Birabe ibyuya...! Aho ibyishimo byo ‘gutogosa’ Togo ntibyatubereye icyuho cyo gutogoswa na Coronavirus?

Yanditswe na Bukuru JC
Kuya 27 Mutarama 2021 saa 09:26
Yasuwe :
0 0

"Tsinda we batsinde", "Sugira wacu" niyo yari intero mu bice bitandukanye by’igihugu ku mugoroba wo kuri uyu wa Kabiri tariki 26 Mutarama 2021 ubwo humvikanaga inkuru nziza y’uko Amavubi yari abashije kudwinga Togo muri CHAN 2021. Ni ubwa mbere nyuma y’igihe kinini nari nongeye kubona Abanyarwanda - bose nk’abitsamuye - bishimye bigeze hariya.

Ntababeshye bitewe n’icyizere gike numvaga mfitiye ikipe y’igihugu cyacu mu ijoro ryakeye, nahisemo kwiryamira hakiri kare kugira ngo ntaza kurara mbabaye, inyagwa y’agahinda ikaba yambuza no kugoheka kandi nari mfite akazi ngomba kuzindukiramo.

Uyu mugambi wanjye sinabashije kuwugeraho byuzuye kuko hagati mu ijoro nashidukiye hejuru nkangurwa n’induru numvaga idasanzwe, icyoba kirantaha ntangira kwibaza ikibaye muri Gisozi ntuyemo, ku mutima nti ’Agakinjiro kongeye gushya se’? Sinanibukaga ko umupira wabaye. Muri make uwavuze ko ibitotsi ari murumuna w’urupfu ntiyabeshye. Mugenzi wanjye ni we wambwiye ati “Amavubi atogosheje Togo”

Mu gihe nari ntarashira iroro neguye telefoni yanjye ngo ndebe aho isaha zigeze, nkubitana n’inkuru y’incamugongo imbwira ko bwa mbere mu Rwanda abarenga 500 banduye intindi ya COVID-19 mu munsi umwe.

Umutima wandiye ndavuga nti Mana y’i Rwanda wagiye he? Ni gute umunsi u Rwanda rubonyeho intsinzi nk’iyi ari nabwo rugwirirwa n’ishyano nk’iri. Nongeye gukubita agatima ku bantu numvaga bakomeje guhonda amadebe ku mutima nanibaza nti ‘ni gute umuntu wambaye agapfukamunwa abasha kuvuza induru nk’iyi?’ Sinkamenye ibyabaye ko uretse kukiyambura n’amashati bamwe batibukaga aho bayashyize.

Bitewe n’aho COVID-19 itugeze siniyumvishaga ko hari Abanyarwanda bashobora gutinyuka kwigabiza imihanda nta gapfukamunwa, kandi bafatanye ku ntugu.

Amashusho yacicikanye ku mbuga nkoranyambaga yankuye umutima ndavuga nti aho ntitwaba dutogosheje Togo ariko natwe COVID-19 ikaba ihaboneye icyuho cyo kudutogosa.

Gusa nubwo ibitekerezo byari byambanye byinshi niremye agatima ndongera ndiryamira nishyizemo ko ishyano numvise ryabaye muri Gisozi gusa.

Mu gitondo nazindutse iya rubika mbaza uko ijoro ryagenze mu bindi bice by’Umujyi wa Kigali, ab’i Nyamirambo bakambwira bati “Uyu munsi ubundi nibwo dutangiye umwaka ubundi ibindi byari ukubeshya”. Aba Kimisagara bo bambwiye uburyo baraye batembera umuhanda wose, mbabaza niba nibuze bibutse kwambara udupfukamunwa.

Benshi mu bo twaganiriye bambwije ukuri bemeza ko ibyo baraye bakoze iyo biza kuba imibonano mpuzabitsina baba bahakuye inda itateguwe cyangwa inyagwa ya Sida.

Ku mutima n’iyambaje Rurema ndavuga nti “Wowe ureberera u Rwanda amanywa n’ijoro ukaba wadukuye mu menyo ya Togo, ukaturinda amenyo y’abasetsi unatube hafi iyi ntsinzi ntibe yatubereye icyuho cyo kwimena inda, kandi guteshuka rimwe ntibitume uturekura.”

Banyarwanda, Banyarwandakazi dusangiye igihugu ko nabonye abasore bacu bakamejeje muri Cameroun, aho uko bari bukomeze bakorera amakipe ibyo Umupfumu Rutangarwamaboko n’imandwa ze babifurije ntibiri burangire twisanga muri iyi myitwarire igayitse ishobora no gutuma icyorezo cya COVID-19 kirushaho kwiyongera bitagira gitangira?

Aho bucyera ndabona uko Amavubi yacu ari bukomeze kudwinga ibi bikomerezwa by’amakipe biri bushyire inzego z’umutekano zacu ku gitutu cyo gukaza ingamba no gukumira abashora kwishima bagashoka iy’imihanda?

Ibyabaye mu ijoro ryacyeye birabe ibyuya ntibibe amaraso. Coronavirus ntikiri ibihuha nk’uko benshi bakunze kubifata, magingo aya imaze guhitana abarenga 180 mu Rwanda, abandi batari bake bararembye bikomeye hamwe bari hagati y’ubuzima n’urupfu.

Gukerensa Coronavirus ni ugukinisha urupfu, rushobora kuba rwakwica wowe ubwawe, mwene wanyu cyangwa umuturanyi [Imana ibikurinde].

Mucyo dufane Amavubi twirinda, duhana intera, twambara udupfukamunwa, dukaraba intoki ubutitsa, ariko kandi tunubahiriza gahunda ya ’Guma mu Rugo’ bikwiye ku bari muri uyu Mujyi wacu mwiza wa Kigali. Amagara araseseka ntayorwa, ariko twirinze #Tuzatsinda!

Nyuma y'intsinzi y'Amavubi, abafana benshi bagiye mu mihanda bishimira intsinzi y'Amavubi
Ibyishimo byatumye benshi mu Banya-Kigali bibagirwa ibihe by'icyorezo cya COVID-19 igihugu kirimo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .