Dr Munyakazi uherutse kwegura muri Guverinoma yirukanwe mu ishyaka PDI

Yanditswe na Rabbi Malo Umucunguzi
Kuya 1 Werurwe 2020 saa 01:57
Yasuwe :
0 0

Inama nyobozi y’Ishyaka Ntangarugero muri Demokarasi (PDI) yemeje ko Dr Isaac Munyakazi wahoze ari Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye, yirukanwa burundu muri iri shyaka kubera amakosa akomeye yakoze akanatuma yeguzwa ku mwanya yariho.

Dr Munyakazi yashyikirije Minisitiri w’Intebe ubwegure bwe tariki 6 Gashyantare 2020, ndetse akomeje gukorwaho iperereza ku cyaha cya ruswa, aho yagize uruhare mu buriganya bwatumye hari ishuri ryari mu myanya yo hejuru y’ijana mu bizamini bisoza amashuri by’umwaka ushize, arishyira mu myanya 10 ya mbere ku rwego rw’igihugu.

Perezida wa PDI, Sheikh Musa Fazil Harelimana, yabwiye IGIHE ko mu kumwirukana mu ishyaka hashingiwe ku buryo yiyemereye amakosa ubwo yeguraga, agakoresha umwanya afite mu nyungu ze bwite, yica gahunda igihugu cyari cyamwizeyemo.

Yakomeje ati “Ubwo rero nk’Ishyaka Ntangarugero twakagombye kuba n’intangarugero mu guhana mu rwego rw’ubutegetsi, twamufatiye icyemezo cyo kumwirukana mu ishyaka.”

Harelimana yavuze ko Dr Munyakazi yaherukaga no kwandika yegura mu ishyaka “ku mpamvu ze bwite”, aho yari Visi Perezida wa kabiri wa PDI. Mu ibaruwa ye ngo yasabaga guhagarika ibikorwa by’ishyaka kugeza mu gihe kitazwi.

Yakomeje ati “Izo mpamvu ze bwite nizo twanze, bituma tuvuga ngo ntabwo ari impamvu ze bwite ahubwo ni impamvu zo gukosereza igihugu, kubera iyo mpamvu twe turamwirukanye, nta bwegure bwe twemeye, ahubwo twamwirukanye. Guhagarika mu gihe kitazwi, twavugaga tuti ‘ejo n’ejo bundi azagaruka atubwire ngo ndagarutse’, kandi impamvu zarasobanuwe, amahanga yose n’u Rwanda bazizi.”

Harelimana yavuze ko gufata iki cyemezo ari ugutanga ubutumwa ku bandi bayobozi baturuka muri iri shyaka, ko nk’uko ari Ishyaka Ntangarugero, abanyamuryango baryo bagomba kuba intangarugero mu kazi, batandukira nabwo rikaba intangarugero mu guhana.

Yakomeje ati “Niba umuntu yagiye akizerwa, yamara kwizerwa , buriya ni ishyaka riba ryizewe, noneho agakora nabi, yarasebye ariko natwe ubwacu yaduteje ikimwaro, yaduteje icyasha, ni ngombwa ko komite nyobozi y’ishyaka ifata icyemezo kuri uwo muntu twari dufite tuzi ko ari inyangamugayo, akagararaho ubukundamugayo.”

Ubwo yari mu mwiherero w’abayobozi wabaye mu kwezi gushize, Perezida Kagame yavuze ko abayobozi b’ishuri rimwe ngo bagiye kureba Munyakazi bamusaba ko ishuri ryabo ryari mu mashuri ari inyuma y’ijana, bamusaba ko yabafasha akarishyira mu myanya yo hejuru kandi ko bazamuhemba.

Ati “Baramubwira bati tworohereze ishuri ryacu rize mu myanya ya mbere, arabikora, bati tuzaguhemba. Amafaranga ibihumbi 500, muzira n’ubusa. Na we yaje kubyemera, yarabyemeye kuko hari ibimenyetso, bamufatiye mu cyuho.”

Dr Munyakazi ni we munyamuryango rukumbi ishyaka PDI ryari rifite muri Guverinoma. Mu bandi bayobozi bakomeye rifite harimo Harelimana usanzwe ari Visi Perezida w’Inteko Ishinga amategeko - umutwe w’abadepite - na Senateri Murangwa Hadidja.

Dr Munyakazi akurikiranweho ibyaha bya ruswa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza