00:00:00 IGIHE NETWORK KN KINYARWANDA EN ENGLISH FR FRANCAIS

Féminisme, agakingirizo koroswa urwango bamwe mu bagore bafitiye abagabo?

Yanditswe na Léana Bisa
Kuya 24 January 2022 saa 03:30
Yasuwe :

Abantu benshi mu Rwanda bakunze kugaragaza ukutavuga rumwe kuri Féminisme ndetse bamwe bayifata nka gahunda igamije kwambura agaciro abagabo no kubakandamiza.

Akenshi mu Rwanda usanga iyo umuntu avuze ko ari umu-féministe, abantu bahita bumva ko yanga abagabo cyangwa bakamufata nk’umwe mu bashaka kubangamira uburenganzira bw’abagabo bakabakandamiza.

Imyizerere y’uko féminisme igamije kubangamira abagabo, abagore bagashyirwa hejuru imaze gukwira muri benshi. Ese kubera iki abantu badatandukanya féminisme n’urwago abagore bashobora kugirira abagabo biturutse ku mpamvu zitandukanye ibizwi nka ‘ Misandrisme’ ?

Ubwo nakoraga iyi nkuru naganiriye n’umwe mu bantu bakurikiranira hafi ibijyanye na féminisme mu Rwanda.

Uyu muntu utarifuje ko amazina ye ajya hanze yambwiye ko iyo arebye asanga mu Rwanda hari aho féminisme ikorwa nabi ku buryo ushobora kuyitiranya n’uru rwango abagore bagirira abagabo biturutse ku mpamvu zirimo nk’ihohoterwa babakoreye bakiri bato n’ibindi.

Yagize ati “Ikibazo aba-Féministe bamwe bafite ni uko bafata ibibazo bahuye nabyo n’ihungabana (trauma) bakabihuza na féminisme.”

Yakomeje avuga ko abagore bamwe na bamwe bahohotewe n’abagabo bibaviramo kubanga, ibi bakabigenderaho bavuga ko ‘baharanira uburenganzira bw’abagore’ bakabyitiranya n’icyo féminisme ari cyo bikangiriza isura yayo.

Nabajije inshuti yanjye uko yo ibona ibijyanye na féminisme, mu kunsubiza yagize ati “ uko mbitekereza ku ruhande rumwe abagore cyangwa abakobwa bitwaza féminisme batumva neza icyo ari cyo, abo nibo bangiza isura yayo.”

Mu 2013 hari abagore bihuje ku rubuga bita Tumblr, bategura ubukangurambaga bise “Who needs feminism” cyangwa se ‘ni nde ukeneye féminisme?’

Aba bagore bihuje ku mbuga nkoranyambaga bavuga ko féminisme ari gahunda ibangamira benshi kandi ko ntacyo imaze kandi ko ari ukwanga abagabo gusa.

Ibi byatumye abantu batekereza ko féminisme igamije kubangamira abantu ariko baribeshya cyane. Abahanga bagaragaza ko féminisme ari imyemerere yo guharanira ko abagabo n’abagore bareshya bakagira uburenganzira bungana mu bijyanye na politike, ubukungu, umuco n’ibindi.

Ibi bitekerezo byose bishingiye ku kintu kimwe cy’ingenzi, ikibazo ntabwo ari féminisme, ikibazo ni abantu [abarwanashyaka bayo] bananiwe kuyihagararira neza kandi bakayitwaza mu gutsikamira abagabo.

Mu gitabo yise “Bad feminist”, Roxane Gay yagaragaje ko yize gutandukanya féminisme n’aba-feministe. Ni nyuma y’uko asobanukiwe ko hari abiyitirira iri zina nyamara bakora ibihabanye n’amahame ya féminisme.

Hari aho agira ati “Nize gutandukanya féminisme n’aba-féministe, ikibazo ni uko uzasanga iyi miryango akenshi yita ku bagaragara n’abavugwa cyane ariko féminisme ntabwo ari imitekerereze ivugwa n’abo gusa.”

Kuba hari abakora féminisme nabi ntibikwiye kwangiza isura yayo ngo abantu basigare bayifata nk’imyumvire idashobotse, kuko hari abayikora neza bigatanga umusaruro.

Mu ba féministe bamenyekanye cyane kandi bakabikora neza harimo Abigail Adams wari umugore w’uwahoze ari Perezida wa Leta Zunze Ubumwe za Amerika, John Adams.

Uyu mugore yamenyekanye cyane kubera ibaruwa yandikiye umugabo we amubwira ko abagore nibatagira uburyo bitabwaho kimwe n’abagabo, bazigomeka ku butegetsi kandi ko batazigera bemera ko hagira itegeko batagizemo uruhare ribagenga.

Mu bandi bamenyekanye cyane harimo Elizabeth Cady Stanton na Lucretia Mott bamenyekanye mu kizwi nka ‘Seneca Falls Convention’, Mary Wollstonecraft, Susan B Anthony, Alice Stone Blackwell, Elizabeth Cady Stanton na Emmeline Pankhurst.

Nubwo hari aba-féministe bakora féminisme nabi, hari n’uruhande rw’abandi bantu batarayumva neza ndetse bagaragaza ko batiteguye kuyakira.

Bamwe mu ba féministe bavuga abakunze kugaragaza ibitekerezo birwanya féminisme cyangwa bituka abafite iyi myumvire, ari uko bafite ubwoba bw’uko hari byinshi bishobora guhinduka mu gihe abagore baba bakorewe ubuvugizi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .