse kuri ubu usa nk’uwamaze kuba ihame.

Birumvikana ko muri uyu mushinga wo gutegura Gen Muhoozi, ari ngombwa gutangira kumuha urubuga rwo kwigaragaza nk’uwagira uruhare mu gukemura ibibazo bikomeye bireba igihugu, nk’uko bimeze ku kibazo kiri hagati y’u Rwanda na Uganda, dore ko ari kimwe mu bihangayikishije Abagande benshi. Ibi byose bigamije gukomeza gutuma igikundiro cye kizamuka, ari nako yiga amasomo akomeye mu bya dipolomasi, byose bikazamubera impamba ubwo azaba asimbuye se ku butegetsi.

Icyo dupfana kiruta icyo dupfa

Imibanire y’u Rwanda na Uganda irenze imibanire isanzwe hagati y’ibihugu, ikagera ku mibanire y’amaraso hagati y’abaturage kuko atari igitangaza gusanga umuryango utuye mu Rwanda ariko ufite bene wabo batuye muri Uganda.

Iri sano ryahoze ari urufatiro rw’imibanire myiza, kandi rishobora no kongera gukoreshwa mu kuzahura umubano hagati y’impande zombi. Uyu mubano nawo ni ingenzi muri ibi bihe, aho ibihugu, cyane cyane ibiri mu nzira y’amajyambere, bikeneye ubufatanye mu guhangana n’ingaruka z’icyorezo cya Covid-19.

Uretse Covid-19, ibihugu byombi bisangiye ibibazo kuko bifite imitwe irwanya ubutegetsi iri mu Burasirazuba bwa Congo. Kuri ubu Ingabo za Uganda ziri guhangana na ADF, icyakora birazwi ko gutsinda umutwe umwe mu irenga 120 iri mu Burasirazuba bwa Congo bitatanga igisubizo kirambye.

Ni ngombwa rero ko ibihugu bigirwaho ingaruka n’iyo mitwe bikwiriye no gushyira hamwe mu kuyihashya, bikaba umwihariko ku Rwanda rwagaragaje imbaraga zidasanzwe mu guhangana n’imitwe y’iterabwoba ikorera mu Majyaruguru ya Mozambique.

Bivugwa ko uyu mutwe wo muri Mozambique ufitanye imikoranire na ADF, ari nayo mpamvu ubufatanye mu kuyihashya ari ingenzi cyane kuri Uganda n’u Rwanda, binumvikanisha impamvu y’imikoranire.

Muri rusange, birazwi ko byatinda byatebuka, imibanire y’u Rwanda na Uganda izashyira igasubira ku murongo, ntabwo ibihugu byacu bizabana nk’uko Koreya y’Epfo n’iya Ruguru bibanye iteka ryose. Ni iby’agaciro kuba Perezida Museveni wabaye intandaro y’ikibazo, anafata iya mbere mu kugira uruhare mu kugikemura, icyakora nubwo bitagenda gutyo, kuko atari ubwa mbere ibimenyetso bitanga icyizere byaba biraje amasinde, birazwi ko igihe kizagera umubano w’ibihugu by’ibivandimwe ukongera kuba mwiza nk’uko wahoze.

Ibiganiro Lt Gen Muhoozi Kainerugaba yagiranye na Perezida Kagame benshi bemeza ko bishobora kuzahura umubano w'ibihugu byombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .